Oisterwijk

Wij schepenen gesworen raedtsluyden kerckmeesteren heyligeestmeesteren, ende voirts allen die gemeyn naegebueren ende ingesetenen der vrijheijt van Oisterwijck ǁ doen condt eenen yegelijcken die dese onse brieven sullen horen dat wij met goeden rypen voirraede ende deliberatie daertoe met openbaren sondaeghs ǁ kerckgebodt vergadert wesende om deswille wij in dese jegewoordigen oirloghe van Gelre daer wy Godt betert tegentwordelijck in sijn, zekere groote sommen ǁ van penningen in handen vande gedeputeerden der stadt ende meijerijen van Shertogenbosche opbrengen ende betalen moeten, welcke voirs. penningen wij onder malcanderen ǁ beedsgewijse nyet ende comen gevynden noch betalen, ende om deselve penningen te serveren ende te crygen hebben wy wittelijck ende erffelijcken vercocht Lauwreijsen soen wilner Jan ǁ Groeijs een jaerlijcke ende erffelijcke losrente van sesse carolus gulden of die rechte weirde daer voir in anderen goeden gevalueerden gelde nu gevalueert wesende te vergelden ene jaer ǁ erffelijck inden hoochtijde van Sint Jan Baptisten inden somer, ende inder stadt vanden Bosch voirs. wy ende loss opten wissel, off in sijnen synen oiren erven oft nacomelingen handen of then huijse van ǁ synre woenstede te leveren op onsen cost last ende avontuere van allen lasten beden schaden ende settingen vander voir. vryheyt wegen hoedanich die wesen mochten dwelcke losrente voirs. ǁ wy bekennen datse Lauwereyns voirs. wael ende wettelijck gecocht heeft tegen ons met sijnen gereden penningen ende welcke pennningen wy bekennen dat wy vande voirs. Lauwereynss. gebuert ende ǁ ontfangen hebben ende die voirts behiert hebben int gemeyn proffyt van onser vryheyt van Oisterwyck voirs., ende welcke lossrente voirs. wy allen gesamenderhant inden name van ǁ ons selven ende vander gemeynder vryheijt voirs. wegen ende elck van ons voir all geloift hebben als pricipael schulderen in goeder trouwen te gelden ende te betalen Lauwereynsen voirs. ǁ synen oiren erven ende nacomelingen nae hem oft synen sekeren bode brengere van desen brieve oft vande copyen amtenlycke in manieren voirs. Ende hier voir hebben wy verbonden ende ǁ verbynden ons, onse oiren erven ende nacomelingen ende elck voir all alle onse gueden, ende voirts allen de gueden van onsen oiren erven ende nacomelingen hoe ende waer die ǁ gelegen syn die wy nu hebben ende naemaels hebben ende vercrygen mogen Ende weert saecke dat wy waeren in ennigen gebreecke der betalingen vander losrenten voirs. in ennigen toecomende ǁ thijde ende de voirs. Lauwereyns syn oiren erven ende nacomelingen nae hem oft syn sekere bode brengere van desen brieve oft vande copije als voirs. is dat aen die schepenen van ǁ Oisterwijck ten tyde wesende oft aen ennige der selver oft sijner woenstadt versocht hadden willen wy ende consenteren dat zy alsdan een maent geleden nae elcken ǁ termyne gevallen ende nae die maninge inder manieren voirs. gedaen sal wesen sal mogen vertenen op ons ende onse voirs. vryheijt elcks daeghs dat wy in gebreke der betalinghen ǁ wesen vier stuvers, welcke vier stuvers van thenen wy hem geloist hebben ende geloven te betalen sonder die principale rente iet te verminderen Ende hebben voirts vertegen ende ǁ verthyen voir ons onse oiren erven ende nacomelingen van allen vryheden van previlegien, poirteryen Sinte Petersmanschappen jaermerckten weeckmerckte respijtbrieven quinkernellen ǁ ende voirts der exceptien datmen seeght dat gemeijn verthijenisse nijet en doet Ende voirts allen anderen defensien ende beschuddingen hoedanich die wesen mochten geestelijcken ende ǁ weirlijcken die ons in desen souden mogen helpen ende den voirs. Lauwreynsen letten oft deren in ennige manieren tegen dese letteren oft tegen ennigen vande voirwaerden ende geloeften die ǁ in desen l(ett)eren beschreven staen ende om Lauwereijnsen voirs. synen oiren erven ende nacomelingen nae hem alle dese punten ende voirwaerden in desen letteren begrepen te voldoenen. ǁ Soe bidden wy allen heeren ende richteren amptluijden ende gerithstsboden geestelijcken ende weirlijcken dat in dyen wy in gebreke van desen in toecomende thijden bevonden mochten ǁ wordden, ende wij ende onse nacomelingen nae ons inder manieren voirs. nyet ende betaelden nae dyen die teremynen van betalingen een maent leden gevallen sullen wesen ende sij inder ǁ manieren voirs. gemaent sullen hebben dat sij ons daernae binnen een maent tijts sullen commeren ende arresteren onse lijven ende gueden ende onse nacomelingen lyven ende ǁ gueden gereede ende ongerede ende ende elcken van ons voir principael hooftschulde tot wat plaetsen ende steden het zy te water ende te lande sy bevonden sullen wordden ǁ totter tijt toe wij hem die principael gevallen rente tsamen met allen cost van recht daerop gedaen vermiecht sullen hebben, behoudelijcken dyen dat wij ende onse ǁ nacomelingen dese voir. losrente altijt sullen mogen lossen ende affquijten tsamen metter somme van hondert der gelycke karolus guldens oft de rechte werde daer ǁ voir in anderen goeden gevalueerden gelde, te wetene met gouden oeverlenschen gevalueerde rijnsguldene van gewichte wesende tstuck voir achtentwintich stuvers ǁ met gouden ph(ilip)us guldene van gewichte tstuck voor vijffentwintich stuvers met dobbelen vueijrijssers tstuck voir twee stuvers ende een oirt met dobbelen stuvers stuck ǁ tot twee stuvers gerekent, Ende met allen anderen goeden gevalueerden gelde nu gevalueert wesende nae advenant Ende metter jaerrenten alsmen die lossen ǁ ende affquyten sall ende metten achterstelle daeraff ofter dan ennige ombetaelt stonde met voirwaerden toegedaen dat wy schuldich sullen syn die lossinge een halff jaer ǁ aen Lauwereysen voirs. oft synen nacomelingen oft tot synen huijse ende woenstede te voiren op te seggen eer wij die lossinge sullen mogen doen, Ende oft gebuerden ǁ dat Godt verhueden moet dat dese jegewoirdige letteren in ennigen toecomende tijden gestolen geschoert oft verbrant wordden Soe geloven wy den voirs. Laureijss synen ǁ oiren erven ende nacomelingen nae hem nae dyen wy des van synen wegen versocht sullen wordden binnen eenen maent daernaae wederom een anderen gelijcke letteren te besegelen ǁ ende te verlenen nader copijen oft transscrift van desen op sijnen cost Allet sonder droch ende argeliste, Des toirconden hebben wy schepenen gesworenen, raedtsluijden kerckmeesters ǁ heijligeestmeesteren ende gemeyn gebueren der vryheijt van Oisterwijck voirs. den gemeynen segel onser voirs. vryheijt by onder alre consent ende wetentheyt aen desen tegenwor ǁ digen letteren doen hangen Int jaer ons heeren duysent vijffhondert acht ende twintich opten iersten dach der maent van julio //.

linkdermarge:

1 julij ǁ 1528 ǁ 100- 0- 0 ǁ Oosterwijk ǁ nr-44. ǁ Gecopieert ǁ 1/3 26 ǁ W. Heurn

Dorsale aantekening:

Constitutie brief van sess gulden ǁ te vergelden ten laste der vrijheijt ǁ van Oisterwijck

Constitutie brief ǁ van hondert guldens ǁ capitael voor jonker Mattias ǁ van Cannart tot laste ǁ van Oisterwijck

[***] intresse [***] ǁ consenterende [***] ǁ in de cassatie [***] ǁ mogte [***] ǁ Oisterwijk [***] ǁ 1773 M. van Cannart