Oisterwijk

Wouter Thomaes Wouterss. ende Jan Andries Lambrechss. als meesteren ende provisoeren der fabrycken ǁ der kercken van Oesterwyck met consente vanden persoen scouthen ende scepenen tot Oesterwyck hebben ǁ geloeft als principael sculderen meester Jannen Lombaerts tot behoeff van Jueten dochter wilner ǁ Aert Appels dat die kerckmeesteren van Oisterwijck ter tyt wesende gelden ende betaelen zullen ǁ der selver Jueten eenen jaerlycken ende erffelycken chyns van drie ende eenen halven rynsguldene ǁ van tweyntich stuveren tstuck in paeymente als then termynen van der betaelingh inder stadt ǁ van den Bosch gemeynlyck ter boersen gaen sal allen jaer erffelyck op Sunt Jacobs dach Apostel ǁ inden zoemer uuyt ende van der helft in eenre hoeven der voers. fabrycken toebehoerende met ǁ allen ende eenen yegelycken hueren toebehoerten gelegen in der prochie van Oisterwyck ter steden ǁ geheyten Inden Mortel waer aff dander helft toebehoert der taefelen des heylichsgeests ǁ inder kercken voers. als zy seden. Ende hebben voerts geloeft Wouter ende Jan als meesteren ǁ ende provisoeren voers. optie verbyntenisse van allen den gueden der voers. fabrycken toebehoerende ǁ die sy nu heeft ende naemaels hebben ende vercrygen sal moegen dese drie ende eenen halven ǁ rynsgulden erfchyns Jueten voers. te waeren alsmen erfchyns sculdich is te waeren, ende ǁ dit onderpant voer die betaelinge van den voers. erfchyns daer jaerlycx uuyt te vergelden ǁ als voers. is altyt goet genoch waeldoegende te maecken ende zeker genoch behoudelyck dat ǁ die kerckmeesteren van Oisterwyck ter tyt wesende desen erfchyns altyt selen moegen lossen ende ǁ quyten met tseventich, gelycke rynsguldens in penningen nu gevalueert zijnde metten jaerchyns ǁ en metten achterstelle daer aff ofter daer ennigen onbetaelt stond. Met voirwaerden toegedaen ǁ dat zyt zullen sculdich zyn een halff jaer te voeren opte seggen. Orconden hebben hier ǁ oever geweest Scepenen in Oisterwyck Jacob Henrick Emmen soen ende Jan die Clerck Engbrechtss. ǁ die hueren segelen in getuygenissen hier aen hebben gehangen int jaer onss heeren duysent vyfhondert ǁ ende achtien veerthien daighen inden meerte

Dorsale aantekening:

Juet dochter wilner Aert Appels [***] ǁ VIII ..... in Oisterwyck

II ½ gulden aende fabrijck der kercke van oesterwijck verschijnende op sinte jacops dach [***]