Oisterwijk

Peter soone Adriaen Janssen van Roij heeft wettelijck ende erffelijck vercocht Willemkenen ǁ naegelaeten weduwe wijlen Marten Dierixen Eenen jaerlijcken ende erffelijcken chijns van seven guldens ende ǁ thien stuijvers den Carolus gulden tot twintich stuijvers tstuck gerekent, off die werde daer voor  in anderen goeden gelde, ǁ te vergelden ende te betaelen allen jaer erffelijck op onsen Liever vrouwen hemelvaertdach, waer aff den ǁ iiersten betaeldach wesen sal op onsen liever vrouwen hemelvaertdach nu iierstcomende van ende uut een ǁ stuck erffs eensdeels ackerlant ende eensdeels dries vijff lopensaet ende dertich roeijen off daeromtrent begrijpende ǁ gelegen inde prochie van Oisterwijck ter plaetse genoempt Huijckelom inde Langhvennen, tussen ǁ erffenis Gerit Wouter Rijsbroecx aen deen zijde ende tussen erffenis Gertruijt Willems van Wassenberch ǁ aen dander zijde, streckende metten eenen eijnde aen erffenis Meester Adriaen Comans, ende metten anderen eijnde ǁ aen erffenis der weduwe Peter Claes Ketelaers, als hij seede, Omden voors. chijns  bijde voors. Willemken in eenen ǁ erffrecht te hebben ende te besitten, Gelovende die voors. vercoper als schulder principael op hem ende op ǁ alle zijne goeden hebbende ende vercrijgende den voors. chijns van seven gulden thien stuijvers der voors. copersse te waren ǁ als men erffchijns schuldich is te waren, ende de voors. onderpanden voor de jaerlijcxe betaelinge vanden ǁ voors. chijns altijt goet seecker genoech ende weldogende te houden ende te maecken Ende allen anderen ǁ commer ende calangie inde voors. onderpanden wesende den selven aff te doen geheelijck, uutgenomen een ǁ mauwer roggen  tsiaers dwelck betaelt wordt met twee gulden thien stuijvers aende heijligen geest alhier ǁ jierst van rechtswegen daeruut te vergelden staende, Getuijgen waren hierover schepenen in ǁ Oisterwijck Jan Janssen Timmermans ende Adam Martens van Hees die henne segelen  in getuijgenis ǁ hier aen hebben gehangen, Opten achtienden dach Augusti int jaer ons sheeren duijsent sess ǁ hondert ende drijenveertich

J Peijnenborch

Dorsale aantekening:

VII gulden 10 stuijvers ǁ tot laeste Peter soene ǁ Adriaen Jansen van Roij ǁ beset op vijf loepense ǁ lants tot Huckelum in ǁ [***] ǁ [***] schoen ǁ maeckers

Willemken Martenss

Vij gulden X stuijvers [***] ǁ opt [***] ǁ in dato ǁ 18 Augustij ǁ 1643