Hilvarenbeek

Wij Roeloff Schilders ende Jan Lauwreijs Sgrevens. scepenen in Beeck tuijgen onder onse gemeijnen zegel dat voir ons is comen Ariaens. wilner ǁ Gijsbrecht Marcelis ende heeft geloeft als een principael schulder meester Cornelijse van Nerven tot behoeff van Jannen ende Marijken ende onmonǁdige kijnderen wilner Pauwels Back dat hij gelost ende betaelt sal den selven kijnderen een jaerlijken ende erffelijcken rente van drije ǁ carolus gulden ende thien stuvers twintich stuvers voir elcken carolus gulden gerekent oft dije rechte werde dair voir in ǁ anderen goeden gelde nu gevalueert wesende alle jaer op Onser Vrouwen dach Lichtmisse waer aff den ijersten dach van betalinge ǁ zijn sal tot Lichtmisse naestcoemende uuijt ende vanden helft in eenen bocht onbedeijlt liggende in dije elst dije geheel bocht gelegen ǁ tusschen erffenis Aerts vanden Poel den ouden optie eene zijde ende tusschen erffenis der weduwe ende kijnderen Marten Scellekens optie ander ǁ sijde streckende van eenen ackerstraete totter erffenis Elizabeth weduwe wilner Anthonis Moonen met haeren kijnderen als hij sede ende Ariaen ǁ voirs. heeft voirts geloeft op hem ende op alle zijn goeden hebbende ende vercrijgende dese erfrente voirs. te waeren alsmen erfrenten met ǁ recht sculdich is te waeren ende dondersaten altijt goet zeker ende weldogende te maken voir dije betaelinge der erfrenten voirs. ǁ met voirwaerden toegedaen dat Ariaen voirs. altijt sal mogen coomen op Onser Vrouwe dach Lichtmisse tot zijn scoonsten ende quijten ǁ ende lossen dese erfrente voirs. metter somme van tsestich carolus gulden twintich stuvers voir elcken carolus gulden gerekent ǁ oft dije werde dair voir in anderen goeden gevalueerde gelde metter jaerrente ende metten achterstelle daeraff ǁ
Behoudelijck dat hij den losse een half jaer sculdich zal zijn te voiren op te seggen Gegeven int jaer ons heeren dusent ǁ vijfhondert drije ende vijftich sesthien dage in augusto ǁ

In dorso:

Ariaen Ghijsbrecht Marcelis ǁ