Oisterwijk

Elisabeth dochter wilner Henrics Costers met horen momboer daer toe van hoer ghecoren ende hoer vanden richter ghe ǁ gheven als recht is twelff scillinghe ghelds payments iaerlycs ende erfelycs chyns hoer toe behorende die ǁ welc sy iaerlycs vergelden is op sente Thomaes dagh des appostels uut enen huse ende hove met synre toebe ǁ hoerten Willems gheheyten Luten gheleghen inder vryeheyt van Oesterwyc tusschen der erfenis wilner Mathys ǁ Hoersen op tie een zide ende tusschen der erfenis wilner Pauwels Brouwers optie ander zide ende den welken ǁ chyns Elisabeth voers. in enen wittighen cope ghecreghen heeft teghen Ian zoen wilner Wynric Ereyts ǁ zoen van Venloen ghelyc als dit in Scepenen litteren van Oesterwyc hier op ghemaect volcomeliken ǁ begrepen is heeft sy overghegheven ende opghedraeghen te samen metten voers. Scepenen litteren ǁ met allen horen machten ende begrypen met afgaen ende vertyen als daer toe behoerlyc is Ian Sap ǁ peel ende Ian Wiitmanszoen tot behoef der kerken van Oesterwyc ende heeft gheloeft ǁ Elisabeth met horen momboer voers. op hoer ende op hoer goet dit overgheven opdraeghen afgaen ende verteyen ǁ voers. Ian ende Wijtman tot behoef der voers. kerken euweliken ghestendich en vast te houden ende allen commer van ǁ horen weghen daer af te doen orconde hebben hier over gheweest Scepenen in Oesterwyc Ian van den ǁ Eynde ende Iacob van Ele Aert Houtappels zoen die hoer zeghelen in ghetughenisse hier aen hebben ghehanghen ǁ int iaer ons heren dusent vierhondert ende dertyen der dynsdaghs na den heylighen paeschdach

Dorsale aantekening:

Xij scillinghe op Willem Luyten ǁ huis by die liinde ǁ nu Ian Noots hoffstat