Den Haag

Willem bider genaden goids palensgrave upten Riin hertoge in Beyeren grave van Henegouwen van Hollant van Zeelant ende heere van Vrieslant ǁ doen cont allen luden dat wii om menigen truwen dienst wille die onse getruwe stede van Sinte Geerdenberge ons ende onsen ǁ voirvorderen dier god genadich sii gedaen heeft ende noch oft god wilt doen sal ende om dat sii opten palen van onsen lande ǁ liggen ende oic om onse stede voirs. mede te beteren ende te vesten, hun van gracien ende niet van rechts wegen gecon ǁ senteert gegeven hebben ende geven mit desen brieve dat sii houden mogen ende hebben vierhondert lantpoorters die te ǁ gebruken ende te bedriven mit allen rechte ende in allen manieren geliken den ingeseten poorteren binnen onser stede voirs. ǁ ende ombieden ende bevelen onsen burgermeesteren van onser stede voirs. die nu siin of namaels wesen sullen dat sii dese ǁ voirscr. lantpoorters ontfaen ende eeden so wanneer dats hun genuecht bi onsen scepenen van onser stede voirs. in allen form ǁ als custumelic is ende al dat van desen poorters comt als sii poorter worden ende als sii weder ontpoortert worden ǁ dat willen wii ende meynen dat dat in onser stede oirbair ende nutscap comen sal sonder yement anders genot of bate dair ǁ of te hebben ende willen dat onse burgermeesters goede besceiden rekeningen dair of doen sullen bi onsen castelleyn ende ǁ bi onsen gemenen gerechte alse custumelic is behoudeliken dat wire of hebben sullen vanden boeten die sii verbueren ǁ sullen die twedeel ende onse stede voirs. dat derdendeel geliken alst recht ende haircomen is dit sal geduren acht iairen ǁ langen naden date van desen brieve ende dair en tenden tot onsen weder seggen In oircond desen brieve besegelt mit ǁ
onsen segele gegeven inden Hage upten twintichsten dach in marte int iair ons heren duysent vierhondert ende vier naden ǁ lope van onsen hove