Terheijden

Wij Huijgh Dingman Mathijs zone ende Christiaen Back Frans zone schepenen Ter Heijden oirconden dat ǁ voir ons quamen Cornelis Joris Dijrcx zone als voight, ende Cornelis Jan Jan Pauwels zone als toesiender, samentlick ǁ in den name van Adriaenen, Adriaens, ende Jenneken wijlen Harman Jan Gherits zoons diemen noemde Harman Jan ǁ Zeben ombejaerde kijnderen, ende lijden dat zij om ende mits een somme van gelde hen vol ende al betaelt zijnde ǁ wederom vercoft getransporteert ende overgedragen hebben, transporteren ende dragen over met desen Jacoppen ǁ Adriaen Jans zone, inde Gruenstrate onder Oosterhout woonende, de twee rijns gulden ende thien stuvers ǁ elcken rijns gulden tot veertich grooten vleems erfchijns ter quijtinge in desen doirsteken schepenenbrieve, wesende ǁ van date int jaer MV^c achtenvijftich zessentwintich dage in januario, begrepen, zoo dat de voirgen. Jacop ǁ Adriaen Jans zone de zelve twee rijns gulden ende thien stuvers erfchijns ter quijtinge wederom hebben ende ǁ heffen zal zoo goet ende quaet ende in zulcken manieren alse zijn, ende op Denijsen Cornelis Berthels zone ǁ geheven worden, zonder dat de voight ende toesiender inden name vande kijnderen wijlen Harman Jan Gherits ǁ zoons voirs. in ennige waernisse vande zelve rente gehouden zullen zijn, ende allet ghene des vande zelve ǁ twee rijns gulden ende thien stuvers alnu verschenen ende ombetaelt mach staen, ende de voirgen. Jacop Adriaen ǁ Jans zone daer af gecrigen zal connen, zal den zelven Jacoppen volgen ende blijven, voirt zoo hebben de ǁ voight ende toesiender vande kijnderen wijlen Harman Jan Gherits zoons voirs. bij honnen eede geaffirmeert, dat ǁ zij hier in gedaen ende gesocht hebben den meesten oirbaer ende proffijt vande zelve kijnderen, nae honnen ǁ besten zinnen ende verstande, in welcke vercofte twee rijns gulden ende thien stuvers erfchijns voirs. de voirgen. ǁ Jacop Adriaen Jans zone gevest is ende toegedaen met vonnis ende met recht, zoo datse hem zeker zijn ende ǁ vast, met vorwaerde dat hij hier af doen zal alle gebuerlick recht, in oirconden desen brieve met onse zegelen ǁ  bezegelt, int jaer ons heeren duijsent vijfhondert vijerentzestich eenentwintich dage in meerte ǁ Corput ǁ