Hilvarenbeek

Wij Wouter Sledden ende Jacob Jan Huijbrechts schepenen der vrijheijt ende dingbancke van Hilwarenbeeck ǁ tuijghen onder onsen gemeijnen segulen dat voor ons is comen Peter Cornelis Peters als man ende momboir ǁ van Hildegonde sijnder huijsvrouwe dochtere wijlen Michiel Gerart Damen, Ende heeft vercocht ende ǁ geloeft als een schuldenaer principael jaerlicken ende erffelicken te gelden ende te betaelen Andriesen Michielsen ǁ vande Nijeuwenhuijse tot behoeff der schamele huijsarmen der vrijheijt van Hilvarenbeeck uuijt te reijcken in ǁ conformiteijt vanden testamente wijlen Cathelijn dochtere Aert vanden Ven, eene jaerlicken ende erffelicken rente ǁ van elff carolus gulden ten prijse van twintich stuvers elcken carolus gulden gerekent oft de gerichte weerde inne ǁ anderen goeden gelde daervoor, alle jaer op onser vrouwen dach lichtmisse, ende ierstmael van oover morgen lichtmisse ǁ dach ierstcommende vuer een jaer loss ende vrij van alle ordinarise, ende extraordinarise dorps lasten alreede ǁ geimponeert oft alnoch geimponeert te worden welckerhande, ende hoedanich die selve lasten souden moegen zijn oft ǁ genoempt worden egeene uuijtgescheijden uuijt ende van sijne huijsinge hoevinge schuere haere gronden ende ǁ toebehoirten, ende erffenisse, daeraen gelegen ende daertoe behoirende sess lopensaet begrijpende gestaen ende gelegen ǁ binnen der parochie van Hilvarenbeeck, inden gehuchte van Eijsbeeck aldaer tusschen erffenisse Jan Henrick Bruers ǁ met d'oijstensijde ende met die noirdenzijde, tusschen erffenisse Geraets Anchnese van Maerhese hier aff gedeijlt ǁ met die westensijde, streckende met het suijdeneijnde aende vroent, Item in uijt ende van vijfentachtentich ǁ roijen eckerlandts gelegen ter plaetsen voors. aldaer tusschen de Ackerstraet opte Westenzijde, derve ǁ Geraert Michielsen hiertegen afgedeijlt met d'oistenzijde ende met suijdeneijnde, ende met het noirdeneijnde ǁ aen erffenisse Jan Henrick Bruers als hij seijde, ende die voors.Peter als man ende momboir voors. ǁ heeft geloeft als een schuldenaer principael op hem ende alle sijne goederen hebbende ende vercrijgende ǁ dese erffrente te waeren, alsmen erffrenten met recht schuldich is te waeren, ende d'onderpanden voors. ǁ altijt goedt seker ende weldoegende te maecken voor die betaelinge der erffrente voors., met voorwaerden ǁ toegedaen, dat die vercopere alle jaeren op lichtmisse tot sijnen schoonsten als hem gelieven sal, comen sal moegen ǁ ende lossen ende quijten dese erffrente voors. metter somme van tweehondert carolus gulden ten prijse als voor ǁ inne gepermitteerden gelde metter oft naerde ordonnantie ende placcarten van sijne constituant altijt metter ǁ jaerrente ten achteren ende ombetaelt staende Behoudelijck den loss een halff jaer van te voiren op te seggen ǁ Gegeven int jaer onss heeren sesthienhondert eenendertich de lesten dach januarij ǁ [***] Substituut Secretaris ǁ

In dorso:
Voor ǁ de huijsarmen van Hilvarenbeeck ǁ Peeter Cornelis Peeters Hoijmans ǁ XI gulden  die [***] gepasseerd ǁ Cathelijn vanden Venne huijsvrouw Arnoldus ǁ Michiels geweest ǁ