's-Hertogenbosch

Michiel Willem Deckers, woonende tot Huijckelem onder de vrijheijt van Oisterwijck, heeft ǁ wittelijck, ende erffelick vercocht d'heer Livinus van Dun, licentiaet inden Rechten, tot behoeff van Jouffrouwe Johanna de Roij, weduwe van ǁ zaliger d'heer ende Mr. Adriaen Comans, in sijnen leven oock licentiaet inden Rechten, ende Schouteth des quartiers van Oisterwijck, eenen jaerlicken ǁ ende erffelicken chijns van van twelff Carolus gulden, tot twintich stuijvers goets ganckbaers gelts elcken gulden gerekent, te betaelen alle ǁ jaer erffelick opten sesten dach der maendt van Julio, ende voorden iersten termijn van betaelinge opten sesten Julij anno xvic vijffenvijfftich, ǁ ende binnen dese stadt vrij van allen beden, exactien, subventien, commeren, schattingen, ende lasten, ingestelt, ende noch naermaels ingestelt ǁ te worden, egeene lasten uijtgescheijden te leveren, ende te vergelden, van, ende uijt t'vierdepart hem competerende in eene aenstede, ǁ ende toebehoorende erffenissen, in alder grootten, vuegen, ende manieren de selve gelegen is inde voors. vrijheijt van Oisterwijck, onder ǁ Huijckelem, ter plaetse genoempt in de Hoeven, soo hem tselve aengecomen was eensdeels mits afflijvicheijt van Jacob Bartholomeeuss., ǁ sijnder huijsvrouwe vader, ende anderssints bij coop van Adam Willem Deckers sijnen broeder, soo hij verclaerde, vande selve Jouffrouwe Johanna ǁ metten erffrecht te hebben, ende te besitten, Ende heeft die voorn. vercoopere den voors. chijns den voorn. heere licentiaet van Dun tot ǁ behoeff der voors. Jouffrouwe Johanna opgedraegen met helmelinge verthijdenisse in manieren inne dien gewoonlick sijnde, gelovende ǁ die voors. vercooper, als schuldenaer principael, op verbant van sijnen persoon, ende allen sijne goederen, present, ende toecomende, ǁ dat hij de voorn. Jouffrouwe Johanna vanden voors. chijns schuldige, ende gerechte sal doen warantschappe, Ende dat hij allen anderen commer, ǁ calaengie, ende aentael inden voors. onderpande wesende, oft comende, die selve Jouffrouwe Johanna aff sal doen geheelijcken, uijt ǁ genomen eenen erffelicken pacht van ses loopen roggen aende taeffele vanden Heijligengeest tot Oisterwijck, Ierst jaerlicx ǁ van rechts wegen daeruijt te vergelden staende, soo hij seeghde, ende dat hij oock den voorn. onderpande voorde betaelinge des voors. ǁ chijns, de gemelte Jouffrouwe Johanna jaerlicx daeruijt als voor te vergelden, altijt goet genoch, ende weldeugende sal maecken, ende ǁ houden, met conditien inne desen toegedaen, dat die voors. vercooper den voorn. chijns sal mogen lossen, ende quijten tot allen tijden teffens, ǁ ende ten eenenmaele mette somme van tweehondert Carolus gulden, tot twintich stuijvers goets permissie gelts elcken gulden ǁ gerekent, ende metten loopenden jaerchijns, ende achterstellen daeraff alsdan tachter, ende ombetaelt staende, Behoudelijck dat men den ǁ voors. los schuldich, ende verbonden sal wesen een halff jaer te voorens wittelick te vercondigen, ende op te seggen, Getuijgen waeren hierover ǁ Schepenen inne Shertogenbossche, Justus Versterre, ende Pieter Schuijl, Gegeven den sesten dach der maendt van Julio, int jaer ǁ ons Heeren, duijsent sesshondert vierenevijfftich

Littera domicella Johanna de Roi