's-Hertogenbosch

Dierck Sone wijlen Geerarts Dierixssz. vanden Wiel, woonende tot Oisterwijk, als wittich ǁ man ende momber, soo hij verclaerde van Cristina sijne huijsvrouwe, dochtere wijlen Aert Swaen, heeft wittelick ende erffelick vercoft ende ǁ vercoopt midts desen Willemen Donckers tot behoeff van Nicolaessen Janss. Donckers, Eenen jaerlicken ende erffelicken chijns van Sess carolus gulden, tot ǁ twintich stuijvers den gulden goets gelts gereeckent, ende betaelen alle jaer erffelick den drijendetwintichsten dach der maent Maij, Ende voorden iersten termijn van ǁ betaelinghe den drijendetwintichsten Maij anno Sestienhondert ende eenentwintich, Ende inne Shartogenbossche vrij van alle beden ons heeren des hertochs ǁ exactien, subventien, tiende, twintichste, honderste, ende alle andere meerdere ende mindere penningen, commeren, scattingen ende lasten ordinarisse, ǁ extraordinarisse, innegestelt ofte ter avontueren naermaels innegestelt te wordene, egeene lasten uitgescheijden te leveren ende te vergelden, van ǁ ende uit een stuck ackerlants groot ontrent vier lopensaten, gelegen inde prochie van Oisterwijck ter plaetssen geheeten inde scijve achter ǁ het gasthuijs aldaer tussen erve der erffgenaemen Adriaen Peijnenborchs aen d'een sijde, ende tussen erve Jacob Aert Swaen aen d'andere ǁ sijde, Streckende vanden erve meester Philips Lintermans tot aen erve der taeffele des Heijlich geests in Oisterwijck, eenen voetpat tussen ǁ beijde liggende, soo hij verclaerde, vanden selven Nicolaessen Donckers mitten erffrecht te hebben ende te besitten, ende heeft die voors. ǁ vercoopere den voorn. chijns den voors. Willemen Donckers tot behoeff vanden voorn. Nicolaessen Donckers opgedraeghen met helmelinghe ǁ verthijdenisse inne manieren inne dijen gewoonlijck sijnde, Gelovende de voorn. vercoopere als sculdenaer principael op verbant van ǁ sijnen persoon ende allen sijne goederen present ende toecoemende dat hij den voorn. Nicolaessen Donckers vanden voors. chijns sculdighe ǁ ende gerechte sall doen warantschappe, ende dat hij allen anderen commer, calaengie ende aentael inden voors. onderpande wesende oft commende ǁ den selven Nicolaessen Donckers aff sall doen geheelicken, ende dat hij t'voors. onderpandt voorde betaelinghe des voors. chijns den voorn. ǁ Nicolaessen Donckers jaerlicx daervor, soo voors. staet, te vergelden altijt goet genoech ende welduegende sall maecken ende houden, ǁ met conditie toegedaen dat de voorn. vercoopere desen voors. chijns ten allen tijden sall moegen lossen ende quijten ten eenenmaele, met de ǁ somme van hondert carolus gulden, tot twintich stuijvers permissie gelts den gulden gereeckent, ende met de loopenden jaerchijns ende ǁ achterstellen ten tijde der afflossinghe van den voorn. chijns t'achter ende ombetaelt staende, Behoudelijck dat men desen loss een halff ǁ jaer te voorens wittelick sal vercondigen ende op seggen, Getuijgen waeren hier over Scepenen inne S'Hertogenbossche Robbert van Voorn ǁ ende Gerardt van Broeckhoven, Gegeven den drijendetwintichsten dach der Maent Maij int jaer ons Heeren Duijsent Sesshondert ǁ ende Twintich ǁ A. van Hees [***] ǁ Littera Nicolai [***]

Dorsale aantekening:

[***] van VI gulden tot ǁ Oesterwijck

Ontfangen van Wouter [***] ǁ Peijnenborch als momboir vande kijnder ǁ Geraert Dircx vande Wijel de ǁ capitaelen mette achterstellen vanden ǁ chijns van ses gulden interest [***] ǁ deser begrepen consenterende oversulx ǁ inde cassatie desselfs ter ǁ prothocolle deser staet [***] ǁ toirconden 9 met 1648 ǁ [***]