Loon op Zand

Wy Peeter Gysbertssoen ende Bartolomeeus Janssoen sceepenen in Venloon certificeren voirde gerechte wairheyt dat naedyen ǁ Joist Peeterssoen als gemechticht van Herman de Bye den coope hadde van eenen stuck erffenisse metter toebehoirten dat Claes ǁ Geldenssoen toe plach te behoir[en] [gel]egen inde prochie van Venloon over tCleyn Verlaet, metter eender zyde neffen Spirinx ǁ Vairt, metter ander zyde neffen erffenisse Mary Geldens, ende met beyden eynden aenden heer van Loon alzoe hy zeede ǁ ende beraert ende bedaicht was, Soe heeftet Joist voirsc(reve)n weederomme doen veylen om ten hoochsten te vercoopen ende ǁ heefter op geseeten ten huyse vanden zelven Joist een oipenbair herberge weesende dairmen bier ende broot vercoopt ǁ ende heeft Joist dair voor geboeden allet dat inden vonnis bryeff begreepen staet, Zoe heeft Jost doen uuytroepen oft ǁ dair yemondt meer voor geven woude, ende dairentussen zyn gecommen de kynderen Jan Melissoen ende hebben dair noch ǁ voor geboeden anderhalven Carolus gulden jair[lycke] rente met drye afterstellen, dWelck Herman voirs. tot ǁ zynen laste nam om dat hy ouder van datum was dan Hermans bryeff, Soe heeft men doen een keerse ontsteeken ǁ ende Jost vraechden ofte dair yemondt meer voor geven woude een werff, anderwerff, derwerff ende wantter ǁ nyemondt meer voor geven en woude zoe is den coope bleeven metten uuytgaen vanden keersen aenden voirs. ǁ Herman, Dus zal Herman verbonden staen allen ouderen van datum te voldoen binnen den dorden dach, In kennisse ǁ der waerheyt zoe hebben wy sceepenen voirseit onse zeegelen hier aen gehangen, Int jair ons Heeren duysent vyff ǁ hondert vertich ende vier opten zeeventhyenden dach vanden meye

A. de Preyser  

notaris

Dorsale aantekening:

Herman de Bye Jan Domino