Oisterwijk

Adriaen sone wylen Jan Steven Hessels als man ende momboir Jenneken sijne huysvrouwe

dochtere wylen Jan Jan ǁ Willemss. van der Vloet heeft wettelyck ende erffelyck vercocht Gielisen Janssen de Weir als provisoir ǁ vande broederschappe van onser liever vrouwen inden kercken van Oisterwyck tot behoeff vande selve ǁ bruerschappe, eenen jaerlycken ende erffelycken chyns van drije karolus gulden van twintich stuveren tstuck ǁ oft de werde daer van in anderen goeden gelde, te vergelden ende te betalen allen jaer erffelycken ǁ int hoochtyt van lichmis waeraff den iersten betaeldach wesen sal int hoochtyt van lichmis den ǁ ierstcomende, van ende uuyt een stucxken ackerlants twee lopensaet oft daer omtrent begrypende gelegen     ǁ inde prochie van Oisterwyck in Udenhoudt ter plaetsen genoempt op Hoochoudt inde ackeren ǁ aldaer tusschen erffen Peter Wouter Peterss, aen deen syde noirtwaerts ende erffenisse Jan Janss [***] ǁ aen dander syde suytwaert streckende metten eenen eynde aen erffen Jan Cornelis Witlocx ende metten ǁ anderen eynde aen erffen toebehoorende aende vrouwen gasthuys ten Bosch [***] om den voirs. ǁ chijns vande voirs. bruerschappe in eenen erfrecht te hebben ende te besitten gelovende den voirs. ǁ Adriaen vercoper als schulder principael op hem ende op alle syne goeden [hebb]ende ende vercrygende ǁ den voirs. chyns van drye karolus gulden der voirs. bruerschappen wittelijcken erffchijns schuldich ǁ is te waren ende t'voirs. onderpandt voirde jaerlyxe betalinge vande voirs. chyns altyt goet ǁ seker genoech ende weldogende te houden ende te maken ende allen anderen commer ende calangie ende aentael ǁ daer inne wesende der selver aft te doen gehelycken, met conditie dat ǁ die voirs. Adriaen den voirs. chyns van drye karolus gulden sal mogen lossen ende quyten altyt ǁ alst hem gelieven sal smaels ende eens mette somme van vyfftich gelycke karolus gulden oft de werde ǁ daer voir in anderen goeden gelde nae evaluatie vande hove van Brabant geprocesseert synde ǁ behoudelyck dat hy gehouden sal wesen den loss een halff jaer te voren wettelyck op te seggen ǁ Ende staet te …ten dat den hooftpeningen van dese rente geprocesseert sijn by affquijtinge ǁ van een rente van drye karolus gulden tsjaers die Cornelis Claes Smits der voirs. bruerschappen ǁ geldende is geweest in eene meerdere rente van sess karolus gulden waer aff dander helft voirgaende ǁ oyck is gequeten geweest soo men verclaerden, Getuiygen waren hier over Schepenen in Oisterwyck ǁ Jan Adriaen Poirters ende Jan van Buerden die heure segelen in getuygenisse hieraen hebben ǁ gehangen opten twintichsten dach vande april int jaer ons heeren duysent sesshondert ende ǁ sevenentwintich

L van Loevel [***]