Baarle-Nassau

Wij Geerit Abrahams sone de Vrijtere, ende Adriaen Huijbrechts sone van Reuthe schepenen in Baerle onder onsen heere  ǁ van Nassauw, oirconden dat voor ons quam Jacop Peeter Henrick Swilden sone, kende ende lijde schuldich te sijn jaerlijcx  ǁ te gelden en de vuijt te reijcken Marien van Hove wedue wijlen meester Adriaen van Ghilse, ende dingnen heur ende  ǁ desselven van Ghilse dochter vijfthien karolus gulden twelf stuijvers ende twee oort elcken karolus gulden tot  ǁ veertich grooten vleems tsiaers erfchijns, Te gelden ende te betalen alle jaer op Onser Liever Vrouwen dach Lichǁmisse, daer af d ierste verschijndach is geweest te lichtmisse nu lestleden in desen jaere XVI^C ende seventhien, ǁ vuijt ende op sijn stede ende erffenisse met heure toebehoorte ende buijten erve daer aen liggende houdende  ǁ omtrent een half buijnder, gestaen ende gelegen tot Baerle te Nijhoven, oostwaert aen sijne furst generael van  ǁ Oraengien erve suijtwaert aen Cornelis Cheeuws alias Ruijter Ghijs erfgenamen erve, westwaert aen  ǁ Laureijs Geerit Borchmans erve ende noortwaert aende gebuerstrate, Item noch vuijt ende op een parcheel  ǁ lants off erfs.groot omtrent een buijnder, gelegen daer omtrent, oostwaert ende noortwaert aen Jan Jacops  ǁ van Bedaf erve, suijtwaert aen Adriaen Peeter Henrick Swilden ende Laureijs Geerit Burchmans erven ende  ǁ westwaert aen des voors. Jacop Peeter Henrick Swilden erve. Item noch vuijt ende op een parcheel lants groot  ǁ omtrent een half buijnder gelegen oock daer omtrent, oostwaert aen des voors. Jacop Peeter Henrick Swilden erve ǁ suijtwaert aenden ackerwech westwaert aen meester Adriaen Ians Verlier erve ende noortwaert aen Peeter  ǁ Adriaen Martens erve, Ende noch vuijt ende op een parcheel lants groot omtrent hondert roeden gelegen oick  ǁ daer omtrent, oostwaert aen Jacop Peeter Henrick Swilden erve, suijtwaert aen meester Adriaen Ians alias  ǁ Verlier erve, ende westwaert ende noortwaert aen des voors. Jacop Peeter Henrick Swilden erve te  ǁ vrijen ende te waeren de onderpanden voors., met elf loopen rogs tsiaers, Den weeskinderen van Adriaen Cornelis  ǁ Scherders, Ende metten gerechten heeren chijns daer jaerlijcx voor vuijtgaende sonder eenigen anderen commer, ǁ ende voorts gelooffde de voorgenoemde Jacop de onderpanden voors. altijts goet genoch te houden ende te maecken  ǁ voor de voors. vijfthien karolus gulden twelf stuijvers ende twee oort erfchijns met alle sijne andere goeden rueǁrende ende onruerende tegenwoordige ende toecomende die hij daer voor oock generalijck verbint midts desen  ǁ met voorwaerde dat men de voors. vijfthien karolus gulden twelf stuijvers ende twee oort tsiaers altijt lossen  ǁ ende afquijten sal moegen, met tweehondert ende vijftich karolus gulden tstuck tot veertich grooten vleems  ǁ eens te geven opten verschijndach voors., ende metten verschenen chijnsen Ende dien achtervolgende is ǁ meester Henrick van Ghilse inden naeme en de tot behoef van de voors. Marien ende heur dochter inde  ǁ vijfthien karolus gulden twelf stuijvers ende twee oort tsiaers erfchijns voors. gevest ende toegedaen met  ǁ vonnis ende met recht soo datse hen seker sijn ende vast, met voorwaerde dat sij hieraf doen sullen alle gebuerlijck  ǁ recht. In oirconden desen brieve met onse segelen besegelt int jaer ons heeren duijsent seshondert ende  ǁ seventhien vientwintich dage in novembri.  ǁ F.A. Dirven ǁ

In dorso:

Maria van Hove ǁ met heure dochter ǁ Een rente van -- 15 gulden 12 ½ ǁ