Vindplaats van het origineel
Regionaal Archief Tilburg, toegangsnummer 1429, Charterverzameling Dongen (en 's Gravenmoer), inv.nr. 2
19 januari 1479
Samenvatting oorkondetekst
Vidimus door de schepenbank van Breda van een akte van Philips vander Spaengien, heer van 's Gravenmoer, dat hij Willem Hoirsten Willems aanstelt als schout van 's Gravenmoer voor een periode van acht jaar, opgesteld op 24 augustus 1476.
Transcriptie
Wii borghermeesteren scepenen ende raet der stadt van Breda doen condt eenen yegheliken dat wii gesien hebben ende horen lesen een pampieren cedile be ǁ segelt metten segele Philips vander Spaengien here van tsGreven Moer inhoudende van worde te woorde aldus Ic Philips vander Spaengien here van tsGreven ǁ moer etcetera, doe condt allen luyden alsoe my Geriit Cristus Scoutet in mynen dorpe ende heerlicheyt van tsGreven moer te kennen gegeven heeft, dat hem nu ǁ op desen tiit niet gelegen en es tscoutampt voirscreven selve in persone te bedienen ende hoe hii dair toe gevueght ende, gestelt heeft Willemme Hoirsten Willems ǁ sone om tselve scoutampt te bewaeren ende te bedienen den tiit van acht iaeren geduerende welc in gaen sal ende, beghinnen opten yersten dach van september nu naist ǁ comende, behoudelic dat Willem voirsc. mii iairlicx schuldich sal siin wittige rekeninge, ende betalinge te doen van allen boeten ende broecken van thien scellin ǁ gen ende dair en boven den schoutampt aengaende, ende dat Ic te vreden ben met Willem Hoirsten voirsc. van allen boeten ende broecken voirsc. die bynnen den tiide ǁ van acht iaeren voirsc. versciinen ende vervallen sullen in miinder heerlicheyt van tsGreven Moer voirsc. ende scelde dair af quite Geriiden Cristus miinen schoutet ǁ voirsc. behoudelic dat my Willem voirsc. iairlicx sculdich sal siin te doen alsulcke, rekeninge, bewiisinge, of betalinge, als Willem voirsc. met my dair, af overcomen ǁ is na inhout eender obligacien die Ic van hem dair af hebbe, alle dinck sonder argeliste, des torconden soe hebbe Ic Philips vander Spaengien here van tsGreven Moer ǁ voirsc. miinen segele hier onder op gedruct int iair ons heeren duysent vierhondert sesse ende tseventich vier ende twintich dage in augusto. Ende want wii ǁ Borghermeesteren scepenen ende raidt der stadt van Breda desen voirsc. cedule aldus gesien hebben goet ghanss gene ende ongerasseert soe hebben wii des torkonden der ǁ stadt segele, van Breda aen desen brieve gehangen gedaen int Iair ons heeren duysent vierhondert neghen ende tseventich neghenthien dage in ianuario
Dorsale aantekening:
Schravenmoer 19 Ianuari 1479