Oisterwijk

Wij scepenen geswoeren raetsluyde kerckmeesteren heyligeestmeesteren ende voerts allen die gemeyn gebueren ende ingesetenen der vrijheit van Oesterwijck doen cont enenyegelijcken die dese onse brieven sullen sien oft hore ǁ lesen, dat wij met goeden rijpen voerrade, ende deliberacie daer toe met openbaren sonnendaeghs kerckgeboede vergadert wesende, om deswille onse alre genedichste here die hartoge van Brabant etc syne domeynen ende gneden ǁ uu ter tyt versettende is Ende wij vanden selven die acchynsen van wyn bier ende broet metten ghenen dat daer aencleeft binnen onsen vrijheit voirs. om die te moegen hoegen ende leegen nae onsen proffijt ǁ ende goetduncken vanden selven onsen genedigh here sekere tijden van jaren in pachtingen plagen te hebbenen ende te houdenen, diewelcke voirs. acchynsen wij uu om een sekere grote somme van penningen vanden selven ǁ wittelycken ende erffelijcken gecoft hebben nae inhout van sekeren sijnen openen brieven van ottroeye ons van hem daer op verleent, welcke voirs. penningen wij onder malcanderen beedsgewijse nyet en connen ge ǁ wynden noch betalen Ende om die selve penningen te crijgen ende te seceren hebben wij wittelijcken ende erffelijcken vercoft heren Reyneren Croes priester een jaerlijcke ende erffelijkcke losrente van seven ǁ florijnen Rijnsguldens gemeynlicken genoemt tweyntich penningen stuvers gemeynlicken genoemt voer elcken Rijnsgulden voirs. gerekent in munte soe then dagen vander betalingen inder stadt vanden Bosche ǁ gemeynlick ter boersen gaen te vergelden allen jaer erffelijck opten heijligen korsdach Ende inder stadt vanden Bosch vrij ende loss opten wissel oft in sijnen synre erven oeren ende nacomelingen handen te ǁ te leneren op onsen cost last ende annotuere van allen lasten beden scaden ende settinge vander voirs. vrijheit wegen hoedanich die wesen mochten, welcke losrente voirs. wij bekennen datse die voirs. heere ǁ Reyneren wael ende wittelijcken gecoft heeft tegen ons met sijnen gereden penningen Ende welcke penningen wij bekennen dat wij vanden voirs. heeren Reyner gebuert ende ontfangen hebben in munte ende prijse ǁ hier nae bescreven Ende die voerts bekeert hebben int gemeyn profijt van onser vrijheit voirs. Ende welcke losrente voirs. wij allen gesammederhant inden name van ons selven ende vander gemeynre ǁ vrijheit wegen ende elcke van ons voer al geloeft hebben als principael sculderen in goeder trouwen te gelden ende te betalen den voirs. heere Reyneren sijnen naecomelingen nae hem , oft hoeren sekeren boede brenger ǁ van desen brieve oft der copien auctentijcke in manyeren voirs. Ende hier voere hebben wij verbonden ende verbynden ons onse oeren erven ende naecomelingen ende elcken voer al allen onse gueden,ende voerts ǁ allen die gueden van onsen oeren erven ende naecomelingen hoe ende waer die gelegen moegen syn die wij uu hebben ende naemaels hebben ende vercrigen moegen Ende weert saecke dat wij weeren in ǁ ennigen gebreecke der betalingen vander losrenten voirs. in ennigen toecomende tijden Ende die voirs(ceven) heere Reyner syn oeren erven ende naecomelingen nae hem oft hoere sekere boede brengere van desen brieven ǁ oft vander copien als voirscreven is, dat aen die scepenen then tijde wesende oft ennige der selver oft aen hen woenstadt versocht hedden willen wij ende consenteren dat hij alsdan een maent geleden nae elcken ǁ termynen gevallen, ende nae dat die maninge in der manyeren voirs. gedaen sal wesen sal moegen verteren op ons ende op onse voirs. vrijheit elcks sdaechs dat wij in gebreecken weeren vier stuvers , welcke ǁ vier stuvers van there wij hem geloeft hebben ende geloven te betalen sonder die principael rente yet te verminderen Ende hebben voerts vertegen ende vertijen voer ons onse oeren erven ende naeco ǁ melingen van allen vrijheiden van privilegien porteryen sunte peters manscappen jaermercten weeckmercten respijtbrieven quinkernellen Ende voerts der exceptien datmen seegt dat gemeyn verthijenisse nyet en ǁ dyet, ende voert allen anderen defensien ende bescuddingen hoedanich die wesen mochten geestelijcken ende weerlijcken die ons in desen souden moegen helpen ende den voirs. heeren Reyner letten oft ǁ deeren in enniger manyeren tegen dese letteren oft tegen ennigen vanden voerwaerden ende geloeften die in desen letteren bescreven staen Ende om den voirs. heeren Reyner sijnen oeren erven ende naecome ǁ lingen nae hem allen dese punten ende voerwaerden in desen letteren begrepen te voldoenen, soe bidden wij allen heeren ende rechteren ampluyden ende gerechts boeden geestelijcken ende weerlijcken dat in ǁ dyen wij in gebreecke van desen in toecomende tijden bevonden mochten worden, ende wij ende onse naecomelingen nae ons inder manyeren voirsc(reven) nyet en betaelde nae dyen die termynen van betalingen ǁ een maent leeden gevallen sullen wesen, ende hij oft sij inder manyeren voirs. gemaent sullen hebben, dat sij ons daer nae binnen eenre maent tijts sullen commeren ende arresteren onse lyven ende gneden ǁ ende onsen naecomelingen lyven ende gueden gerede ende ongerede ende elcken van ons voer principael hoeftsculde tot wat plaetschen ende steden hetzij te water oft te lande sij bevonden sullen werden totter ǁ tijt toe wij hem die principael gevallen rente tsamen met allen cost van recht daer op gedaen vermiecht sullen hebben, behoudelijcken dyen dat wij ende onse naecomelingen dese voirs. losrente altijt sullen ǁ moegen lossen ende afquijten tsamen metter sommen van hondert ende negenthien Rynsguldens tweyntich stuvers oft die rechte weerde daer voer in anderen paeymente voer elcken Rijnsgulden voirs. gere ǁ kent Ende dat in penningen, ende munte als hier nae volgen te wetende met gouwen leeuwen van gewichte tstuck tot vierenveertich stuvers, met gouden bourgonsen Ryderen ende Vugersen guldens van gewichte ǁ tstuck tot negenendertich stuvers, met gouden andriesguldenen ende gwilhelmese scilden van gewichte tstuck tot negenentweyntich stuvers, met gouden overlensen gulden vander valuarien tstuck tot achtentweyntich ǁ stuvers, met gouden ph(ilip)s gulden van gewicht stuck tot vijffentweyntich stuvers, met dobbelen vieryseren tstuck tot twe stuvers ende een oert Ende voerts met allen anderen goiden gelde vander selver valuarie nu ǁ gevalueert sijnde nae advenant, ende metter jaerrenten alsinen die lossen ende afquijten sal, ende metten afterstelle daer aff ofter dan ennigen onbetaelt stonde Ende oft naemaels gebuerden dat God verhueden moet dat ǁ dese tegenwordige letteren in ennigen toecomende tijden gestoelen gescoert oft verbrant worden soe geloeven wij den voirs. heeren Reyner sijnen oeren erven ende naecomelingen nae hem nae d[*]n wij des van sijnen oft ǁ hoeren wegen versocht sullen worden binnen eenre maent daer nae wederomme een andere gelijcke lettere te besegelen ende te verlenen nae der copien oft transscrijft van desen op sijnen oft hoer cost allet ǁ sonder droch ende argeliste, des torconden hebben wij scepenen geswoeren raetsluyde kerckmeesteren heyligeestmeesteren ende gemeyn gebueren der vrijheit van Oesterwijck voirs. den gemeynen segel onsen vrijheit voirs. bij onsen ǁ alre gerechter wetentheit aen desen tegenwordigen letteren doen hangen int jaer ons Heeren duysent vijffhondert ende vijve opten sesten dach van Januario nae costume van scrijven der cameren van den Bossche