Oisterwijk

Wij bourgermeesteren scepenen gesworen kerckmeesteren heilich geestmeesteren ende gemeijnen ingesetenen ende naebueren der steden van Helmont ende Eijndoven ende der vrijheijden van Sunte Oedenrode, Oirle, ǁ Oesterwijck off Oirschot ende Hildwarenbeeck doen condt allen luijden dat overmits de groete swaere lasten die wij te dragen hebben ende die groote sculden ende tachterheijden daer inne wij gecomen ǁ ende gevallen sijn overmits diverse voirledene ǁ oirlogen die wij hebben moeten sustineren tegen dlant van Gelre waer aff wij uuijterste frontieren sijn boven die ordinaris ende extraordinaris beden behalven oick die onverwinclijcke scaden van brande, brantscattinge, roove, gevenckenisse ende ǁ uuijtteringe, ons bijden voirs. vianden in voirleden tijden ende besundere nu onlancx geleden bijden Franchoisen hoope, daer aff Marten van Rossem is conducteur geweest aengedaen dat ons nijet moigelijc en is meerder noch vorder last te dragen noch ǁ oick eenige penningen te vijndene ende op te brengene tot defensie van onsen quartiere ende resistencie der vianden waer toe wij ende die stadt van sHertoigenbosch nootelijcken moeten onderhouden diverse knechten ende luijden van orloigen ofte anderssins souden vanden ǁ vianden gebrant geroest ende theenen mael overlopen ende bedorven wordden, Dewelcke alle maenden moeten bij ons ende der voirs. stat van sHertoigenbosch voire dexpiracie van elcker maent precise betaelt wordden oft anderssins bij gebreke van dien ǁ souden die plaetsen aldaer sij geordineert sijn te liggende tot resistencie vanden vianden abondonneren vanden frontieren vertrecken ende comen logeren ende garden opten armen huijsman tot dobbelen scade ende achterdele van ons welcke betalinge wij tot noch ǁ toe bij ontleninge ende anderssins met grooten commere ende moeijte hebben moeten doen bij fijnancien deselve penningen op te brengene ende verstaene voir den toecomende tijt nijet en souden kunnen vervallen noch eenige penningen daertoe opbrengen ten ware ǁ bij financien oft vercope van losrenten etc. wij inden name van ons ende oick inden namen van wegen ende bij consente allen der anderen vrijheijden ende dorpen inden meijerien voirs. gelegen uuijt crachte van sekere brieven van octroije ons ǁ ende den voirs. anderen vrijheijden ende dorpen der selver meijerien tot sgeens hier nae volcht onlancx verleent, Daer aff den cennere inden copien hier aen onder onse segelen getranssigeert vande wordde te worde is begrepen wittelic ende ǁ wel hebben vercoft ende oic midts desen bekennen vercoft te hebben Matijssen soon wilneer Lamberts Stoeters tot sijnder tochten ende den erfgenamen van wijlen Margrieten dochter wilneer Lamberts die Wolf bijden selven Lambrechten ende ǁ Katharine sijnder huijsvrouwen dochter wilneer Jans Wijtmer tsaemen verwerct, ten erfrecht den jaerlicke ende erffelijcke renthe van achtien gouden Carolus gulden twintich silveren penningen stuvers geheijten, nu gevalueert sijnde ofte die ǁ werde daer voir in anderen goeden gelde ofte paijmenten voir elcken der gouden Karolus gulden voirs. te rekenen ende vijfthien der gelijcke stuvers om ende voir een sekere somme van penningen die Mathijs voirs. daer voir ons ende den voirs. ǁ anderen vrijheijden ende dorpen veel vergouden ende betaelt heeft ende die voirts tot behoeff als voir is uuijtgereijct ende bekeert welcke achtien gouden Carolus gulden ende vijftien stuvers erfrente voirs. wij inden name als voir hebben ǁ gelooft ende mits desen brieve geloven in goeder trouwen te geldene ende te betalene den voirs. Mathijssen ende erfgenamen voirs. sijnen oiren erfven ende naecoemelingen in wat staet habijt oft wesen hij of sij wesen sullen oft hueren sekeren ǁ bode, brenger van desen brieven oft vanden transscrift besegelt met eenen segel auctenctijcke alle jaer inden hoichtide van Pinxten of binnen ses weken altijts daer nae, ombegrepen, Daer aff den ijersten termijn van betalinge sal wesen ǁ inden hoich tide van Pinxten int jaer vijfthienhondert vier ende veertich met sulckene condicien ende voirwarden waert dat wij ofte die voirs. ander vrijheiden ende dorpen oft eenige van ons oft van hen den voirs. Mathijssen ende den erfgenamen ǁ voirs. oft hennen oiren erfven ende naecoemelingen oft hueren sekeren bode brenger van desen brieven oft vanden transscift besegelt als voir hier aff alle jaer tot elcken termine voirs. volcomelic nijet en betaelden soe moigen die voirs. Mathijs ǁ ofte die erfgenamen voirs. hen oiren erfven ende naecoemelingen oft heuren sekeren bode als voire die voirs. sess weken geleden sijnde vertheren op ons ende op die voirs. anderen vrijheiden ende dorpen der meijerien voirs. elcx daichs als op ǁ elcken gouden Carolus gulden voirs. daer aff dat men in gebreke waer van betalene eenen grooten Brabants sonder mindernisse der principaelder erfrenten voirs. welcke coste ende there ende alle alle andere costen van vervolge daeromme gedaen ǁ wij inden name als voir hebben geloeft ende geloven in goeder trouwen te geldene ende te betalene gelijc den principalen voirs. den voirs. Mathijssen ende de erfgenamen ǁ voirs. heuren oiren erven ende naecoemelingen oft heuren sekeren bode als voir tot heuren simpelen seggen sonder eedt oft andere proeve daerom te dorven doene oft bij ons daer tegens eenich geweer gesocht te wordene in eeniger manieren, Gelovende voirts oft desen tegenwoirdigen brieff mits brande ǁ oft anderen ongevalle vernijelt gestolen oft verloren wordde, dat wij dan den voirs. Mathijssen ende den erfgenamen voirs. tot heuren costen sullen geven eenen anderen brieff besegelt metten selven segelen daer mede desen tegenwoirdige ǁ brieff is besegelt nae den transscrift binnen eender maent naedien dat wij des versocht sullen wesen van hueren wegen, Behoudelijcken dat wij inden name als voire die voirs. erfrente van achtien guldene vijftien stuvers ǁ tallen tijden alst ons gelieven sal sullen mogen lossen ende afquijten als elc der voirs. Carolus gulden met sestien gelijcke Carolus guldene ofte die werde daer voir in anderen gevalueerden gelde te wetene te gevene inden lossing ǁ voirs. den gouden Koervorster gulden goet van gewichte tot acht ende twintich silveren penningen stuvers, genoempt den gouden Philips gulden tot vijf ende twintich stuvers tdobbel vuerijseren tot twe stuvers ende een oirt stuvers ende ǁ anders gevalueert gelt nae advenan dierre valuatien, Ende metten rente vanden jaer der lossinge altijt die te moigen geven nae belope ende advenante vanden tijde, Ende metten achterstellen ofter eenige tachter stonde, Ende om allen ǁ die voirs. voirwarden ende geloeften inder manieren boven verclaert wael ende getrouwelic te houden ende te voldoene hebben wij daer voir verbonden ende verbijnden ons selven onse oir ende onse naecoemelingen ende allen ingeseten der voirs. ǁ meijerien ende alle onse ende der voirs. steden vrijheiden ende dorpen der selver meijerien ende der innegesetenen der selver gueden ruerende ende onruerende hoedanich die sijn oft wesen moigen waer die gelegen sijn oft bevonden sullen moigen worden ǁ Ende verthijen oic op allen exceptien van bedriechenisse ende subtijlen vonden van gedinge van tijde steden ende van personen van munten nijet gehadt nijet getelt oft nijet ontsaen ende alsoe dat wij nijet seggen en moigen in eenigen toecomende ǁ tijde die penningen die wij ontsaen hebben om die voirs. erfrente sij en sijn bekeert als boven, Ende voirts op allen privilegien van crusen gegeven oft te geven alle anderen previlegien ende brieven vanden paeus van Romen van sijnen legaten van onsen alder ǁ genedichsten heeren den Keijsere oft van eenigen anderen Prinche, wije dat zij ende oick alre rechten hulpe ende remedien geestelijc ende werlijc, Ende speciale oic verthien der exceptien dat men seeght dat gemeijn verthijenisse nijet en diedt ǁ ten sij dat spectael voirgaet alre heeren ende richteren hulpe geestelijc ende werlijc ende gnalice ende specialic allet gheen dat ons helpen mochte ende den voirs. Mathijssen ende den erfgenamen hennen oiren erfven ende naecoemelingen ǁ oft heuren sekeren bode als voir letten oft deren in eeniger manieren tegens dinhouden van desen brieve, oft tegen eenige voirwarden ende geloeften daer inne begrepen, Ende noch tot meerdere vastiche ende verseberinge van des voirs. is ende ǁ elcx besunders hebben wij noch inden name ende van wegen als voir geloeft ende geloven midts desen dat wij in egheene toecomende tijde en sullen doen oft laten doen noch gedoigen gedaen te wordene eenige reductie vanden voirs. rente hoger ǁ dan den penninc sestien soe die gecocht is noch oic en sullen wij tegens die jaerlicxe betalinge der selver renten om oirloichs oft om eeenigen anderen saken wille impetreren doen oft laten impetreren bij ons selven oft bij ijemanden anders ǁ eenige brieve van respite van state quinquernellen noch andere daer mede die selve betalinge eenichsins soude moigen wordden gescorst oft vertoigen, Ende oft wij oic eenige brieven van respijte oft state vercregene dat wij ons daer ǁ mede nijet en sullen moigen behelpen, Biddende voirts allen geestelijcke ende werlijcken heeren ende richteren ende sunderlinge onsen alder genedichsten heer ende prince nu sijnde ende naemaels wesende dat sij in wat steden oft plaetsen wij ǁ ofte die ingesetenen der voirs. meijerien ofte onse ofte huere gueden bevonden sullen mogen worden ons ende die bedwingen opdat wij in eenigen gebreke gevonden wordden van des voirs. staet allen der voirs. voirwarden ende geloeften ǁ ende elc besundere vast ende gestentich te houden ende te doen houden sonder verdragen ende wederseggen, In kennisse der waerheijt ende vasticheijt des voirseecht is, Soe hebben wij bourgermeesteren scepenen geswoirenen ende gemeijnen ingesetenen ǁ der steden van Helmont ende Eijndoven voirs. metten selven steden segelen, Ende wij bourgermeesteren scepenen gesworen kercmeesteren heilichgeestmeesteren ende gemeijnen naebueren der vrijheijden van St. Oedenrode, Oirle, Oesterwijc ǁ off Oirschot ende Hildwarenbeec metter selver vrijheiden segelen inden name van ons ende van allen den anderen vrijheiden ende dorpen deser voirs. meijerien desen brieff besegelt. Gegeven opten seven ende twintichsten dach der ǁ maent van Meije int jaer ons Heeren duijsent vijfhondert drie ende veertich

Dorsale aantekening:

Mathijs soun Lamberts Stoeters cum suis ǁ van XVIII gulden XV stuvers bij Mathijss. ǁ Stoters bekent