[Geertruidenberg]

Ic Huygheman Peters soen doe cond allen luden want overmits groten zwaeren ende onverdrachliken last van orloghen van brande ǁ ende vanden water den eerbaeren schepenen rade ende ghemeynre stede van Sente Geerdenberghe overghecomen alsoe si by bringhen ǁ ende claghen dat si in gheenre manieren en vermoghen te betalen alsulke liifrenten als ic ende vele andere diverse personen ǁ iaerlix hebben opte stede van Sente Geerdenberghe voirs. daer om my die voirscreven schepenen raet ende ghemeyne stede van Sente ǁ Geerdenberghe haren noot ende last ghetoent hebben biddende om gracie van iaer tot iaer van alsuken vive Hollantsche gul ǁ den laetste gheslaghen als ic siaers hebbe tot minen live opte stede van Sente Geerdenberghe voirs. gheliic dattet claerliic bliken ǁ mach biden openen brieven die ic daer af hebbe soe doe ic te weten dat ic aen ghesien den noot ende last voirgenoemt eender ǁ composicien metten voirscreven heren scepenen rade ende ghemeynder stede van Sente Geerdenberghe voirs. overghecomen bin in deser ǁ manieren dat ic Huygheman Peters soen voirs. dat ic my nu voirtdaen sal laten ghenoegen van iaer tot iare met dordalven ǁ Hollantsche gulden voirs. alsoe langhe als ic leven sal dies sal ic mine termine manen als si verschenen siin ende nader ǁ maninghe soe salmen my betalen binnen der maent met voirwaerden of mine brieve sullen bliven staende in haerre macht ǁ des torconden ende om der meerder sekerheit dat ic Huygheman voirsc. dese composicie vast ende ghestendich houden wille in ǁ alder manieren ende voirwaerden dat voirscreven staet soe heb ic vriendeliic ghebeden den eerbaeren ende besceydenen minen lieven ǁ vrienden overmits ghebrects miins zeghels wil te weten Gheraert Vredrics soen ende Ian Haghen Peters soen dat sy ǁ dit op my zeghelen willen ende hare zeghelen aen dese teghenwoerdege letteren hanghen willen ende wii Gheraert Vredric ǁ ende Ian Haghen voirg. want ons Huygheman Peters soen voirs. gheopent heeft ende te kennen ghegeven hoe dat hi alsulke ǁ composicie als voirscreven staet overghecomen is metten eerbaeren scepenen rade ende ghemeender stede van Sente Geerdenberghe in ǁ alder manieren ende voirwaerden dat voirscreven es ende hi die alsoe vast ende ghestendich houden wil ende ons ghebeden heeft ende ǁ aen ons begheert dat wi des torconden ende meerdere kennissen der waerheit dit op hem bezegelen willen ende onse zegelen aen ǁ dese letteren hanghen willen overmits ghebrec siins zegels soe hebben wii des selfs Huyghemans voirs. bede ende begheerte hier ǁ af gehoert ende onse zeghelen ter beden ende begheerten van hem ende om overmits ghebrec siins zeghels voirscreven aen dese ǁ teghenwoerdige letteren ghehangen in meerdere sekerheiden der waerheit van al dat voirscreven staet ghegeven opten twelften ǁ dach van marcio int iaer ons heren duysent vierhondert vier ende dertich

Dorsale aantekening: accoort over het betaelen van eenen lyffrent