's-Hertogenbosch

Dierick Geerartssen vanden Wiel, wonende tot Oisterwyck, heeft wittelick ende erffelick vercoft ende vercoopt mits desen ǁ Huijbrechten Adamssen van Buedel, als man ende momber van Anna van Casteren sijne huijsvrouwe, eenen jaerlicken ende erffelicken chijns van ǁ elff Carolus gulden, den gulden tot twintich stuvers goets gelts gereeckent, Te betalen alle jaer erffelijck inne den hoochtijde van Alre ǁ Heijligen, ende voor den iersten van betalinghe inne den hoochtijde van Alre Heijligen, anno sesthienhondert ende sevenentwintich, Ende inne Shartogenbosche ǁ vrij van alle beden ons heeren des hertochs, exactien, subventien, soo tienste, twintichste, honderste, alls alle andere meerdere ende mindere penninghen, ǁ commeren, scattingen, ende lasten, ordinarisse, extraordinarisse, innegestelt, ofte bij avontueren naermaels innegestelt te wordene, egeene lasten ǁ uutgesceijden te leveren ende te vergelden, van ende ut eene huijsinge, scuere, henne gronden, hoff, ende boomgaert dijen aenliggende, gestaen ende ǁ gelegen inde vrijheijt van Oisterwijck ontrent de Capelle aldaer, tussen erve Jans Dierixssen vande Hovel aende Oostensijde, ende tussen ǁ erve Cornelis Martens Janssen aende westensijde, streckende met den eenen eijnde op die gemeijn straet, ende met den anderen eynde aen eenen gemeijnen ǁ waterloop genoempt de Vloet ende alnoch van ende uut een stuck ackerlants, groot ontrent vier lopensaeten, gelegen onder de voirs. vrijheijt ǁ ter plaetssen genoemt inde Scijve, tussen erffenisse Huijbrecht Adriaen Toelings aen d'een zijde, ende neffen erve Jans Adriaens Peijnenborchs ǁ aen d'andere zijde, streckende van erve meester Philips Lintermans tot aen erve der taeffele des Heijlichs geests in Oisterwijck, soo hij ǁ verclaerde, vanden selven Huijbrechten coopere metten erffrecht te hebben ende te besitten, Ende heeft die voorn. vercoopere den voors. chijns ǁ den voorn. coopere opgedragen, ende heeft daerop verthegen helmelinge met maniere in dijen gewoonlijck zijnde. Gelovende de voornoemde ǁ vercooper, als schuldenaer principael onder verbant van sijnen persoon ende alle sijne goedens present ende toecomende dat hij den voorn. coopere ǁ vanden voors. chijns schuldige ende gerechte sal doen warantschappe, Ende dat hij allen anderen commer, calangie ende aentael inde ǁ voors. onderpanden wesende off comende denselven coopere aff sal doen geheelick, utgenomen eenen chijns van drije gulden aen Arnden ǁ Wijten wonende in Udenhoudt, ende eenen chijns van dertich stuijvers aen de taeffele des Heijlichs geests tot Oisterwijck, jaerlix ǁ van te voorens ende van rechts wegen uut de voors. onderpanden te vergelden staende, soo hij seeghde, ende dat hij oock de voirs. onderpanden ǁ voor de betalinge des voirs. chijns den voorn. coopere jaerlix daeruut als voir te vergelden, altijt goet genoch ende welduegende sal maken ǁ ende houden. Met conditie toegedaen, dat de voorn. vercoopere desen voors. chijns van elff gulden tot allen tijden sall mogen lossen ende ǁ quijten ten eenenmaele met de somme van tweehondert carolus gulden, tot twintich stuijvers goets permissie gelts bij openbaeren ǁ placcaete vanden Raede van Brabant gepermitteert synde elcken gulden gereeckent, Ende metten jaerchijns ende achter stellen als dan ǁ daervan ten achteren ende onbetaelt staende. Behoudelick dat de voorn. vercooper desen loss een halff jaer te voorens wittelick sall ǁ vercondigen ende opseggen. Getuijgen waeren hierover Scepenen inne Shertogenbossche Albrecht van Bruegel ende Dierck van ǁ Asperen. Gegeven den tweeden dach der maent novembris, int jaer ons heeren duijsent sesshondert sessentwintich

A. van Hees subscripsit Litera emp[***]

Dorsale aantekening:

Den 17 mert 1648 heeft ǁ Lijsken de weduwe van Gerart ǁ Dirck Gerarts vanden Wiel ǁ aen ons gelost diese rente mette somme ǁ van twehondert vijffen ǁ seventich gulden soo voor ǁ capitael als intrest ǁ oirconde deses onderteckent ǁ P.Tholinck

de penninghen ǁ boven verhaelt heeft Wouter ǁ Gossens aen ons getelt actum ǁ als boven ǁ P.Tholink

dit is den brieff van ǁ elf gulden tsiaers woet? ǁ gegeven? van Dierck ǁ Gerits vanden Wiel ǁ tot Osterwyck