Oisterwijk

Ian geheyten die Vet soen wilner Godevaerts geheyten die Vet acht lopen rogs iaerlycs ende erfelycs pachts tot hem als hy seyde behoerende van twelf lopen ǁ rogs iaerlycs ende erfelycs pachts van sess mudden rogs iaerlycs ende erfelycs pachts myn vyer lopen rogs erfpachts ende voert van tyen lopen rogs ǁ iaerlycs ende erfelycs pachts welck zes mudde rogs erfpachts myn vyer lopen rogs erfpachts voirs. Aert soen wilner Ian Betthen ende Iacob Aerts soen ǁ vander Hoeven iaerlycs sculdich syn te ghelden op onser vrouwen dach als men kersen dreeght van ende uut eenrehanden erfenissen hier nae gescreven dats ǁ te weten uut enen huyse ende hove met sinen gronde ende toebehoirten gelegen inder prochyen van Westilborch in een stede geheyten te Loven tusschen der erfenis der ǁ erfgenamen Hubrecht Betthen optie een side ende tusschen der erfenis der erfgenamen Aleyten tSgroten optie ander side hodende metten enen eynde aen ǁ die gemeyn straet, Item van eenre erfenis te lande ende te weyden gelegen tusschen der erfenis der erfgenamen Hubrecht Betthen optie een side ende tusschen ǁ der gemeynder straten optie ander side hodende metten enen eynde aen der erfenis Vranck Poppen, Item uut enen stuck lands gelegen tusschen der erfenis ǁ Claus vander Hoeven optie een side ende tusschen der erfenis Ghysbrecht soen optie ander side hodende metten enen eynde optie ghemeyn straet, Item van ǁ enen stuck lands gelegen aen den Mortel tusschen der erfenis Ians Weiters optie een side ende tusschen die gemeyn straet optie ander side, Item van enen stuc ǁ lands geheyten dat Dal gelegen tusschen der erfenis Claus Steenwechs optie een side ende tusschen dat lant van Donghen optie ander side, Item van enen stuck ǁ lands geheyten Doerdelven gelegen tusschen der erfenis Claus Steenwechs optie een side ende tusschen der erfenis Hubrechts geheyten Wyten optie ander ǁ side, Item uut enen stuck lands geheyten die Hoeghvonder gelegen tusschen der erfenis Claus Steenwechs optie een side ende tusschen der erfenis Ians van ǁ Wyslit optie ander side, Item uut enen halven buenre beempde gelegen after Malle tusschen der erfenis Gyelis Backs optie een side ende tusschen der erfenis ǁ der erfgenamen Wouter Iacobs optie ander side, Item noch uut enen halven buenre broecks gelegen aen den Veediike tusschen der erfenis Maes Pylokers optie ǁ een side ende tusschen der erfenis Gheryt Wyten optie ander side, Item noch van enen halven buenre beempde gelegen tusschen den Veediike optie een side ende ǁ tusschen der erfenis Claus Ghysbrechts soen van Aerle optie ander side, Item noch van enen stuck beempts geheyten Scyppers hof gelegen tusschen der ǁ erfenis Bruysten Ians soen optie een side ende tusschen der erfenis Ians sBiies optie ander side, Welck erfenissen voirs. Aert Ian Betthen soen ende Iacob ǁ Aerts soen vander Hoeven voirs. [***] enen erfpacht gecregen hebben ieghen Gheryt, Ianne, Henricke, Hermanne, Hubrechte, Wouteren ende Peteren gebrueders ǁ ieghen Angneesen hoiren zuster [***] Ianne ende Hubrechte horen sonen omme dese voirs. sess mudde rogs erfpachts myn vier lopen rogs erfpachts ǁ Hyllegonden wyf wilner Ian Betthen voirs. ende hoiren nacomelingen iaerlycs daer af te ghelden ende die welck tyen lopen rogs erfpachts voirs. ǁ Gheryt Ians sBonten soen iaerlycs opten voirs. onser vrouwen dach sculdich is te ghelden uut ende van eenrehanden erfenissen hier nae gescreven ge ǁ legen inder prochyen van Westilborch dats te weten uut enen stuck lands omtrent van twee lopensaden ende van derdalver roeden lands gelegen ǁ te Velthoven in sBonten hoeve tusschen der erfenis Peter Aerts soen optie een side oestwaert ende tusschen der erfenis Wouter Landengods optie ander ǁ side hodende metten enen eynde aen die gemeyn straet, Item noch uut enen stuck lands gelegen in der voirs. hoeven omtrent van anderhalve lopen ǁ saden hodende metten enen eynde aen der erfenis Peter Aerts ende metten anderen eynde aen die gemeyn straet, Item uut eenre weyden inder voirs. ǁ hoeven gelegen omtrent van zes ende tweyntichstalver roeden hodende metten enen eynde aen die Eertbos ende metten anderen eynde aen der erfenis ǁ Peter Aerts soens voirs. die welck erfenissen voirs. dese voirs. Gheryt Ians sBonten soen in enen erfpacht gecregen heeft ieghen Gheryde, Ianne, ǁ Henricke, Hermanne, Hubrechte, Wouteren, Peteren ende Aerde gebruederen zonen wilner Ian Betthen voirs. ieghen Angneesen hoere zuster ieghen Ianne ǁ ende Hubrechte hoiren sonen voirs. dese voirs. tyen lopen rogs erfpachts der voirg. Hyllegonden wyf wilner Ian Betthen ende hoiren nacomelingen iaerlycs ǁ daer af te ghelden ende opter voirs. erfenissen iaerlycs te custene ende te leveren metter maten van Westilborch welck twelf lopen rogs erfelycs pachts ǁ voirs. Godevaert soen Godevaert tFets tot behoef des selfs Godevaerts tFets syns vaders voirs. ieghen Hubrechte soen wilner Ian Betthen in

wittigen ǁ cope gecregen hadde gelyc als dat in versceydenen scepenen brieven van Oesterwiick daer op gemaect volcomeliker begrepen is ende welck acht lopen rogs ǁ erfelycs pachts vanden twelf lopen rogs erfelycs pachts voirs. den voirg. Ianne die Vet soen wilner Godevaerts Vets van dode des selven wilner ǁ Godevaerts tFets syns vaders met recht van versterve erfelyc toecomen siin als hy seyde heeft hy wittelyc ende erfelyc vercoft Ghysbrechte soen wilner ǁ Peters geheyten Enghelen Zeghers vanden selven Ghysbrechte copere in een erfrecht te hebben ende te besitten den voirs. erfeliken pacht vanden acht ǁ lopen rogs dese voirs. Ian die Vet vercoper den voirg. Ghysbrechte copere heeft overghegeven ende opgedragen met afgaen ende vertyen als daer ǁ toe behoerlyc is Ende heeft geloeft Ian die Vet vercoper voirs. als een principael sculder op hem ende op allen syn guede die hy nu heeft ende namaels ǁ hebben ende vercregen mach dese voirs. acht lopen rogs erfpachts den voirg. Ghysbrechte copere te warnen tot ewighen daghen ende dese voirs. onder ǁ panden voer betalinge des erfelycs pachts vanden acht lopen rogs voirs. den voirg. Ghysbrechte copere iaerlycs daer uut als voirs. is te verghelden ǁ guet ghenoech waeldogende altyt te maken ende zeker genoech orconden hebben hier over geweest scepenen in Oesterwiick Henrick van Ethen ǁ ende Ian vander Elst die hoir zegelen in getugenisse hier aen hebben gehangen int iaer ons heren dusent vierhondert ende veertich des ǁ sondaechs nae onser liever vrouwen dach conceptio

Dorsale aantekening:

Ghijsbrecht [***] ǁ Jan Smitten scabini [***] ǁ vanden [***] anno LIXen XXII