Brussel

Alzoo inden rade van onsen genadichsten heere den Coninck van Castillien, van Aragon, van Leon, van beiden Sicillien, van Jherusalem, van Portugael, ǁ van Navarre etc. Eertzhertoge van Oistenrijck, hertoge van Bourgoingnen, van Lothrijck, van Brabant, van Lijmborgh, van Luxemborch etc. grave van Habsburch, van Vlaenderen, van Arthoijs etc. geordineert zij zijnen ǁ lande ende hertochdomme van Brabant, waere van wegen den wethouderen der vrijheijt van Oisterhout bij hunne supplicatie verthoont ende te kennen gegeven geweest zij substancie hoe dat zij, ǁ supplianten om te solliciteren ende beneerstigen de saecken ende affaijren van de voers. vrijheijt gewoenlijck waeren te deputeren nijemanden van hunne inwoonderen die daertoe wordde gecozen, ǁ om te reijsen zoo bijnnen der steden van Antwerpen, Brussele, Shertogenbossche, als andere steden ende vlecken zij Brabant iederer hunnen voersz. gecommitteerde gehouden zoude moegen wordden, ǁ ende hoewel deselve hunnen gecommitteerde om zijne commissien te moegen volvueren, van alle arrestementen, becommeringen ende apprehensien behoerden van te wesen, soo waest nochtans ǁ dat daghelijcx vele ende diversche pretenderende eenige actie op de voersz. vrijheijt, tsij dat deselve waere deughdelijck oft nijet, hen vervoirderden den voerz. hunnen gecommitteerde daghelijcx ǁ mette voersz. arresten te quellen, waerdeure de zaken ende affaijren nijet en moeghten werdden vervolght, jae groote excessive schaede ende interest daer deure waeren lijdende, ǁ ende supporterende, ende noch daghelijcx meer zouden, ten waere daerinne en wordde versien. Onse genadichste heere die coninck hertoge van Brabant etc. regardt ǁ nemende op tgene des voersz. is, heeft geordineert ende ordineert bij desen, dat Peeter Tack ende Cornelis Janss. van Baerle beijde inwoonderen der voersz. vrijheijt van Oisterhout, vacherende ǁ inde saken ende affaijren der selver vrijheijt nijet en zullen moegen gearresteert, geapprehendeert oft becommert wordden in hunne persoonen, peerden oft anderssins, ter causen van schulden ǁ der voersz. vrijheijt oft eenige actien die men daerop zoude moegen pretenderen, ende dat voerden tijdt van zesse maenden naestvolgende oft dat anders bij den hove dijen aengaende zal zijn geordineert. ǁ Gedaen te Brussele inden voersz. rade opten derden dach van oighste int jaer XV^C vierentnegentich ǁ

In dorso:

1593 ǁ 3 augustus ǁ 2000 ǁ 1242 ǁ