Mechelen

Allen den ghenen die dese letteren zullen zien oft hoiren lesen, Commoeniimeesters scepenen ende raid vander stad van ǁ Mechelen salut, uut dien dat de stad van Sinte Gheertruydenberghe ons dicwille ende menichwerf heeft doen ǁ thoenen de groete zware verderfflike scade die zii eenen langen tiid, gehadt ende geleden hebben, van brande ende oic ǁ van watere daer omme dat zii alsoe zeer verarmt siin dat zii den pensionaris die liifrenten hebben opte vors. stad ǁ niet betalen en connen ten zii dat zii hem gracie doen willen ons voirt biddende want Katheline S[.]erden onse ǁ poirtersse oic liiftocht heeft opte vors. stad te weten twaelf gulden cronen der munten sconinx van Vrankeriic ǁ siaers dat wii metter vors. Kathelinen sprecken wouden ende daer toe helpen dat eene redelike composicie ǁ tusschen de vors. stad ende der vors. Kathelinen gemaect mochte worden soe hebben wii ter beden van henlieden ǁ voir ons ontboden Iacop van Eppeghem onzen poirter ende medegeselle in rechte wettich man ende momboir vander ǁ vors. Kathelinen ende heb[be]n den selven Iacop alsoe onderwiist dat eene composicie tusschen de vors. stad ende ǁ den selven Iacop ende zinen wive voir ons gemaect is inder manieren hier naer volgende te wetene es dat de vors. ǁ Katheline van nu voirtaen van iare te iare alsoe lange als zii leven sal opte vors. stad niet meer heffen noch ǁ opbeuren en sal dan zesse cronen tsiaers alsulker weerden als de principaelen brief vander renten daer op gemaect ǁ begrepen heeft tot twee terminen siaers telken termine drie cronen daer af dat dyerste termiin wesen sal opten ǁ derthiendach naistcomende ende den anderen termiin op Sinte Margrieten dach daer naer volgende ende alsoe vast voirt ǁ van iare te iare ende van termine te termine sonder argelist ende zoe wanneer dat de vors. Katheline comen sal siin ǁ van live ter doot soe sullen harer beyder naiste erfgenamen oft de ghene diet hen gelieven sal te geven opte ǁ vors. stad zeventhien iair lang duerende iaerlix heffen van verschenen achterstelle oic zesse cronen siaers der vors. weerden ǁ ende ten vors. terminen geliic boven vanden anderen verclaert staet ende es ondersproken ende verclaert waert zoe ǁ dat de vors. van Sinte Gheertruydenberghe ten vors. terminen of bynnen eender maent daer naer ombegrepen niet ǁ en betaelden dat dan dese composicie van gheender weerden wesen en sal ende dat dan de vors. Katheline sal ǁ bliven staende op haer goede recht na inhoudt van haren principalen brieve behoudelic altoes den selven principalen ǁ brieve in alle andere pointen in ziinre macht des torconden hebben wii den zeghel ten zaken vander vors. stad ǁ van Mechelen aen dese letteren doen hanghen die gemaect waren opten achtentwintichsten dach van iunio int ǁ iair onss heeren dusentvierhondertachtendertich