[Geertruidenberg]

Yc ioncfrow Katheline van Ypelair weduwe Peters van Hambroeck doe cond allen luyden want over mids zwaren ǁ ende groten onverdrachliken last van orlogen van brande ende vanden water den eerbaren scepenen rait ende ghemeen ǁ re stede van Sente Geerdenberge overgecomen is alsoe sii by brengen ende clagen dat sii in gheenre manieren en ver ǁ moge te betalen alsulke liiftocht renten als ic ende vele andere personen iairlix hebben op die stede van Sente ǁ Geerdenberge voirs. dair om my die voirscr. scepenen raet ende ghemeen stede van Sente Geerdenberge haren noot ǁ ende last getoent hebben biddende om gracie van iair tot iare van alsulken sesse nobele als ic tsiaers hebbe ǁ tot minen live op die stede van Sente Geerdenberge voirgen. soe doe ic te weten dat ic aen gesien hebbe ǁ den noot ende last voirgen. ende met eenre composicien metten voirscr. heren scepenen rade ende gemeynre stede van ǁ Sente Geerdenberge voirs. overgecomen bin in deser manieren dat ic ioncfrow Katheline voirs. my nu voortaen ǁ sal laten genuegen miin leven lanck met twelff gouden Wilhelmus Hollantschen schilden goet ende custbair ǁ off die weerde dair voir in anderen goeden gelde elx iairs tot twee terminen te weten is te Kerssavonde ende ǁ te Sinte Ians daghe Baptisten te midzomer ende tot elken termine voirs. sesse der selver gouden Wilhelmus ǁ Hollantsche schilde ende dies sal ic mine terminen manen oft doen manen van minen wegen als sii verschenen ǁ siin, ende na dien dat ic gemaent hebbe oft hebbe doen manen soe salmen my betalen bynnen eenre maent ǁ na dien dat ic gemaent hebbe oft hebbe doen manen sonder minen cost met alsulker vorwaerden weert ǁ sake dat ic niet betailt en werde bynnen eenre maent na elken termine alsoe voirscr. staet ende ic hedde ge ǁ maent oft doen manen soe sullen mine brieve dan bliven staen in huerre macht die ic vanden sesse nobelen ǁ voirscr. hebbe ende des torkonden ende in kennissen der wairheyt soe hebbe ic ioncfrow Katheline voirscr. minen ǁ zegel aen desen brieve gehangen ende hebbe voort gebeden Ianne van Ypelair minen neve dat hii om der meerre ǁ kennissen desen brieff met my besegelen wille dwelc ic Ian van Ypelair voirscr. om beden van ioncfrow ǁ Kathelinen miinre moyen voirscr. gherne gedaen hebbe ende hebbe des torkonden minen zeghel by der voirs. ǁ ioncfrow Kathelinen miinre moyen zegel aen desen brieve gehangen inden iair ons heren dusent vier ǁ hondert neghen ende dertich vier ende twintich daghe in september