's-Hertogenbosch

Jouffrouwe Catharina, dochtere wilner Jans Cock, naegelaten weduwe wilner Erasmus Schets, met haren mombaire van hair daer toe vercooren ǁ ende hair vande richter nae gewoenten gegeven, voldoende seeckere testamente bij wilner Barbara dochtere wilner Jans Cocx naegelaten weduwe ǁ wilner Jans vande Wiel gemaict. Eenen jairlijcken ende erffelijcken chijns van sevenendedartich caroly gulden, thien stuvers, twentich stuvers ǁ off die werde dair voir in anderen gevalueerden gelde voir elcken carolus gulden te reeckenen, te betaelen alle jairen erffelijck opden ǁ eersten dach der maent van juniy, ende binnen den stadt van Shertogenbossche vrij van allen beeden subventien exactien allen anderen ǁ commeren, lasten ende ongelde. Ende oijck van thiensten ende twentichsten penningen vande hoove of staten van Brabant off vande staet ǁ vanden Bossche eertijts geseten, ende allen anderen lasten die bijden staten of stadt die naemaels geseth sullen wordden te leveren ǁ van ende vuijt een hoeve Reijnieren van Breederooden heere tot Cloetingen, des lants van Voshel van Reuwijck, Asten etc: toebehoirende ǁ gelegen inde parrochie vande Tilborch, ter plaitse genoempt ten tBroecs, ten Bacxdijck, te wetenen vande ende vuijt de huijsen ǁ erven, hoeven, landen, beempden weijen, heijen, haver wassen ende anderen rechten, ende toebehoirten der voors. hoeven allen ende ǁ eenijegelijck waer die gelegen sijn ende bevonden sullen wordden. Noch van ende vuijt een wijntmoelen den voors. Reijnieren toebehoirten ǁ staende inde parrochie van Oisterwijck ter plaetssen genoempt Kerckhoven, Noch van ende vuijt een watermoelen, metten ǁ rechte ende tgemael, emolumenten vande selver moelen, huere rechten ende toebehoirten, ende voirts van ende vuijt allen ende ǁ eenijegelijcken andere gueden des voors. Reijniers waer ter plaetssen die gelegen sijn ende bevonden sullen wordden welcken ǁ chijns die voors. Reijnier erffelijck vercoft hadde Wouteren Scellens tot behoeff van Barbara dochter wijlen Jans Ghijsbertss., gelijck ǁ in scepenen brieven vande Bossche daer op gemaect breeder scheen begrepen te sijn, heeft sij wittelijck ende erffelijck opgedragen ende overgegeven, ǁ Jannen ende Ghijsberden, gebruederen soenen Jans soen wijlen Jans Thomass. vande selven Jannen ende wijlen Marijcken sijn huijsvrouwe, ǁ dochter wijlen Jans Cock tsaemen verwect, tsaemen metten voors. brieff, ende tgeheel recht hair inde selven brieff daer d'innehouden ǁ van dijen ennichsins competerende ende heeft helmelingen daer op vertegen inne manieren inne dijen gewoenlicken sijnde, gelovende voors. ǁ Jouffrouwe Catharina met haire mombare voors. als schuldersse principael onder verbant van hairen per sua ende alle haire goedens. ǁ present ende toecoemende, tvoors. opdragen, overgeven ende vertijen, altijt vast , stedich ende van werden te houden sonder ennich wederseggen, ǁ ende allen commer calaingie ende aentael van hairen tweegen, van wegen des voors. Barbare ende allen hairen erffgenamen ende successoren ǁ inde voors. jairlijcke ende erffelijcke renthe, wesende ofte coemende den voors. Jannen ende Ghijsberden aff te doen geheelicken, getuigen ǁ waaren hier over scepenen inne S hertogenbossche, Frans van Balen ende Roeloff die Bever soene Jans  Gegeven de sesten dach in meert saterdachs ǁ nae den sondach alsmen singht letanie Jerusalem, int jair onss heeren dusent vijffhondert acht ende vijftich.

Dorsale aantekening:

Tilborg ǁ Jan ende Gijsbert Thomass.