Oisterwijk

Ian van Catwiick ende Aert Aert Herman Nouden soens soen openbaerliic hebben onder hen een erfwyssellinge gemaict ende gedaen vanden erfenissen hier onder gescreven ǁ tot hen als sii seyden behoerende overmyds welker erfwiissellinghe Soe sal Ian van Catwiick voirs. hebben houden ende erfeliic besitten driie lopensaet lands off daer ǁ omtrent in alle der groetten dat sii dat bepaelt hebben gelegen inden ackeren van Oesterwiick teiinden der kercken te Hukelem waert metter eenre siiden aen Aert Aert Herman ǁ Nouden soens erve voirs. ende metter ander siden aen Ians erve van Catwiick voirs. streckende van den weghe die tot Hukelem waert gheet totten halven waterlaet ǁ toe die doer die hoeve ten bighaerden gheet als sii seyden. Op welke drye loopsaet lands off daer omtrent voirs. dese voirs. Aert Aert Herman Nouden soens soen ende ǁ opten alingen rechte hem daer in enigherwiis toebehoerende tot behoef Ians van Catwiick voirs. witteliic ende erfeliic heeft verteghen halmeliic als daer toe behoerliic is ǁ Ende myds welker erfwissellinge Soe sal Aert Aert Herman Nouden soens soen voirs. hebben houden ende erfeliiken besitten twee lopensaet lands off daer omtrent ǁ gelegen inden selven ecken in alle der groetten dat sii daer bepaelt liggen tusschen den erve Aerts Aert Herman Nouden soens soen voirs. aen die een zide westwaert ǁ ende tusschen den erve Aerts Wolfaerts op die ander side oestwaert streckende van den weghe die tot Hukelem waert gheet totten halven waterlaet toe geheyten die Riit is ǁ noch hier toe een lopensaet lands off daer omtrent gelegen opten selven wech die tot hukelem waert gheet neffen den erve Aert Aert Herman Nouden soens soen aen die ǁ een side westwaert ende den erve Aert Wolfaerts voirs. aen die ander side oestwaert streckende vanden weghe voirs. totten erve Aert Wolfaerts voirs. In alle der groette ǁ dat daer gelegen is Op welke drye lopensaet lands lestgenoemt dese voirs. Ian van Catwiick ende opten alingen rechte hem daer in enigherwiis toebehorende tot ǁ behoef Aerts Aert Herman Nouden soens soen voirs. witteliic ende erfeliic heeft verteghen halmeliic als daer toe behoerliic is Ende hebben geloeft dese voirs. Ian ǁ van Catwiick ende Aert Aert Herman soens soen voirs. als schuldenaren principael op hen ende op allen hoer guede alsulcken erfwissellinge ende vertiidenissen deen ǁ den anderen eweliiken vast ende gestede te houden ende in hoeren name te doen houden sonder enich wederseggen orkonden hebben hier overgheweest scepenen in Oester ǁ wiick Henrick van Ethen ende Ian vander Elst die hoer seghelen in getuigenisse hier aen hebben gehangen int iaer ons heren dusent vyerhondert dertich en acht ǁ des anders daechs na sente bartholomeeus dach apostels

[***] Io. Catwiick

Dorsale aantekening:

Ian van Catwiick