's-Hertogenbosch

Adriaen Daniel Sabastiaens woonende inde parochie ende heerlickheijt van Tilborch heeft ǁ wittelick ende erffelick vercoft d'heer Elias Donckers licentiaet inden rechten tot behoeff vande kijnderen Catharine ǁ Donckers, Eenen jaerlicken ende erffelicken chijns van vierentwintich carolus gulden tot twintich stuijvers goets gancbaers ǁ gelts, elcken gulden gereeckent, Te betaelen alle jaer erffelick opten vijffentwintichsten dach der maent van ǁ januario, ende voorden iersten termijn van betaelin(ge) opten vijffentwintichsten januarij Anno XVIc ende t'sestich, ǁ Ende binnen dese stadt vrij van alle beeden, exactien subventien, commeren schattingen ende lasten ingestelt ende noch ǁ naermaels ingestelt te wordden egeene lasten uut gescheijden te leveren ende te vergelden, van ende uut een stuck ǁ ackerlants twee loopensaten lants oft daeromtrent begrijpende gelegen inde voors. parochie ende heerlickheijt ǁ van Tilborch ter plaetse genoemt aent' Creijven, tussen erffenisse Wouter Aert Celen aen d'een sijde noortwarts ǁ ende tussen erffenisse Jans Willems de Jonge suijtwarts aen d'ander sijde, streckende mitten eenen eijnde aen ǁ seeckeren voetpat aldaer, ende mitten anderen eijnde aende gemeijn straet aldaer, Item van ende uut een weijveldeken ǁ een loopensaet lants oft daeromtrent begrijpende, gelegen ter plaetse voors., tussen erve der kijnderen Joachims ǁ Daniels aen d'een sijde, westwarts, ende tussen den gemeijnen waterlaet aen d'ander sijde oistwarts streckende mit ǁ beijde d'eijnden aende gemeijne straeten, Item van ende uut de helfte van seecker parceel weije bedeijlt aende ǁ noortsijde, int' geheel vijff quartier begrijpende gelegen ter plaetse voors., tussen erve Jans Willems de ǁ Jonge aen d'een sijde suijtwarts, ende tussen erve Peeters Jan Peeters aen d'ander sijde noortwarts, streckende ǁ metten westeijnde aende gemeijnen waterlaet ende mitten anderen eijnde aende gemeijn straete, Ende alnoch ǁ van ende uut een ackerken saijlants anderhalff loopensaten lants oft daeromtrent begrijpende gelegen ǁ ter plaetse voors., tussen erve Mathijs Janssen Creijer aen d'een sijde westwarts, ende tussen erve ǁ Pauwels Denis mit sijne kijnderen aen d'ander sijde oistwarts, streckende mitten suijdeneijnde aen erve ǁ aen erve Denis Daniels, ende mitten anderen eijnde aende waterlaet aldaer, Soo hij verclaerde, vande ǁ selve kijnderen Catharina Donckers mitten erffrecht te hebben ende te besitten, Ende heeft die voors. vercooper ǁ den voors. chijns den voorn. Donckers tot behoeff vande selve kinderen opgedraegen mit helmelinge vertijdenis ǁ in manieren in dien gewoonlick zijnde, Geloevende die voors. vercooper als sculdenaer principael op ǁ verbant van sijnen persoon ende alle sijne goederen present ende toecomende, dat hij den voors. kinderen vande ǁ voors. chijns sculdige ende gerechte sal doen warantschap, ende dat hij allen anderen commer, calangie ende aentael ǁ inde voors. onderpanden wesen oft comende den voors. kinderen aff sal doen geheelicken, uutgenomen ǁ eenen erffelicken chijns van vijff ende eenen halven stuijvers aen Peeter Eeckerschot uut den eersten onderpanden ǁ jaerlicx van te voorens ende van rechtswegen te vergelden staende, Soo hij seeghde, Ende dat hij ǁ oijck de voors. onderpanden voor de betaelinge des voors. chijns den voorn. kijnderen Catharine Donckers ǁ jaerlicx daeruut, als voor, te vergelden altijt goet genoch ende welduegende sal maecken ende houden, ǁ met conditie inne desen toegedaen dat die voors. vercooper den voors. chijns tot allen tijden sal moegen lossen ǁ ende quijten teffens ende ten eenemael mit de some van vierhondert carolus gulden tot twintich stuijvers ǁ goets permissie gelts elcken gulden gereeckent, Ende mitten loopenden jaerchijns ende achterstellen ten tijde ǁ der afflossinge (daer)van t'achter ende ombetaelt staende, Behoudelick dat men den voors. los sculdich ende ǁ verbonden sal wesen een halff jaer te voorens wittelick te vercondigen ende op te seggen, Getuijgen waren ǁ hierover scepenen in Shertogenbossche Huijbert van Berckel ende Gerart Hamel Bruijnincx, ǁ Gegeven den vijffentwintichsten dach der maent januarij int' jaer ons Heeren duijsent vijff ǁ hondert negenenvijftich

L.B. van Kessel

Linkermarge:

Debet sigillum ǁ vermidts de ge ǁ coitteerde tot ǁ de distributie van ǁ dien tegenwoor ǁ dich zijn onversien ǁ van segels hiertoe ǁ dienende

Dorsale aantekening:

Ontfangen vande heere ǁ secretaris van Tilborch het ǁ capitael ende den verloopen ǁ intrest actum 10 september ǁ 1667 Helias Donquers

Tilborch ǁ Constitutie van ǁ XXIIII etcetera