Hilvarenbeek

Wii Wouter Zouwen ende Dirick Tielmans scepenen in Beeck tuyghen onder onsen gh[e]- ǁ meynen zeghel dat voir ons is coemen Ian zoen wilnere Willen Schilders ende ǁ heeft gheloeft ende gheloeft als een principael schulder op hem ende op allen syn gue- ǁ den hebbende ende vercrighende Willemen synen wittighen brueder altiit te legghen ǁ syn erfpenninghen als van alsulcken seven mud rogghen als Ian voirs. den voirs. ǁ Willemen huyden des daghes erffeliicken gheloeft heeft te ghelden ende te betaelen ǁ in eender erfpachtinghen nae uutwiisen den scepenen brieven dat mud teghen ǁ  sessendertich Peters altiit als Willem hem dat een halff iaer te voiren segghen ǁ te weten die seven mud rogghen te saemen oft alsoe vele in afcorttinghen ǁ als vanden seven mud rogghen als Willemen dat sal bekennen bii alsoe dat ǁ Ian altiit een halff iair te voiren weten sal hoe vele Willem gheleedt wil ǁ hebben ende wanneer. Ghegheven int iair Ons Heeren dusent vierhondert ǁ tachtentich ende vier den vierden dach iulii