's-Hertogenbosch

Jan zoene wijlen Huijberts zoene Peeters Jans ǁ Adriaenssen woonende tot Tilborch aen de Hasselt heeft wittelijck ende erffelijck vercocht Wouteren Aertssen Crillaerts ǁ tot behoeff van Goijaert Diercxz. van Nimmeghen, eenen jaerlicken ende erffelicken chijns van vijffendetwintich Carolus ǁ gulden siaers tot twintich stuijvers goets gancbaers gelts tstuck gereeckent, te betaelen alle jaer erffelick in den hoochtijde ǁ van Sincte Marten in den wijnter, ende voir den iersten termijn van betaelinge in den hoochtijde van Sincte Marten in den wijnter ierstcoemende, anno ǁ sestienhondert ende vijftien, ende binnen der stadt Shertogenbossche vrij van allen beden ons heeren des hertochs, exactien, subventien, thiende ǁ twintichste, honderste, mindere ende meerdere penningen, commeren, scattingen, ende lasten, ordinarisse, extraordinarisse, gewoenlicke ǁ ongewoenlicke, ingestelt, ende alnoch naermaels ingestelt te worddene, egeene lasten uutgescheijden te leveren ende te vergelden, van ende ǁ uut huijs, schuere, schaepskoije, torffkot, mit henne gronden, boomgaert, ende ander erffenissen dijen aenliggende, wesende bijnae ǁ altesaemen ackerlandt, gelegen binnen der heerlicheijt van Tilborch, ter plaetsche genoempt aen de Hasselt, neffen erffenisse ǁ Cornelis Gerit Denen aen deen sijde, ende neffen erffenisse Jan Peeter Heijnen aen dander sijde, Streckende vanden erffve Adriaen ǁ Geraerdt Meeussen ende Cornelis Geraerdt Denen totte gemeijn straete, ende alnoch van ende uut een stuck ackerlandts, drije ǁ lopensaeten lants ofte daeromtrent groot sijnde, gelegen ontrent den erffenissen bovengenoempt, neven erve Geraerdt Goijaertssen ǁ aen deen sijde, ende neffen erve der kijnderen Jan Hendricxz. de Wael aen dander sijde, Streckende van den erve des voors. ǁ Geeraerdt Goijaerts tot op erffenisse Jans Huijben Leijten, Zoo hij verclairden, van den selven Goijaerden Diercxz. ǁ mitten erffrecht te hebbene ende te besittene, ende heeft die voirschreven vercoopere den voorn. chijns den voorscreven ǁ Wouteren Aertssen Crillaerts tot behoeff des voorn. Goijaerts Diercxz. van Nimmegen opgedraegen mit helmelinge ǁ verthijdenisse inne manieren inne dijen gewoenlick sijnde, Geloevende die voirschreven vercoopere als schuldenaer ǁ principael op verbant van sijnen persoon ende allen sijne goederen present ende toecoemende dat hij den voors. Goijaerden ǁ Diercxz. van den voornoempden chijns schuldige ende gerechte sal doen warantschappe, ende dat hij allen anderen commer ǁ calaengie ende aentael in de voornoempde onderpanden wesende oft coemende den voorschreven Goijaerden Diercxz. ǁ aff sal doen geheelicken, uutgenoemen elff penningen grontchijns aen den heere van Tilborch, ende alnoch ǁ dordhalff oirt chijns int boeck van Oisterwijck ierst jaerlicx van rechts wegen, uut sgeens voors. is, te vergelden ǁ staende, Zoo hij verclairden, ende dat hij de voorn. onderpanden voor de betaelinge des voors. chijns den voorn. Goijaerden ǁ Diercxz. jaerlicx, daer uut (soo voorscreven staet) te vergelden, altijt goet genoech ende welduegende sal maecken ende ǁ houden, mit conditien inne desen toegedaen, dat die voorschreven vercoopere den selven chijns sall moegen lossen ende ǁ quijten, tot allen tijden, teffens ende ten eenenmael, mitten somme van vierhondert Carolus gulden, tot twintich stuijvers ǁ goets gelts, ten tijde der afflossinge van wegen den Raide van Brabandt bij placcaet gepermitteert sijnde, elcken gulden ǁ gereeckent, ende met den loopenden jaerchijns ende achterstellen ten tijde der afflossinge van den voorn. chijns ǁ t'achter ende onbetaelt staende, Behoudelijck dat men den voorscreven losch schuldich ende verbonden sall wesen ǁ een halff jaer te voorens wittelick te vercondigen ende op te seggen, Getuijghen waeren hier over schepenen ǁ inne Shertogenbossche Jacob van Balen ende Rogier van Broeckhoeven, Gegeven den dertiensten dach der ǁ maent novembris int jaer ons Heeren duijsent sesshondert ende veerthien

L.Dankers

Dorsale aantekening:

Jan Thomas van Roije kenne dat de momboiren ǁ van de kijnderen Gijsbert Martens wegen Jan Huijbert Peteren tot ǁ Tilborg den chijns int witte van desen ǁ begrepen hebben afgelooft, over sulx

consenteren gecasseert te werden ten prothocolle ǁ Actum desen 7 november 1643. Thomas van Roije

Tilborch XXV gulden ǁ gilt ǁ Jan Huijbert Peter ǁ Janssen aenden Hasselt ǁ Gecomen van Goijaert

Dircxen van Nimmeghen