Dongen

Wij Willem Ian Mermansz. ende Vranck Willem Claijss. scepenen in Donghen oirconden dat voor ons ǁ quam Peeter Gerrits zoen ende Cornelie Geerits dochter met Willem Janss. hueren man ende voight ǁ ende Gheerit Damen ende heeft daer inne vervangen zijn mede erffghenaemen ende Meus Lambrechts Verstege ǁ ende heeft hier inne vervanghen zijn medendheren ten kenden dat zij vercoft hadden om een somme van ǁ gelde die hen vol ende al betaelt was Lambrecht Adriaen Martens een stuck erffs oft weijden ontrent ach(ten)ǁtalff lopensaet groot zijnde oft alsoe groot ende cleijn alst daer gelegen is aen Jacop Peeters erve oostǁwaert ende Adriaen Jans Laers met meer anderen erven westwaert streckenden vanden kerckpat totter ǁ baesdonck toe te vrijen ende te waren met eenen braspenninck tsiaers heeren chijns ende een halff ǁ mengelen wijns tot behoeff der kercken van Donghen ende den sloot aen doostzijde behoort halff ǁ tot desen erve voirs. ende voort ront om dit erve behoort den sloot geheel ten erve voirs. dies ǁ sal dit erve wegen voer ende after uut ter minster scaden ende over dit erve sal wegen Jacop Peeters ǁ de wederhelft van desen oeck ter minster scaden dies mach Lambrecht voirs. halen alsoe veel ǁ sants aen de berge op Lijsbet Geertis erffghenaemen erve als hem van noode sijn sal ende hier in is ǁ Lambrecht voirs. gracht met vonisse ende met rechte dies sal hij daer aff houden gebuerlijcke ǁ rechten tot Donghen ende des torconde bezegelt met onsen zeghelen int jaer ons heeren ǁ dusent vijffhondert vier ende dertich den seventhiensten dach februarij ǁ