Hilvarenbeek

Wii Peter tSniders Ian van den Kerchoue Ian Korchman Claus van Sprewel Mathiis van Baesscot Ghisel van Peelt en Aert van Rouoert ǁ scepenen in Beke Laureyns van den Rode ende Claus Wilhems manne van leen Ian meester Henriix diinstman onser ghenedigher vrouwe ǁ van Brabant Claus van Beerze Danel van den Spoelhouel ende Ghiisbrecht Hadewiich Luten zoen ghebure ende inseters des dorps van ǁ Beke segghen dat van dien tiden herwarts dat hen ghedenken mach dats te weten summe van veertich iaren summe van viiftich iaren ǁ ende summe van sestich iaren si noyt en ghewisten noch en hoirden ghesegghen die ghebure ende inseters van der dingbanken van Beke ǁ si en mochten malen buten Beke ende binnen Beke daers hen ghenoechde ende oet hoir gruyt halen buten Beke ende binnen Beke daers ǁ hen oet ghenoechde ende dat si van dien twe ponten nye bedwant en hadden tot den daghe toe van heden noch van hoppene bier ǁ noch van vremden bier tot noch toe en gheen onghelt ghegheve en hebben en dair ome bidden wii onser ghenedigher vrouwen ǁ voirs. dat si ons handen wille in onsen heer comen ende overmiids dat ons dit condich is soe hebben wii onsen ghemeyne seghel ǁ des scependomps van Beke deser litteren aen ghehanghen ghegeven tswoensdag nae sente Remeys dach tsconfessoers int iaer ons ǁ heren dusent driehondert neghentich ende een