's-Hertogenbosch

Goossen Leonarts s. van Hove woonende inde parochie ende heerlickheijt van Venloon ǁ dat men noemt Loon opt' Sant heeft wittelick ende erffelick vercoft Henricken Pieters van Bergen ǁ opten Soom, eenen jaerlicken ende erffelicken chijns van twelff ende eenen halven carolus gulden, tot twintich ǁ stuijvers goets gancbaers gelts elcken gulden gereeckent, te betaelen alle jaer erffelick opten vijffden ǁ dach der maent van meert, ende voorden iersten termijn van betaelingen opten vijffden meert anno XVIc ǁ vijffenvijftich, ende binnen dese stadt vrij van alle beeden, exactien, subventien, commeren schattingen ende ǁ lasten ingestelt ende naermaels ingestelt te wordden egeene lasten uutgescheijden te leveren ende ǁ te vergelden, van ende uut eene erffenisse mit een schoon huijs daerop staende een loopensaet ende een ǁ vierdendeel oft daeromtrent int geheel begrijpende gelegen binnen de voors. heerlickheijt van Venloon ǁ ter plaetse genoemt op de Vaerte omtrent den Eijcken dijck, tussen erffenisse vanden erffgenaemen wijlen ǁ Corstiaen Anthonis s. ende ander erffenisse deses vercoopers hiernae volgende aen d'een sijde oistwarts ende ǁ tussen erffenisse van Gerart Adriaens Tuijmelaer d'ander sijde westwarts, streckende mitten ǁ eenen eijnde zuijtwarts aen sheeren vaerte, ende mitten anderen eijnde noortwarts aenden waterlaet ǁ die Loon ende Sprangh scheijt, Item van ende uut een parcheelken lants van twee loopensaeten oft daeromtrent ǁ groot sijnde gelegen aldaer oistwarts aenden naebescreven drije parceelen van erffenissen deses vercoopers, ǁ zuijtwarts aen erffenisse der voors. erffgenaemen wijlen Corstiaens Anthonis s., westwarts aen t' voors. parceel ǁ erffenisse genoemt de Hoffstadt, ende noortwarts aen erffenisse des voors. Gerarts Adriaens Tuijmelaer, ǁ item van ende uut een parceel lants genoemt de Spie, vier loopensaten oft daeromtrent groot sijnde ǁ gelegen aldaer, oistwarts aende naebescreven drije parceelen van erffenissen, suijtwarts aen t'voors. ackerken ǁ van twee loopensaten, westwarts aen erffenisse des voors. Gerarts ende noortwarts aen erffenisse der kinderen ǁ wijlen Johans van Leeffdael heere in zijnen leven tot Waelwijck, ende alnoch van ende uut ǁ drije parcheelen van erffenisse, d'een neffens d'ander liggende twelff loopensaten oft daeromtrent ǁ tsamen int geheel begrijpende gelegen aldaer, oistwarts aen erve der voors. kijnderen van wijlen jonker Johans ǁ van Leeffdael, suijtwarts aen sheeren vaerte, westwarts eensdeels aen erffenisse der voors. erffgenaemen ǁ wijlen Cortstiaens Anthonis s. mit t'voors. parcheelken ackerlants van twee loopensaten ende de voors. ǁ Spie ende noortwarts aen erffenisse der voors. kijnderen wijlen jonker Johans van Leeffdael, soo ǁ hij verclaerde, vanden selven coopere mitten erffrecht te hebben ende te besitten, ende heeft die voors. vercooper ǁ den voors. chijns den voorn. coopere opgedraegen met helmelinge vertijdenis inne manieren ǁ in dien gewoonlick zijnde, geloevende die voors. vercooper als schuldenaer principael op verbant ǁ van sijnen persoon ende alle zijne goederen present ende toecomende, dat hij den voorn. cooper vanden ǁ voors. chijns sculdige ende gerechte sal doen warantschap, ende dat hij allen anderen commer, calangie ǁ ende aentael in de voors. onderpanden wesende oft comende den voorn. cooper aff zal doen ǁ geheelicken, uutgenomen eenen erffelicken chijns van elff gulden aen Matheus van Nijevelaer ierst ǁ jaerlicx van rechtswegen daeruut te vergelden staende soo hij seeghde, ende dat hij oijck ǁ de voorn. onderpanden voor de betaelinge des voors. chijns den voorn. coopere jaerlicx daeruut ǁ als voor, te vergelden altijt goet genoch ende welduegende sal maecken ende houden, met conditien ǁ inne desen toegedaen dat de voors. vercooper den voors. chijns sal mogen lossen ende quijten ǁ tot allen tijden t'effens ende ten eenemael met de somme van twee hondert carolus gulden ǁ tot twintich stuijvers goets permissie gelts elcken gulden gereeckent, ende mitten loopenden ǁ
jaerchijns ende achterstellen ten tijde der afflossinge daervan t'achter ende onbetaelt staende, ǁ behoudelick dat men den voors. los sculdich ende verbonden sal wesen een halff jaer te voorens ǁ wittelick te vercondigen ende op te seggen, getuijgen waeren hierover scepenen in ǁ sHertogenbossche Johan van Zutphen ende Johan Davidts van Oirle. Gegeven den ǁ vijffden dach der maent meert int jaer ons heeren duijsent sesshondert [vier ende vijfftich]. ǁ N. van Kessel 

Dorsale aantekening:

Goossen Lenaerts van Hove ǁ nu Dirck Gijsberts ǁ binnen ǁ Venloon ǁ

Constitutie van ǁ XII 1/2 gulden ǁ Capitael 200 gulden ǁ