Vidimus door burgemeesters, schepenen en raad van Breda van een akte van verkoop d.d. 17 mei 1476 door burgemeesters, schepenen, raad en poorters van Geertruidenberg van een lijfrente van tien rijnsgulden jaarlijks aan Dyrck Janszoen die Kock en zijn vrouw Margriet Heinrick Marijnissoene dochter.
Allen den ghenen die dese letteren sullen sien oft hoeren lesen saluyt wii borgermeesteren scepenen ende raid der stad van Breda doen te wetenen ende certificeren voir ǁ de gerechte wairheyt dat wii op huiden datum deser letteren hier onder gescreven gesien hebben ende hoeren lesen eenen fransiinen brief goet gans gave ende wais ǁ besegelt met eenen gemeynen uuthangenden segel ongecancelleert sonder eenige rasuere oft afdragende smette luydende van woorde te woorde als hier in volght ǁ Wii borgermeesteren scepenen raide ende die ghemeen poorte van Sinte Gheertrudenberge doen condt ende kenliicke allen luden dat wii bii gemenen raide ende consente ǁ om onser poortenschult te verleggen ende te betalen vercoft hebben Dyrck Ians zoen die Kock ende Margriet Henrick Mareiins soens dochter siin wittige ǁ wiif hem beyden te samen tot haere beyder liiftochten ende den lanxsten levenden van hen beyden ende niet langer tien riinshe gulden tstuck voir twintich ǁ stuivers gerekent oft payment haerre weerden die wii hem beyden geloven te betalen van onser gemeente poorteren wegen voir ons selven ende voir die gene ǁ die namaels wesen sullen elcx siaers die een helft op Sinte Martinus dach inden winter comende ende die ander helft op Sinte Servaes dach elx siaers dair naist ǁ volgende of bynnen den eersten viertien dagen na elcken termiin voirs. als wii dair af gemaent wordden ombegrepen van Dyrck oft Margriet voirnoemt ǁ ende den lancxste levende van hem beyden of van haeren gewairden bode die desen brief thoenen sal of een transcrift dair uit gemaict met warachtigen ende ǁ gelooffeliiken segele besegelt op alsulcke vorwairden waert dat wii hem beyden off haeren gewairden bode die desen brief oft een transscrift als voirs. is thonen sal ǁ elcx siaers hair gelt met en betailden tot alsulken tiiden als voirs. staet soe mach Dyrck ende Margriet voirs. off die lancxstelevende van hem beyden off haer ǁ gewaerde bode elcx daigs vertheren op onse gemeyn poorte voirs. drie stuvers tot twee maenden toe ende dairen teynden geloven wii hem voervoets te geven ǁ hair hooftgelt ende haeren coste off twiiscap pande van gereeden goede die men driven ende dragen mach dair zii voetstaens haeren wille mede mogen doen sonder ǁ eenich wederseggen ende sonder enige lettenisse van enigen saken die wii daertoe viinden oft thoonen mochten die ons te hulpen souden mogen comen in eenigen ǁ rechte van onser poorten wegen voirnoemt voortdaen soe geloven wii den voirg. Dyrck ende Margriet hair gelt te beseynden wair ziis begeren ende zii ons laten we ǁ ten in wes heeren lande dat sii wesen sellen bynnen twee milen weges na van onser poorten voirs. op onser poorten coste ende anxt bynnen den voirg. termine ǁ in alle manieren als voirs. staet ende waert dat tsake dat wii des met en deden soe geloeven wii ende verwilcoemen voir ons selven ende voir die ghene die ǁ namails wesen sullen tot wat steden oft in wes heeren lande dat Dyrck ende Margiet voirnoemt off die lancxste levende van hem beyden enich van onsen ǁ poirteren of siin goet vonde dat sii die poirters of hair guedt met rechte aenveerden ende houden mogen onder allen haeren geesteliiken ende weerliiken dair onse ǁ poirters oft haer guedt comen sal ende haer hooftgelt ende coste dair op winnende ende wii bidden allen heeren geliic alsoe wel gheesteliike als weerliike dat sii ǁ onse poirters ende onse guede arresteren aentasten ende houden willen dese voirnoemde liiftochten ende voirwairden mede te betalen ende voldoen ende wii geloven voir ons ǁ selven ende voir die gene die namails wesen sullen dat wii ons niet geenre hande rechte noch saken niet en sellen verweren die wii daertoe vinden oft thonen mogen ǁ die ons te staden comen mochten tegens dese voirg. liiftochten tot wat tiiden dats te doen waeren in alle manieren als voirs. staet ende desen brief begriipt ende ǁ hier en boven soe siint vorwairden waert tsake dat wii in gebreke waeren dese liiftochten te betalen in altemael off in deels soe geloven wii voir ons ǁ selven ende voir die gene die namails wesen sellen allen scade coste ende commer te gelden ende te voldoen die Dyrck ende Margriet voirs. off die lancxste ǁ levende van hem beyden of haeren gewaerden bode thoenre des briefs off een transscrift als voirs. staet liiden sal om dese voirg. liiftochten te vercrigen ende ǁ sii ter wairheyt toe brengen mogen sonder die principale schult te minderen off die drie stuvers die sii daigs verteren mogen tot haeren coste te helpen ende soe ǁ wanneer dat Dyrck ende Margriet voirs. alle beyde van live totter doot comen siin soe sal onse poorte geme[***] alynge ende altemaele van deser voirs. liiftochten ǁ vrye ende quiit wesen voortdaen wiert tsake dat Dyrck ende Margriet voirs. desen tegenswoirdigen brief verloeren het waer bii brande bii dieften oft anders ǁ eenige ongevalle hoe dattet waer soe geloven wii Dyrck ende Margriet voirnoemt eenen anderen brief weder te geven sonder haeren coste geliicks den transscrifte ǁ van desen brieve alsoe goet met onser gemeente poorten zegel besegelt alle voirs. saken ende vorwairden sonder enigerhande argelist des tot enen oirconde ǁ ende in kennisse der wairheden hebben wii desen brief bezegelt met onse gemeene poorten zegel hier aen gehangen gegeven int iair ons heeren dusent ǁ vierhondert sesse ende tseventich opten seventienden dach in meye ende want wii borgermeesteren scepenen ende raid der voirs. stad van Breda desen voirs. ǁ fransiinen brief alsoe gesien hebben ende hoeren lesen goet gans gave ende was besegelt met eenen gruenen uuthangenden segel ongecancelleert sonder eenige ǁ rasuere oft afdragende smette geliic voirs. is soe hebben wii borgemeesteren scepenen ende raide der voirs. stad van Breda der selver stadzeghel aen ǁ dit vidimus doen hangen opten seventhiensten dach van decembri int iair ons heeren dusent vierhondert drientnegentich
Dorsale aantekening:
N31 ǁ 1493 ǁ Liiffrent op ǁ N31
