Loon op Zand

Inden naem Goeds amen Condt ende kenlyck sij eenen yeghelycken die dit tiegenwoirdich instrument sullen sien off hoeren ǁ lesen dat inden jaer ons liefs heeren Jhesu xpi(christi) dair men screeff duysent vyffhondert ende neghetien der sevender ǁ indictien opten elfften dach der maent Augusti omtrent vier uren nae myddach Der pontificatien ons alre heylichste ǁ vaders in gode heere heer Leonis overmits der gratien Goeds thiende paeus dies naems in synen sevensten jaer, opten ǁ toecomenden huwelick by der heyliger kercken tusschen eerbare persoenen te weten meester Adriaen die Becker surgyn ǁ myns heeren ende der stat van Bergen als toecomende brudegom ter eenre ende joffrouwe Elizabeth wittighe dochter ǁ wijlen Jans Verspant als toecomende bruyt ter andere zijden Sijn verscheenen voir my notarijs ende getuygen hier onder ǁ gescreven Eerbare personen te weten die voirs. meester Adriaen ende joffrouwe Elizabeth inden naem van hen selven ǁ Ende hebben by raede vander selver Elizabeth vrienden ende maegen daer present synde getracteert ende gesloten ǁ zeckere conventien ende huwelixe voirwarden in formen ende manieren hier nae volgende Te weten dat die voirs. ǁ meester Adriaen ende joffrouwe Elizabeth (als man ende wyff dat behoerlyck syn te doen) voir die heylighe kercke trouwen ǁ sullen nae der ordinantien vander heyliger kercken Item noch eest geordineert ende vervorwart dat die voirs. toecomende ǁ bedgenoten tot hulpe des selffs huwelicx inbrengen sullen allen huer gueden beruerlycken ende onberuerlycken haeffelycken ǁ ende erffelycken, tot wat plaetsen die gelegen syn, ende men die bevynden sal moegen, hoe ende in wat manieren die selve ǁ toecomenden bedgenoten aencomen moegen wesen ofte sy vercregen hebben Item voert soe hebben die selve partijen ǁ vervorwart dat die lancxste levende van hen beyden toecomenden bedgenoten allen dese voirs. gueden haeffelycken ende ǁ erffelycken in manyeren voirs. by hen tsamen inbracht nae doot vanden yerster afflivicheyt tsy bynnen off buyten den yersten ǁ jaer als sy vergadert sullen wesen synen off haeren leven lanck besitten sal, in manieren hier onder geruert, te weten dat ǁ inden geval sy nae doot vander yerster afflivicheyt van hen eenighe wittighe geboert van hen tsamen verwect achterlieten ǁ ende die selve geboerte als zy tot haeren mondighen jaeren sellen gecomen syn eenighen wittighen huwelijck by rade vanden ǁ twe naesten van huerer beyder zyden vrienden deden off doen wolden, off dat sy hen tot eenighen gheestlycken staet ǁ gaven, dat die selver langste levende die selver geboert off geboerten sal gueden nae raet van hen der beyder naeste ǁ vrienden ende maghen, ende off die selver geboerten huwelijck deden off yemont van hen dede sonder consent vanden ǁ lancxste levenden van hen beyden ende hoeren twe naeste maegen van beyde zyden als voirs. is, soe sall die lancxste ǁ levende gestaen ende vry wesen gevende den selven geboert off geboerten allen jaer een pont groet vleems ende nyet meer ǁ alsoe lange die lancxste levende inder menschelycker natueren blyven sal Ende nae doot vanden lancxste levende sal alsulke ǁ geboerte staen inder deylinghen van hunnen beyden gueden op sijn kyns gedeelt ende daer mede te vreden wesen nyet tegenstaende ǁ dat alsulke geboert nyet alsoe veel te voeren gehadt en heeft als die ander gehadt muchten hebben Ende inden geval sy nae ǁ doot der yerster afflivicheyt van hen beyden egheen wittighe geboert van hen tsamen verwect en hed den noch achterlyeten ǁ sou hebben die selve partijen vervorwart dat alle alsulken erffelycken gueden als sy in deser huwelixer vorwarden by malcanderen ǁ sullen inbracht hebben nae der doot vanden lancxste levenden van hen beyden sullen wederomme comen succederen ende verstorven ǁ totten trechten erffgenamen vanden stronck ende des gheens daer zy affcomen syn, Item noch soe hebben die voirs. toecomende ǁ bedgenoten vervorwart dat die lancxste levenden van hen beyden allen erffelycken ende haeffelycken beruerlycken ende onberuerlycken ǁ gueden die sy by malcanderen vercryghen moegen ende oeck allen haeffelycken gueden die sy by malcanderen inbrengen ǁ sellen erffelycken besitten houden ende nae synder belieffen daer aff disponeren sal moeghen alsoe verre sy eghee(ne) wittich kynt ǁ off kynder tsamen verwect levendich achteren laeten ende des so sal die lancxste levende betallen allen huere wittighe ǁ scult ende oeck die costen vanden uuytfaert vanden ghenen die yerst van hen beyden afflivich worden sal welcke uuytfaert ǁ die lancste levende sal sculdich syn te doen eerlycken ende temelycken nae hoerder beyder staet Een waer dat die voirs. ǁ toecomende bedgenoten tsamenderhant in hennen leven vanden voirs. dinghen of eenich van hen anders ordineerden ǁ ende disponeerden waer van sy macht ende autoriteyt tot hen behalden enden gereserveert hebben, welcke dinghen als ǁ boven gescreven staen hebben die voirg. toecomende bedgenoten inden naem als boven gekest in hant myns notarys hier ǁ onder gescreven dat tot behoeff allen den ghenen die daer toe interesse hebben off sellen vercrighen wittelyck stipulerende ende ǁ ontfangende die voirs. contracten ende huwelixe voirwarden vast ende stadich te houden ende metten werck te volbrengen ǁ ende dair teghen nyet te doen by hen selven off yemant anders heymelyck off int openbaer in enigher manyeren off met ǁ eenighen recht gheestlyck off weerlyck allen hun gueden hebbende ende vercrigende daer toe verbyndende Ende voerts om dese ǁ dinghen in allen hennen particulen tot meerder vryheyt ende vasticheyt te hebben Soe hebben die voirs. partyen gerenuncieert ǁ ende affgegaen soe verre sy macht hebben allen exceptien previlegien deceptien evasien auwe ende nyeuwe vonden, rechten ǁ statuten ende privilegien myts den welcken die voirs. c(on)tracten ende huwelixe vorwarden te nyet off gebroeken souden gedaen ǁ moegen worden allet sonder droch arch ende argelist Ende begheerde dese voirs. partyen dese dinghen int geheel macht te ǁ hebben ende vertuyt in allen rechten gheestlyck ende weerlyck als een gerechte verbyntenisse ende huwelixe vorwarde doegen ǁ mochte ende schuldich waer te geschien nyet wederstaende off hier bynnen eenighe clausule off pont van rechs off costuyms ǁ weghen off daden behoerlyck vergheten weer versat off achtergelaten Ende begheerde noch die selve partyen dit ǁ inder bester formen gesat ende gescreven ende hen daer aff een off meer instrument off instrument gemaect ende ǁ gescreven te hebben Dese dinghen sijn aldus geschiet opten huyse des heeren van Venloon op die Raetdcamer aldaer ǁ inden jaer indictie dach maent ure ende pontificatien boven gescreven Daer by ende aenwesende eerbare personen te weten ǁ heer Jan Zuetrix vice cureyt der kercke van Venloen ende vrome Adriaen Jonckeren Robbrecht van Grevenbroeck heere ǁ tot Venloen voirs. ende Wynant Massereel casteleijn tot Huesden totten saeken voirg(enoemd) te tuygen geroepen ende ǁ sunderlinge gebeden