Oisterwijk

Wij scepenen, gesworen raetsluden, kerckmeesteren, heiligeestmeesteren En voirts allen die gemeijn gebueren ende ingesetenen der vrijheit van Oesterwijck doen condt eenen ǁ yegelijcken die dese onse brieven sullen sien oft hoeren lesen, dat wij mit goeden [vrije] voirrade ende deliberacie dair toe mit openbaren Sondaechs kerckgebode ǁ vergadert wesende om deswille wij in desen tegenwoirdigen oirloige van Gelre dair wij god betert tegenwoirdelijck inne zijn, Een zekere grote somme van penningen ǁ in handen van den gedeputeerden der stadt ende meijerijen van sHertogenbosch opbrengen ende betalen moeten welck voirs. penningen wij onder malcanderen beedschen ǁ wijze nijet en connen gevijnden noch betalen ende die selve penningen te crijgen ende te [***] hebben wij wittelijcken ende erffelijcken vercoft Jannen soen wijlen ǁ Peters vanden Hoevel borger der stadt van sHertogenbosch een jaerlijcken ende erffelijcken losrente van sess florijnen Rijnsgulden gemeijnlic genoemt twentich ǁ penningen stuvers gemeijnlic genoemt voir elcken Rijnsgulden voirs. gerekent in munte gelijck ten daigen vanden betalingen inder stat van sHertogenbossche ǁ gemeijnlijc ter boersen gaen sall te vergelden allen jair erffelijck op onsen Liever Vrouwen Dach purificatie, Ende inder stat van sHertogenbosch voirs. vrij ende ǁ loss opten wissel oft in zijnen zijnen oiren erven oft nacomelingen handen oft then huijse van zijnre woensteden te leveren op onsen cost last ende avonture ǁ van allen lasten beden scaden ende settingen vander voirs. vrijheit wegen hoedanich die wesen muchten welck losrente voirs. wij bekennen datse Jan voers. ǁ wael ende wittelic gecoft heeft tegen ons mit zijnen gereden penningen, ende welcke penningen wij bekennen dat wij vanden voers. Jannen gebuert ende ontfangen ǁ hebben in munte ende prijze hier naer bescreven, ende die voirts bekeert hebben int gemeijn proffijt van onser vrijh(eit) van Oesterwijck voirs., Ende welcke losrente ǁ voirs. wij allen gesamenderhant inden name van ons selven ende vander gemeijnder vrijheit voers. wegen ende elck van ons voir all geloeft hebben als principaell ǁ sculderen in goeder trouwen te gelden ende te betalen Jannen voers. zijnen oiren erven ende nacomelingen nae hem oft zijnen zekeren bode brenger van desen brieve ǁ oft vander copijen autentijcke in manieren voers., Ende hier voir hebben wij verbonden ende verbijnden ons onse oiren erven ende nacomelingen ende elcken voer ǁ all allen onse gueden, ende voirts allen die gueden van onsen oiren erven ende nacomelingen, hoe ende waer die gelegen zijn, die wij nu hebben ende namaels ǁ hebben ende vercrijgen moigen, Ende weert sake, dat wij waren in eningen gebrek der betalingen vander losrenten voers. in eningen toecomende tijde ende ǁ die voirs. Jan zijn oir erven ende nacomelingen nae hem oft zijne zekere bode brengere van desen brieven oft vanden copijen als voers. is, dat aen die ǁ scepenen van Oesterwijck ten tijde wesende oft eninge der selver oft aen hoer woenstede versocht hedden, willen wij ende consenteren dat zij alsdan een maent ǁ geleden nae elcken termijn gevallen, ende nae die maninge inder manieren voers. gedaen sall wesen sal moigen vertheren op ons ende onze voers. vrijheijt ǁ elcks sdaigs dat wij in gebreke der betalingen weren vier stuvers welck vier stuvers van thert wij hem geloeft hebben ende geloven te betalen ǁ sonder die principael rente ijet te verminderen, Ende hebben voirts vertegen ende verthijen voir ons onse oiren erven ende nacomelingen van allen vrijheit ǁ van previlegien poirterijen sunte Peters manscappen jaermerckten weeckmercten respijtbrieven quinkernellen, Ende voirts der exceptien dat men ǁ seeght dat gemeijn verthijenisse niet en dijedt, Ende voirts allen anderen defensien ende bescuddingen hoedanich die wesen muchten geestelijcken ǁ ende weerlijcken die ons in desen zouden moigen helpen, ende den voers. Jannen [***] oft deren in eninger manieren tegen dese letteren oft teghen ǁ eninge vanden vorwairden ende geloeften die in desen letteren bescreven staen, Ende die Jannen voers. zijnen oiren erven ende nacomelingen nae hem allen dese ǁ punten ende vorwairden in desen letteren begrepen te voldoen, Soe bidden wij [***] richteren ampluijden ende gerichtsboden geestelijcken ende ǁ weerlijcken dat in dien wij in gebreke van desen in toecomenden tijden bevonden [***] orden ende wij ende onse nacomelingen nae ons inder manijeren ǁ voirs. nijet en betaelden nae dien die termijnen van betalingen een maent [***] sullen wesen, ende zij inder manieren voirs. gemaent sullen ǁ hebben dat zij ons dan nae bijnnen eenre maent tijts zullen commeren ende [***] onse lijve ende gueden ende onsen nacomelingen lijven ende gueden ǁ gerede ende ongerede, ende elcken van ons voir principael hoeft sculde tot wat plaetsen ende steden het zij te water oft te lande, zij bevonden ǁ zullen worden, totter tijt toe wij hem die principael gevallen rente [***] cost van recht dair op gedaen vernueght sullen hebben ǁ behoudelijcken dien dat wij ende onse nacomelingen dese voers. losrente altijt sullen moeten lossen ende afquijten tsamen mitter sommen van hondert ende ǁ twee Rijnsguldene tweijntich stuvers oft die rechte werde dair voir in anderen paijements voir elcken Rijnsgulden voers. gerekent, Ende dat in ǁ penningen ende munte als hier nae volgen, te wetene mit gouden [***] [van] gewicht gevalueert zijnde tstuck tot achtentweijntich ǁ stuvers mit gouden Ph(ilip)s guldene van gewichte tstuck tot vijffentw[eijntich] stuvers mit dobbele vuereijsers tstuck tot twee stuvers ende een oertende voirts mit allen anderen goeden gelde vanden selver valuacien nu [ge] [***] ende metter jairrenten als men die lossen ende afquijten ǁ sall ende metten afterstelle daer af ofter dan eningen ombetaelt stonden [***] toegedaen dat wij sculdich sullen zijn die lossinge ǁ een half jaer aen Jannen voirs. oft zijne naecomelingen oft tot zijnen [***] woenstede te voren op te seggen eer wij die lossinge sullen moegen ǁ doen, Ende oft namaels gebuerden dat god verhueden moet dat dese [***] in eningen toecomende tijden gestolen gescoert oft verbrant ǁ worden soe geloven wij den voirs. Jannen zijnen oiren erven ende nacomelingen [***] nae dien wij dus van hoeren wegen versocht sullen worden ǁ bijnnen eenre maent daer nae wederomme een andere gelijcke letteren te bezegelen [***] verlenen nae der copijen oft transscrift van desen op zijnen ǁ cost wat sonder droch ende argelist, Des torconden hebben wij scepenen gesworen raetsluijden kerckmeesteren heijligeesteren ende gemeijn gebueren der ǁ vrijheit van Oesterwijck voers. den gemeijnen zegel onser voers. vrijheit bij onse [***] consent ende wetenheit aen desen tegenwoirdigen letteren doen hangen ǁ int jair ons heren duijsent vijfhondert ende elve opten twelfften dach van febr[uario] [***] [cost][***] van scrijven der cameren van sHertogenbossche