Vindplaats van het origineel
Tilburg, Regionaal Archief Tilburg, toegangsnummer 1431, Charterverzameling Hilvarenbeek en Diessen, inv. nr. 37.
29 mei 1469
Samenvatting oorkondetekst
Akte van belening door Karel, hertog van Bourgondië etc., van Jan zoon van wijlen Wouters Claes van Vorsselere, van de helft van de helft van 1/3 deel van de tienden van Hilvarenbeek, ten behoeve van de Heilige Geest armen van Hilvarenbeek.
Transcriptie
Kaerle biider gratien Gods hertoghe van Bourgoingnen van Lotharingen van Brabant van Lymborch ende van Luccemborch, greve van ǁ Vlaenderen van Artoys van Bourgoingnen palatiin van Henegouwe van Hollant van Zeellant ende van Namen, mercgreve ǁ des Heylichs Riicx heere van Vrieslant van Saliins ende van Mechlen, doen cont allen luden, dat opten dach ǁ datum van desen voir onsen lieven getruwen riddere raede kemerlinge ende stadhoudere van onsen leenen van Brabant ǁ heren Robbrechte Cottreau, ende onsen mannen van leene hier nae bescreven, mit namen, Gheerde Brant, Cornielise van ǁ Coensborch ende meer andere, quam in propren persone onse geminde Ian soen wilen Wouters Claes van Vorsselere ǁ ende ontfinck aenden selven onsen stadhouder van ons te leene inden name ende tot behoef ter tafelen ǁ vanden Heileghen Gheest te Hilwaerenbeke bii doode wilen Aertus Stamelart, ende uuyt crachte vanden testamente ǁ bii den voirs. wilen Aernde Stamelart in siinre levender tiit gemaict, mits den consente hem dair af bii wilen onsen ǁ lieven heer ende vader diens ziele God genadich zii gedaen ende verleent, die heelicht vander heelicht van eenen ǁ derdendele vander thienden van Hilwaerenbeke ende den toebehoirten der selver, gheliic ende in alle der manieren ǁ die voirs. wilen Aernt Stamelart, de voirs. helicht vander heelicht vanden voirs. derdendeele vander voirs. thyenden ǁ van Hilwaerenbeke ende den toebehoirten der selver in siinre levender tiit vanden voirs. wiilen onsen lieven heer ende ǁ vader vore, ende van ons nae te leene gehouden heeft gehadt, ende onse leenboeken van Brabant dat volcomeliker ǁ inhouden ende begripen, ende dede ons die voirs. Ian Claes inden name voirscr. dair af manscap mit hulden ǁ ende eede van truwen, ende alle andere heerlike diensten nae ons hoofs recht dair toe behoirende, ende ǁ onse voirs. stadhoudere ontfincken dair af in onser manscap, behoudelic ons altiit in desen ende allen ǁ anderen zaken onser heerlicheit, onsen rechte, ende eenen yegeliken den ziinen, des torconden hebben wii ǁ onsen seghel hier aen doen hanghen, gegeven opten neghen ende twintichsten dach van meye int iair ǁ ons Heren duysent vierhondert negen ende tsestich.
Op de pliek
Bii miinen heer den hertoge ǁ prelacien vanden Stathouder ǁ Molenpas
Dorsale aantekening
Tiende bliefft ǁ vanden ontfanck vanden ǁ leen vanden heijligen gheest ǁ dato 29 meij 1469