[Alphen-Chaam]

Wii Bouden Bellens ende Joriis Bellens late Iohannes van Os doen cont allen luden met desen brieve dat ǁ voir ons comen is Marie vanden Barghe met Ianne van Erke haren man ende momboer metten rechte ǁ ghegheven, verliiden dat Ian vander Heijden ieghen hen ghecocht ende wel betaelt hevet een sister ǁ erfrogs, te betalen iaerlijx op onser Vrouwen dach Lichtmisse ende te leverene op die onderpande ǁin goeden cusbaren rogghe metter rechter rogmaten van Breda welken voirs. erfpacht die voirs. ǁman ende wiif metten rechte bewiis hebben den voirs. Ianne ende sinen naecomelinghen op ǁdie naghescreven pande te wetene op die cruden braeke met haren begripe omtrent drie boynderǁ item dat willen lant item dat coeyen bloc item de riit item die heywildert, omtrent vijf boijnder ǁal aen een gheleghen zuyt aen die strate noert opt de uutgaende aen roelkens hof item die ǁhusinghe ende hovinghe omtrent een cleyn boender item een stuc landts omtrent een half ǁboender in die ackere ten schoete (zuut gheleghen aen Bouden Bellens ende noert aen Iaen ǁ Diederics, welk erfgoede Heynric vanden Barghe houdere vanden panden ende ghevere van ǁ den pachte gheloevet te warene tallen daghen op hem ende op siin goede met meer commers ǁ voer uutgaende van neghenentwintich loepen erfrogs ende sinen heeren chiins arglist over ǁ al uutghesloten, In orconde der waerheit ende bii beden van den voerseiden partien soe hebben ǁ wii voerghescr. late desen brief open beseghelt met onsen seghelen inden iare ons heeren ǁ doemen screef XIIIIc twintich ende twee des woensdaghes nae alre Heilighen misse