Brussel

Philips bider gracien Gods, hertoige van [Bourgoignen] van Lotharingen van Brabant, ende van Lymborch, greve van Vlaenderen van Artois van Bourgoingnen palatiin van Henegouwe van Hollant ǁ van Zeelant ende van Namen, marcgreve des Heilichs Riics, heere van Vrieslant, van Salins, ende van Mechelen, allen den ghenen die desen brief selen sien of hoeren lesen Saluit, alsoe ǁ als tanderen tiden onse goede lude van H[il]waeren Beke tegen wilen hertogen Janne van Brabant onsen ontvorden saliger gedachten, ende Rogier van Leefdale borchgreve van ǁ Bruessel, gecocht ende gecregen hebben gehadt, sekere vroenten ende gemeynten gelegen bynnen sekeren palen ende paelsteden tot hueren ende alle den gheenre die bynnen ǁ den selven palen geseten siin ende die doe ter tiit dies coops, mede deylachtich wouden wesen, gemeynen oirber ende gebruycke, geliic die brieve dair op gemaict, dat ǁ clairliker inhouden, ende onse voirs. goede luden ons hebben doen thoenen, hoe sii aen der selver hoerre vroenten ende gemeynten groeten schade geleden hebben ǁ ende dagelix ende soe langer soe meer geschapen siin te liden, overmits den overtuldigen opheffenden ende vliegenden zande dat aen vele eynden zeer groetelic wast ǁ ende dagelix meerdert, om dat onse voirs. goede lude traech vallen tselve zant mit poten russchen ende andere te weren, nemende ocsuyn dat sii dat laten, om dat hen ǁ stoot gemaict heeft geweest, des houts dat zii alsoe hebben gepoet te moegen gebruycken ende dat oic onse voirs. goede lude, overmits dat inder voirs. vroenten ǁ ende gemeynten, egheene moeren noch bosschen en liggen groet gebreck liden van brande ende tymmerhoute, ons oitmoedelic biddende hen genedichlic dair op ǁ te willen versien van consente ende op hoerre voirs. vroenten ende gemeynten voirtaen alrehande boemen ende poten te moegen setten ende dierre te gebruycken ǁ betalende dair af den behoirliken ende gewoenliken houtschat, soe doen wii te weten dat wii die ons op tgheen dat voir gescreven steet volcomelic hebben doen ǁ informeren hebben bii goeden ripen saide ierst dair op gehadt, onsen voirs. goeden luden van Beke ende anderen bynnen den palen van hoerre voirs. vroenten ǁende gemeynten geseten ende hoeren nacomelingen om onsen ende hoeren gemeynen oirber dair aen gelegen, gegeven ende verleent geven ende verleenen mit desen ǁ brieve dat zii die zanden die tegenwoirdichlic siin of namaels wesen mochten in hoerre voirs. gemeynten selen sculdich siin te weren, bii ordinantien ende goetduncken ǁ vanden zeven scepenen van Beke, inder tiit wesende het zii mit russthen ende dunen te besteken of anderssins ende des die selve zeven scepenen dair op ordineren ǁ selen dat sal elc moeten doen, ende dair inne gehoirsam wesen op die peene die sii bii hueren richter tot der heerlicheit behoef dair op selen setten, ende dat sii alle ǁ manieren van boemen dair om opter voirs. gemeynten selen moegen setten ende die afhouwen ende in hueren gemeynten oirber bekeren ende andere weder setten allet bii ordinan ǁ der voirs. scepenen, alsoe ducke ende menich werven alst hen nut sal duncken, ende of yemant die boemen die alsoe geset waeren afhieuwe of tot hemwaerts name ǁ sonder weten of ordinantien der voirs. scepenen die soude vervoeren alsoe ducke alst geboerde twintich scellinge zwerter tornoyse totter heerlicheit behoef ǁ sonder verdrach, ende hebben voirt onsen voirs. goeden luden gegeven ende verleent dat elc van hen voir hen erve ter gemeynten weert veertich voete verv[***]ǁ sal moegen setten ende poten alrehande boemen het siin eycken of andere ende die houden staende afhouwen vercoepen of anders in siins selfs oirber bekeeren ǁ ende andere weder poten ende setten, alsoe ducke ende mennich werven als hem sal gelieven, woude oic yemant opten gemeynen straten voir siin erve ennige boemen poten of ǁ setten dat sal hii des gelics moegen doen bii goetduncken vanden voirs. scepenen die sculdich selen siin te besorgen dat die selve straten groet genoech ende oepen bliven ǁ ten gen[***]n oirber ende gerieve van allen den ghenen die dan dair doir [***] luden ende die eyckelen ende andere vruchten die opten boemen [***] syn erve also ǁ sal hebben geset selen wassen selen allen onsen voirs. goeden luden gen[..]e wesen met die boemen sal elc voir wiens erve dat sii staen selen alleen hebben ende ǁ die gebruycken, het sii in borningen in tymeringen of anderssins na siinre gelieften, ende of yemant des anderen boeme alsoe voir siin erve staende afhieuwe ǁ of tot hemwaerts name die soude dair aen vervoe(re)n alsoe vele of hii dat op des andere erve dede, ende alsoe dat die voirs. scepenen mitsgaders hoeren richter tot ǁ hoeren draeyboemen ende lantweren ter noet ende anders met in redelicheiden selen moegen nemen hout, al stonde dat ende voir yemants erve alsoe verre als ǁ opten gemeynen egheen en stonde dat nut dair toe weren ende van allen houte dat inder voirs. maten sal werden geset, het sii opten gemeynen of voir ǁ onsen voirs. goede lude erve sal men tallen tiden als men dat sal afhouwen ende besigen betalen totten heerlicheit behoef, in handen der gheenre dair ǁ toe gecommitteert den behoirliken ende gewoenliken houtschat, te weten den thienden penninck vanden weerden des houts, dat alsoe afgehouwen sal wesen ǁ sonder wederseggen, ende of om ennige houts wille dat inder voirs. maten sal werden geset ennige geschille geviele tusschen ennige twee partien dat ǁ geschille selen die voirs. scepenen aengehoirt redenen ende bescheit aen beiden siden beslichten alsoe behoeren sal u ontbieden dair om ende bevelen onsen ǁ drossate ende rentmeester generael van Brabant onsen schouteth ende rentmeester vanden Bosch onsen schoutet ende rentmeester van Oesterwyck ende allen onsen ǁ anderen ambachteren richteren ende dieneren nu siinde ende namaels wesende ende allen anderen dien dat aengaen mach dat sii den voirs. goeden luden van Beke ǁ ende anderen bynnen den palen van hoerre voirs. gemeynten [***] der voirs. punten die wii hen hebben verleent geliic sii boven gescreven staen rustelic ǁ ende vredelic doen ende laten gebruycken tot ewigen dagen sonder hen dair tegen ennigen hiinder commer of letsel te doen of te laten, geschien in enniger ǁ manieren, ende des torconden hebben wii onsen segel aen desen brief doen hangen gegeven in onsen stat van Bruessel XXII dage in novembris int jair ons ǁ heren anno MCCCC een ende veertich.

Op de pliek:

Bij minen heren den hertoge, dair bij waeren ǁ
van sinen stande [***] Henric Magnus ǁ Jan Hinckart, [Simon] van Harbays ǁ meesteren Claes [Clopper] ende Jan ǁ die Grote [***]

In margine:
Dese ten comptoore generael ǁ der domeijnen van Braband ǁ in het quartier van 's Her-ǁ togenbossche, ingevolge de ǁ resolutie van de Edele Mogende ǁ Heeren Raden van Staate ǁ der Vereenigde Nederlanden ǁ in dato den 11. Junij 1729. ǁ geregistreert op heeden den ǁ 30. Augustij 1729. ǁ H. Santvoort

Dorsale aantekening:

Previlegie ofte ǁ pootcaerte ǁ ende reglement 1441