's-Hertogenbosch

Alzoo Scepenen, Gezworens, Raedtsluijden, Borgemeesteren, kerckmeesteren, Heijlichgeest ǁ meesteren, dekenen vanden wullen ambachte, ende een deel vanden notabelsten ende meest gegueden soo in persoon, als in gueden der ǁ vrijheijt van Oesterwijck, hadden wettelick ende erffelick vercost Jannen Lievens van Mennen eenen jaerlicken ende erffelicken ǁ chijns oft lossrenthe vande twelff carolus gulden, van twintich stuvers t'stuck, oft de weerde daer voor in anderen gevalu ǁ eerden gelde, te betalen alle jaer erffelick opten twintichsten dach der maendt novembris, gelijck in eenen brieff be ǁ zegelt metten grooten zegele van Oosterwijck daerop gemaeckt breeder staet begrepen, ende alzoo daernae Peeter Aertsen ǁ van Os als wittich man ende momboir van Anneken zijne huijsvrouwe, dochtere des voors. wijlen Jans Lievens van Mennen ǁ de voors. losrenthe van twelff carolus gulden tsiaers erffelick opgedragen, gecedeert, ende overgegeven hadde Adriane ǁ weduwe wijlen Jans van Loon, ende Metken weduwe wijlen Jans van Emmerick ende dochtere Jans van Loon voors., gelijc ǁ in Scepene brieven van Shertogenbossche daerop gemaeckt breeder staet begrepen, wesende vander date den negentiensden ǁ dach der maendt Martij, anno vijfthienhondert vijffendetachtentich, Soo is gestaen ende gecompareert voor scepenen ǁ ondergeschreven Anneken dochtere des voors. wijlen Jans van Emmerick vanden selven ende de voors. wijlen Metken zijnen ǁ huijsvrouwe te samen geprocreert, Met haeren momboir bij haer hier toe vercoren ende haer vanden richter nae gewoonte ǁ gegeven, d'eene hellichte vande voors. jaerlicke ende erffelicke rente van twelff carolus gulden, heeft zij wittelick ende ǁ erffelick opgedragen ende overgegeven heeren en meester Thomas van Emmerick priestere ende beneficiaet inde cathedrale ǁ kercke van Sint Jan evangelist binnen dese Stadt haeren neve sone Jans van Emmerick, te samen mette voors. brie ǁ ven ende den alinghen recht haer inde voors. brieven ende den inhoudt van dien eenichssints competerende, ende met allen den ǁ achterstel vande hellichte der rente voors. verschenen ende onbetaelt staende, soo men verclairde, ende heeft daerop ver ǁ thegen helmelinghe in maniere in dien gewoonlijck zijnde, gelovende de voors. Anneken, met haeren momboir voorn. ǁ als schulderesse principael onder verbant van haeren persoon ende alle haere goedens present ende toecomende, dat zij tvoirs. ǁ opdragen, overgegeven, ende verthijden ten eeuwighen daeghen vast, stedich, ende van weerden zal houden sonder eenich weder ǁ segghen, ende dat zij allen commer, calaengie, ende aentael inde voors. hellichte der jaerlicke ende erffelicke rente voorn. ǁ wesende oft commende den voorn. heere ende Meester Thomas van Emmerick haeren neve aff sal doen geheelicken, ende ǁ staet te weten, dat dese transporte is geschiedende in voldoeninge van alsulcke hondert gulden, eers als de voors. ǁ Metken weduwe wijlen Jans van Emmerick bij haeren testamente opten thienden dach Januarij, anno sesthien ǁ hondert ende een gemaeckt der voors. Anneken haere dochtere voor uuijt gelegateert hadde, soo men verclairde, ǁ Getuijgen hebben hierover geweest Scepenen in Shertogenbossche Jacob Vercuijlen ende Laureijns Janssen ǁ de Leeuw, Gegeven den derden dach der maendt Aprilis, int jaer ons heeren duijsent sesshondert ende ǁ negenentwintich

G Ruijs secretaris