Moergestel

Wij Jan Gerit Dirckss. ende Melis Reymboutss. scepenen in Gestel bij Oesterwyck tuygen onder ǁ onsen gemeynen zegel dat voer ons comen is Jan Ariaenss. van Boerden ende heeft geloeft ǁ Jannen Ansemss. vijftien carolus gulden te tweyntich stuyvers tstuck tsiaers erffgels allen jaer ǁ op lichtmissen dach te gelden ende te betalen te heffen ende te boeren uuyt huys scuer hoff ǁ ende erffenisse daer aen gelegen te weten die ronde stede soe groot ende cleyn als sij daer ǁ gelegen is inder parochien van Gestel metter eenre sijde beneven die Caterstraet metter ǁ andere sijden neven erffenisse Corsten Jan Corstiaens. met meer andere metten eenen eynde beneven ǁ erffenisse Gosen Embrechss. met meer andere metten anderen eynde neven erffenisse Lambrecht ǁ Peter Ghijsenz. noch uuyt een vierdeel van twee gedeelten in die hoge weye die ǁ heele weye gelegen metter eenre sijde neven erffenisse Ghijsbrecht van Elder metter andere ǁ sijden neven erffenisse des convents van sinter Claeren binnen der stadt van tsHertogenbosch met ǁ meer andere ende oeck metten eenen eynde metten anderen eynde neven erffenisse Art Staets ǁ met meer andere noch uuyt een halff buender heyen gelegen opt Goer metter eenre ǁ sijden aen erve den erffgenamen Antonis Brievincxs metter andere sijde neven erve Willem ǁ Diecort met meer andere ende oeck metten eenen eynde, dander eynde aen die gemeynte ǁ van Oesterwijck ende Jan voers. heeft voert geloeft op hem ende op allen sijne gueden die ǁ hij nu heeft ende naemaels hebben ende vercrijgen sal moegen dese erven te weren ende ǁ altijt goet zeker ende waeldogende te maken als voer dese vijftien carolus gulden tsiaers ǁ erffgels voors. waer aff den iersten betaeldach sal sijn van nu lichtmisse naestcomende ǁ over een jaer gegeven int jaer ons Heeren geboerte duysent vijffhondert ende vijffendertich ǁ opten drientweyntichste dach in decembri

Dorsale aantekening:

Linkermarge:

Bevonnist XIe decembris 1589 ǁ Alnoch bevonnist XXXe Octobris 1591 ǁ Alnoch be[v]onnist XVII Aprilis 1600 ǁ Alnoch bevonnist ǁ 23 februaryis 1604 ǁ Alnoch [be]vonnist ǁ X^e novembris 16 = 01

Cornelis zoon wilner Jans van Grevebroeck heeft openbairlijck bekent ende bekent bij dese ǁ dat Mathijs zoon wilner Anthonis van Esc[h] als momboor vande onmundigen kijnder wilner ǁ Henricx Anthonis van Esch opte ix karolus gullden siaers, die wijlen Henricx voors. te gelden ǁ plach inde xv karolus gullden siaers int witte van desen brieve begrepen, aen hem ǁ Cornelisen voorgenoemd heeft affgelost ende gequeten drye karolus gulden siaers die hem Cornelisen opgedragen ende getransporteert zijn bij wijlen Goiaerdt Gijsberts van Elderen ǁ zoo dat die selve Cornelis van Grevenbroeck opten voors. onmundigen kynderen ende ǁ zijne goeder nyet meer jairlycxen blyft heffen dan sesseste gullden siaers, Allen ǁ zonder argelist, Actum opten XXIIII^en february anno 1592, voor Christianen Jansse ǁ van Brecht ende Adriaenen Geerardt Adriaensse als schepenen in Gestell

by Oesterwijck, Ende van mij der zelver schepenen gezwoiren ǁ clercq, Quod attestor etc ǁ P Berijsz secretario