's-Hertogenbosch

Henrick sone Peeter Wijten woonende in Udenhout onder Oisterwijck, heeft mits desen wittelijck ǁ ende erffelick vercocht Jacob Janss. van Bladel coopman, Eenen jaerlicken ende erffelicken chijns van sesse Carolus ǁ gulden tot twintich stuijvers inne goeden gancbaeren gelde elcken gulden gereeckent, te betaelen alle jaer, erffelick ǁ opten veertienden dach der maent martij ende voorden iersten termijn van betaelinge den veertienden ǁ dach martij Anno XVI c vijffenveertich, Ende binnen deser stadt vrij van alle beeden, exactien, subventien ǁ tiende, twintichste, honderste, meerdere ende mindere penningen, commeren, scattingen ende lasten ǁ gewoonlijcke, ongewoonlijcke, ingestelt ende naemaels ingestelt te wordden egeene lasten uutgescheijden ǁ te leveren van ende uut huijs, erve, hoff, schuere, henne gronden ende ackerlant dienaenliggende groot ǁ omtrent t'samen een maldersaet lants, gestaen ende gelegen in Udenhoudt onder de parochie ende dingbanck ǁ van Oisterwijck voors., tussen erve der kijnderen Arien van Eerssel noort west aen d'een zijde, ende tussen ǁ Creijten heijde aldaer aen d'ander zijde, streckende vander gemeijnstraet tot op erve vande proprietariss ende ǁ erffgenamen vander Creijtenmolen, soo hij verclaerde, vanden selven Coopere metten erffrecht te ǁ hebben ende te besitten, ende heeft die voorn. vercooper den voors. chijns den voorn. Coopere opgedraegen ǁ met helmelinge vertijdenis inne maniren indien gewoonlijck zijnde, Geloevende die voors. vercooper ǁ als sculdenaer principael op verbant van sijnen persoon ende alle sijne goederen present ende toecomende ǁ zal hij den voorn. Coopere vanden voors. chijns sculdige ende gerechte sal doen warantscap, ende dat hij allen ǁ anderen commer, calangie ende aentael int voors. onderpandt wesende oft comende den voorn. Coopere aff ǁ zal doen geheelicken, Ende dat hij oijck t voors. onderpandt voor de betaelinge des voors. chijns den voorn. ǁ Coopere jaerlicx daeruut, als voor, te vergelden, altijt goet genoch ende welduegende sal maecken, ende ǁ houden, mit conditien dat de voorn. vercooper den selven chijns tot allen tijden sal mogen lossen ende ǁ quijten ten eenemael metter somme van hondert carolus gulden tot twintich stuijvers goets gancbaer ǁ gelts, ende metten loopenden jaerchijns ende achterstellen ten tijde der afflossinge vande voors. chijns t'achter ǁ ende ombetaelt staende, Behoudelijck dat men den los een halff jaer te voorens wittelick sal vercondigen ǁ ende opseggen, Getuijgen waeren hierover scepenen in s'Hertogenbossche Gerart Tielemans ǁ ende Johan vanden Berch, Gegeven den veertienden dach der maent meert int jaer ons ǁ heeren duijsent Sesshondert vierenveertich ǁ J. van der Meulen littera emptoris [***] Secretaris M ǁ

Dorsale aantekening:

Udenhoudt onder ǁ Oisterwijck ǁ constitutie van VI gulden ǁ voort casseren bijde momboirs ǁ betaelt IX stuijvers