Hilvarenbeek

Wy Willem Scellekens ende Aernt van Tuldel scepenen in Beke tuygen ǁ onder onsen gemeynen zegel dat voir ons is coemen Michiel zoen wilnere ǁ Claes Geryts ende heeft erffelycken vercocht ende geloeft te gelden ende te betalen ǁ jaerlijcken ende erffelijcken Eliizabetten dochter wilnere Janss. wilnere Claes ǁ Gerits eenen jaerlijcken ende erffelycken pacht van eenen halven mudde roggen ǁ der maten van Beeck ende een jaerlycke ende erffelycke rente van twintich ǁ stuvers oft die weerde daer voer in munte nu gevalueert wesende alle ǁ jaer op Onser Vrouwen dach Lichtmisse waer aff den yersten dach van betalingen ǁ zijn sal van lichtmisse nu naestcoemende oever een jaer uuijt ende van zynder ǁ huysingen ende hoevinge metter erffenissen daer aenliggende ende daer toebehorende ǁ gelegen tot Esbeeck opt Hoocheynde tussen erffen Goeyartsz. Joesten s. van ǁ Borkel optie een zyde ende metten eenen eynde ende tussen erffen Wouter Otten ǁ optie ander zyde Item noch uuijt eenen stuck dries gelegen opt neder eynde ǁ tussen erffenissen Jan Henricks Adriaenss. van Dun optie een zyde ende tussen een ǁ gemeyn eckerstraet optie ander zyde uuijtgesceijden tsestedeel inden selver ǁ stuck dries dwelck hem niet toebehoert Item noch uuyt eenen ecker lantz ǁ geheijten den vorstenecker gelegen indie cleyen ecker van Esbeeck tussen erffen ǁ Adriaen Jan Janen soen optie een zyde ende metten eenen eynde ende tussen een ǁ gemeyn eckerwech optie ander zijde als hij sede ende Michael voers. ǁ heeft voorts geloeft op hem ende op allen zyn gueden hebbende ende vercrijgende ǁ dese erfrente voers. te waren soemen erfrenten met recht sculdich is te ǁ waren ende dit onderpant altyt goet zeker ende waeldogende te maken ǁ voer die betalinge van der erfrenten voers. Gegeven int jaer ons heeren ǁ duysent vyffhondert ende sevenendertich, den vyften dach january