's-Hertogenbosch

Jan Dierx Janssen wonende tot Loon op Sant ter plaetse genoempt het Marie Wielken als wettich man ende momboir van Maijken sijnne huijsvrouwe dochtere wijlen ǁ Cornelis Bastiaenssen heeft mits desen wettelijck ende erffvelijck vercoft Henricken Ruijsch secretaris deser stadt tot behoeff van d'heer ende meester Cornelis vander Merendonck licentiaet ǁ inden rechten ende raedt deser stadt eenen jaerlijcken ende erffvelijcken chijns van twelff carolus guldens ende thien stuijvers tot twintich stuijvers goets ganckbaers gelts elcken gulden ǁ gereeckent, te betaelen alle jaer erffvelijck opten eersten dach der maendt van julio, ende voorden eersten termijn van betaelinge opten eersten julij anno XVI^c t'sestich, ende binnen dese stadt ǁ vrij van alle beden, exactien, subventien, commeren, schattingen ende lasten, ingestelt oft noch naermaels ingestelt te worden eggeene lasten uijtgescheijden te leveren, van ende uut een stuck ackerlandts ǁ ontrent drije loopensaten groot sijnde mette timmeringe daer op staende gelegen onder de parochie ende ter plaetse voors., tusschen erve der kijnderen wijlen Andries Jan Goossens ǁ oistwarts aen d'een sijde, ende tusschen erve Bastiaen Cornelis Cloostermans westwarts aen d'ander sijde streckende noortwarts vanden Hollandtschen dijck totten hoeck aldaer toe suijtwarts ǁ ende alnoch van ende uut een stuck ackerlandts ontrent sess loopensaten begrijpende gelegen ter plaetse voors. tusschen erve Bastiaenssen Cornelis s. voors. oistwarts aen d'een sijde ende ǁ tusschen erve der voors. kijnderen Andries Aert Goossens westwarts aen d'ander sijde, streckende vanden voors. Hollandtschen dijck totten voors. hoeck toe, soo hij verclaerde, vanden selven meester ǁ Cornelis vander Merendoncq metten erffrecht te hebben ende te besitten, ende heeft die voors. vercoopere den voorn. chijns den voors. heere secretaris Ruijsch tot behoeff vanden selven heere ǁ Merendoncq opgedraegen met helmelinge vertheijdenisse in maniere indijen gewoonelijck sijnde, gelovende die voors. vercoopere als schuldenaer principael op verbant sijnnen ǁ persoon ende alle sijnne goederen present ende toecomende, dat hij den voorn. heere Merendoncq vanden voors. chijns schuldige ende gerechte sal doen warantschappe, ende dat hij allen anderen ǁ commer, calangie ende aentael inde voors. onderpanden wesende oft comende denselven heere Merendonck aff sal doen geheelijck, ende dat hij oijck de voorn. onderpanden voorde ǁ betaelinge desselffs chijns den voorn. heere Merendoncq jaerlijcx daer uut als voor te vergelden altijt goet genouch ende weldeugende sal maecken ende houden, met conditie in desen toegedaen dat de voors. ǁ vercoopere den voorn. chijns van twelff gulden ende thien stuijvers s'jaers tot allen tijden sal mogen lossen ende quijten t'effens ende t'eenemael mette somme van tweehondert carolus gulden tot twintich ǁ stuijvers goets permissie gelts elcken gulden gereeckent, ende metten loopenden jaerchijns ende achterstellen ten tijde der afflossinge daer van ten achteren ende onbetaelt staende, behoudelijck dat men ǁ schuldich ende verbonden sal sijn den voorn. los een halff jaer te voorens wettelijck te vercondigen ende op te seggen, getuijgen waeren hier over schepenen inne 'sHertogenbossch Gerart Hamel ǁ Bruijnincx ende Johan Franchoijs Balbian. Gegeven den eersten dach der maendt julij int jaer ons heeren duijsent sesshondert negenenvijfftich. ǁ Henrick Ruijsch ǁ littera domini vander Merendonck ǁ

In de marge:

Debet sigillium mits de [***] ǁ nr. 13 ǁ

Dorsale aantekening:

Ick Cornelis vander Merendonck ǁ bekenne dat Hendrick Henricxs s. ǁ Back van wegen [***] ǁ Jan Dirxs s. [***] dese rente ǁ aen mijnen handen heeft gelost ǁ ende gequeten bij constitutie van ǁ een andere zegel, deses voors. ǁ Henrick Back mij heeft gelost ǁ [***] twee ǁ ende sestich ǁ Cornelis van Merendoncq ǁ Loon op Marije ǁ Wielken [***] ǁ