's-Hertogenbosch

Adriaen sone wylen Adriaens Goyaertss, ende Gerardt sone wylen Cornelis Henricxs beyde wonende tot Tilborch hebben tsamentelyck ende elck van hen int ǁ besonder wittelyck ende erffelyck vercocht heeren Jannen vanden Venne priestere ende beneficiaet van sint Jans Evangelisten kercke binnen der stadt sHartogen ǁ bossche als pater ende confessoir des convents vande derden regule van sinte Francisco genoempt Marienborch gestaen ende gelegen binnen der stadt sHartogenbossche ter ǁ plaetsse genoempt opten Ulenborch tot behoeff derselve convents, Eenen jaerlycken ende erffelycken van twelff ende eenen halven carolus gulden tot twintich stuvers goets ǁ gancbaers gelts elcken gulden gerekent, te betalen alle jaer erffelyck op bamisdach, ende voerden iersten termyn van betalinge, op bamisdach anno XVIc ende vyftien ǁ Ende binnen der stadt van sHartogenbossche vry van allen beeden ons heeren des hartochs, exactien, subventien, thiende, twintichste, honderste, mindere ende ǁ meerdere penningen, commeren, schattingen ende lasten, ordinarisse, extraordinarisse, gewoenlycke, ongewoenlycke, ingestelt ende alnoch naermaels ingestelt te ǁ wordene egeene lasten uutgesceyden, te leveren ende te vergelden, Van ende uut vier lopense ackerlants den voers. Adriaenen toebehoirende, gelegen inde ǁ prochie van Tilborch ter plaetsse genoempt int Sonderlock, tussen erffenisse Corstiaens Olislagers aen deen syde, ende tussen een ander stuck ackerlants ǁ hem vercoper toebehoirende, aen dander syde streckende van eenen wech genoempt den Pelgerwech totte gemeyn straet, Ende alnoch van ende uut een ǁ sestersaet lants, ende drye quartier van een lopensaet malcanderen aenliggende, des voers. Gerarts Corneliss. gelegen inde prochie van Enschot ǁ tussen erffenisse Jans Vendicx aen deen syde, ende tussen erffenisse Joost Deckers aen dander syde, streckende van erffenisse Peters Cauwenberchs ǁ tot eenen wech genoempt den Pelgerwech, soo sy verclaerden, vanden selven convente metten erffrecht te hebbende ende te besittene, Ende hebben de ǁ voers. vercoperen den voers. den voern. heeren Jannen tot behoeff des voers. convents opgedragen met helmelinge verthydenisse inne manieren indien ǁ gewoenlyck synde, Gelovende de voers. vercoperen als schuldenaren principael onversceyden ende een voer all op verbant van henne personen ǁ ende goedens present ende toecomende dat sy den voers. convente vanden voers. chyns schuldige ende gerechte sullen doen warantschappe, Ende ǁ dat sy allen anderen commer calaingie ende aentael inde voers. onderpanden wesende oft comende den selven convente aff sullen doen gehee ǁ lycken, Ende dat sy de voers. onderpanden voer de betalinge des voers. chyns den voern. convente jaerlycx daer uut, soo voers. staet, te vergelden ǁ altijt goet genoch ende weldeugende sullen maecken ende houden mit conditie inne desen toegedaen, dat die voers. vercoperen den voers. ǁ jaerlycken ende erffelycken chyns sullen mogen lossen ende quyten tot allen tyden, teffens ende ten eenemale metter somme van twee ǁ hondert carolus gulden tot twintich stuvers goets gelts ten tyde der afflossinge van wegen den Raede van Brabant by placcaet  gepermitteert synde ǁ elcken gulden gereeckent, Ende metten jaerchyns ende afterstellen die alsdan daer van ten afteren ende onbetaelt staen sullen behoudelyck dat men den voers. ǁ losch schuldich ende verbonden sal wesen een halff jaer te vorens wittelyck te vercondigen ende op te seggen, Getuygen waeren hier over ǁ Schepenen inne sHartoigenbossche Peter van Gestel ende Merten Weremont, Gegeven den sestiensten dach der maent van Octobri ǁ int jaer ons heeren duysent sesshondert ende veerthien