Hilvarenbeek

Wij schepenen geswoeren bedesetters kerckmeestere heijligeestmeestere, ende voirts ghemeijn ghebueren ende ǁ innegesetenen der vrijheijt ende parochie van Hilvarenbeeck met sondaeghse kerckgeboden inder kercke daertoe vergadert sijnde doen condt eenen ǁ ijegelijcken die dese onse brieffven sullen sien oft hooren lesen dat wij inden naeme ende van wegen de gemeijn innegesetenen van Hilvarenbeeck met goeden ǁ rijpen voirraide ende deliberatie mitte gemeijne naebeuren daerop gehouden, hebben voir ons genomen den thooren deser kercke deser voirleden ǁ jaeren tsamen metter kercke door den blixem ende onweder affgebrandt ende geconsommeert sijnde, wederomme opte timmeren ende te ǁ restaureren, omme t'resterende als belfroij clocken ende anderssins de muragien ende metselrijen voirts van allen hagel sneuw regen ende ǁ ander ongeluck ende bederffenissen te conserveren ende om dat tselve werck des te beter tot eenen goeden eijnde soude moegen comen ǁ dwelck niet sonder groote costen nochtans van penningen te furneren en sal connen geschieden daertoe oeck noodich sal wesen eenige ǁ goede persoonen tot bouwmeesters te stellen ende te ordonneren ende omme alsoo dijen conformelijck alles goeden regel te hebben ende ǁ te houden ende omme t'elcker reijse de geheele gemeijnte nijet te derven convoceren ende doen vergaderen soe hebben wij met advijs van ǁ mijn eerwaerde heere den deken deser collegiate kercke wel ende wettelijck inne d'alder berster formen ende manieren dat wij hebben ǁ geconnen ende gemoegen geconstitueert ende machtich gemaeckt constitueerden ende maeckten machtich midts desen die een ǁ den anderen thoonder deser letteren gevende den selven volcommen macht last authoriteijt ende sunderlinghe bevel irrevocable omme ǁ de voors. strucktuere inne onse ende onser gemeijnen naeme met advijs van mijn eerwaerde heere deken voors. tot onsen meesten oirbaer ǁ ende prouffijt te bestaden opte timmeren volgende sekeren modelle ende bestecke daervan berustende onde mijn eerwaerde heere voirs. ǁ de penningen daertoe noodich sijnde, bij alle moegelijcke middelen ter minster quetsinge vande gemeijnte te furneren, alle ǁ nootelijcke gelooften daertoe gerequireert op der gemeijnre naebeuren last te doen oeck daertoe te committeren ende t'ordonneren ǁ alsulcke bequaeme bouwmeesters als deartoe noodich ende gerequireert sullen wesen. Ende voirts allet hijerinne met als dijen ǁ aencleeft meer te doen want naer exigentie vande saecken bevonden sal wordden te behoiren gelovende inne der voirs. qualiteijt ǁ inne goeder trouwen altijt te houden voer goet vast gestendich ende van weerden allen tghene wes bijden selven geconstitueerden ǁ ende elcken van hun in tgene voirs. is gedaen ende voirts gekeert sal wesen sonder daertegen te connen oft te doen inne eeniger ǁ manieren oft recht geestelijck oft weerlijck directelijck oft inderctelijck, ende denselven ende elcken van hun daervan costeloos ǁ ende schadeloos te releveren behoudelijck dat deselve geconstitueerde bouwmeesters oft andere ontfanck ende administratie gehadt ǁ hebbende schuldich ende gehouden sullen wesen van heuren ontfanck ende administratie te doen wettighe rekeninge bewijs ende reliqua ǁ altijt des noot ende versocht sijnde, ende des toirconden hebben wij den gemeijnen schependoms zegele hijeronder aen doen hanghen ǁ ende onsen geswoeren schepenen clerck ende secretaris der voors. vrijheijt ende heerlijckheijt van Hilvarenbeeck hijeronder genoempt ǁ dese doen schrijven ende onderteeckenen opten vijffthienden januarij van den jaere onss heeren duijsent sesse hondert ende achthien ǁ

Ter rela [tie van] schepenen ende regeerders voors. hebbe ick dese als secretaris ǁ
ofte hun[ne clerck], ende tot hunder ordonnantie onderteeckent met mijn gewoonen ǁ
signatu[er, q]uod attestor H.Ghijssels secretaris substituut ǁ

In dorso:
Commissie tot opbouwing of procuratie ǁ van ǁ den toren en kerk ǁ anno 1618, 15 januari ǁ Numero 16 ǁ commissie ende procuratie ǁ tot opbouwinge vanden kerck ǁ ende thooren tot Beeck ǁ [..] ǁ 15 Januarij ǁ 1618 ǁ