[Brussel]

Alsoo in den raede ons heeren des conincx van Castillien van Arragon van Leon van beyde Sicillien van Hierusalem van Portugael van Navarrre etc eertzhertoge ǁ van Oistenryck, hertoge van Bourgoignen van Lothryck van Brabant van Limborch van Luxemborch etcetera, grave van Habsborch van Vlaenderen van Arthois etc geordineert in desen syne ma(jestey)ts lande en(de) hertochdomme ǁ van Brabant waere van wegen der regeerderen ende andere vande lande van Breda verthoont ende by requeste te kennen gegeven geweest in substantie hoe dat sy ter oyrsaecke vande inlantsche troubelen ǁ oirlogen ende dagelycksche belastingen daerdeure gecauseert, deurgaens genootsaeckt worden, hunne gecommitteerde te moeten vuytseynden in diversche quartieren steden ende plaetsen binnen desen lande van ǁ Brabant, soo wanneer sy aldaer bescreven oft ontboden worden, oft als de gelegentheyt vande saecken vande quartiere sulcx is verheysschende, welcke gecommitteerde dickwils worden becommert ende gearresteert ǁ voerde schulden, actien ende lasten die opt voerscreven quartier, oft eenige plaetsen daeronder resorterende worden gepretendeert daerby verachtert wordt nyet alleenlyck den dienst van syne voerscreven majesteyt ǁ ende vande Staeten van desen lande, maer oyck d'affayren van voerscreven quaertiere, waerdeur de supplianten tanderen tyden syn genootsaeckt geweest inden voerscreven Raede requeste te presenteren, ten eynde ǁ hunne voerscreven gecommitteerde alomme binnen desen lande van Brabant vry ende vranck souden moegen gaen ende keeren , sonder by yemanden te mogen becommert gearresteert oft geapprehendeert ǁ worden, voer eenige schulden actien, lasten oft pretensien die opt quartier van Breda, oft eenige dorpen oft plaetsen van dyen souden moegen geeyscht worden, tot welcken eynde hun supplianten ǁ tot meer reysen syn geaccordeert geweest acten vande voerscreven Raede daertoe dienende, telcken voerden tyt van sesse maenden, daeraff de leste is in date vanden negensten february XV^C XCVIII onderth[***]t ǁ Berthem, die opten negensten augusti naestcomende sal comen t'expireren. Ende want de supplianten tegenwoordelyck genootsaeckt worden hun in d'affayren vanden voerscreven quartiere ǁ daegelyckx te moeten vynden, tsy binnen deser stadt van Bruessele, Antwerpen oft andere steden ende plaetsen ten dienste vande voerscreven majesteyt oft van de Staeten vande lande meer dan oyt ǁ in voergaenden tyden, ende dat die becommeringen ende arrestementen van hunne gecommitteerde, oversulcx souden geschaepen syn, den dienste vande selve syne majesteyt ende Staeten grootelyck te ǁ retarderen, ende datter andere genochsame middelen syn tot reconuremente vande pretensien voerde ghene die sulcke arresten ende becommeringen souden willen doen, sonder alsulcke ǁ particuliere gecommitteerde vande voerscreven quartiere ende lande van Breda t inquieteren ende te beletten de voorderingen van hunne commissien, Soo was der supplianten ernstich versueck ǁ dat den voerscreven Raede gelieven wilde hen van nieuws te verleenen acte vuyt crachte vande welcke die voerscreven gecommitteerde, die bij ende met scriftelycke commissie van hun supplianten wegen ǁ ten dienste van syne majesteyt, Staten van den lande ende om de gemeyne saecken vanden quartiere van Breda oft dorpen daeronder resorterende die sullen moegen vuytgesonden worden, sullen vry ǁ ende vranck met hunne peerden oft anderssints moegen gaen ende keeren , in alle steden ende plaetsen van desen lande van Brabant sonder by yemanden becommert gearresteert oft geapprehendeert ǁ te mogen worden, voer eenige schulden voer eenige schulden oft actien diemen ten laste vanden voerscreven quartiere van Breda oft dorpen daeronder resorterende, soude moegen oft willen pretenderen ǁ ende dat voer eenen tyt van andere sesse naervolgende maenden die coninck onse aldergenadichste heere hertogevan Brabant etcetera regard nemende op tgene voerscreven is, heeft ǁ geordineert ende ordineert by desen , dat die twee persoonen die by ende met scriftelycke commissie van hun supplianten vuytgesonden sullen worden ten dienste van syne majesteyt vande ǁ Staten van Brabant ende om de gemeyne saecken vanden lande van Breda ende dorpen daeronder resorterende , sullen vry ende vranck met hunne waegenen kerren ende peerden, gaen ǁ ende keeren, in alle steden ende plaetsen van desen lande van Brabant, daer des van noode wegen sal, sonder by yemanden geinquieteert geapprehendeert gemolesteert oft gearresteert ǁ te moegen worden, voer eenige schulden oft actien die men opden voerscreven lande van Breda oft dorpen daeronder resorterende soude moegen pretenderen ende dat noch al voer eenen anderen tyt ǁ van sesse maenden naestcomende innegaende den negensten augusti naestcomende oft dat anders byden hove dyen aengaende sal wesen geordineert. Aldus gedaen inden Raede van ǁ Brabant den lesten july int jaer XV^C ende achtentnegentig. ǁ Lombaerts ǁ