's-Hertogenbosch

Gerardt sone wijlen Jans Peeters. als wittich naegelaten weduer van wijlen Geertruijt zijn ǁ huijsvrouwe dochtere wijlen Stevens Thijssoen wonende binnen der parochie van Thilborch aende Hasenest heeft ǁ wittelick ende erffelicken vercocht Diercken Thomas van Hijnsberch eenen jaerlicken ende erffelicken chijns ǁ van vijftien gulden thien stuvers siaers, tot twintich stuvers goets gelts tstuck gerekent te betalen alle jaer ǁ erffelicken den zesten dach der maent Augusti, Ende voorden ijersten termijn van betalinge den zesten dach der ǁ maent Augusti Anno zestien hondert seven ende twintich, Ende in Shertogenbosche vrij van alle beden ons ǁ heeren des hertochs, exactien, subventien, zoo tiende, twintichste, honderste ende allen andere meerdere ende ǁ mindere penningen, commeren schattingen te leveren ende lasten, ordinarisse extraordinarisse, ingestelt of namaels inne ǁ gestelt te wordene geen uutgescheijden te leveren ende te vergelden van ende uut de helfte van huijs erffve ǁ hoff ende ander erffenis dijen aenliggende, negen lopensen ende dertich roeden lants ofte daeromtrent ǁ int geheel groot zijnde, gelegen binnen der parochie van Thilborch aenden Hasenest voorscreven neffen ǁ erffenisse Jan Peeter Jacops westwaerts aen deen zijde, ende neffen erffenisse Hermans Adriaens ǁ oostwaerts aen d ander zijde, Streckende vande gemeijn straet suijdwaerts tot op erffenisse Jutkens ǁ wedue Peeters Hoirevoorts noortwaerts, Ende alnoch van ende uut de helfte van een stuck ackerlants ǁ seven lopensaet lants ofte daeromtrent groot zijnde, gelegen binnen der parochie voorscreven aen Sinte ǁ Quirijns stock aldaer, neffen erffenisse Marikens wedue Henrick Goossens suijdwaerts aen d een zijde ǁ ende neffen erffenisse Cornelis Gerarts Vrancken noortwaerts aen d ander zijde, Streckende vanden ǁ erffve Wouters Spijckers westwaerts tot op zekere hoeve lants toebehoorende mijnen heere Daubremont ǁ Ende alnoch van ende uut een stuck lants eensdeels saijlant ende eensdeels weijlant, wesende vier lopensse ǁ lants ofte daeromtrent begrijpende gelegen binnen der parochie van Tilborch ter plaetze genoemt Sinte ǁ Quirijns stock, neffen erffenisse Cornelis Gerarts Vrancken aen deen zijde westwaerts ende neffen ǁ erffenisse Goijart Jacops Thonis oostwarts aen d ander zijde, Streckende van erffenisse Wouters ǁ Spijckers noordwaerts tot op erffenisse Bastiaen Peeters Stevens zuijdwaerts zoo hij verclaerden van den ǁ zelven coopere metten erffelicken recht te hebben ende te besitten, Ende heeft de voornoemde vercoopere ǁ den voorsceven chijns den voornoemden cooper opgedragen met helmelinge vertijdenis in manieren inne ǁ dijen gewoonlicken zijnde, Gelovende die voornoemde vercooper als schuldenaere principael op verbant ǁ van zijnen persoon ende van allen zijne goederen present ende toecomende, dat hij den voornoemden coopere ǁ vanden voorscreven chijns schuldige ende gerechte zall doen warantschap, ende dat hij allen anderen ǁ commer, calangien ende aentael inde voorscreven onderpanden wesende ofte comende den voornoemden ǁ cooper aff zall doen geheelicken, uutgenomen het derde paert van achtewintig stuver chijns ende een ǁ negen manneken aenden hertoghe van Brabant uut den lesten onderpande ijerst jaerlix van rechts ǁ wegen te vergelden staende zoo hij verclaerden, ende dat hij oock de voornoemde onderpanden voor de ǁ betalinge des voor. chijns den voorn. coopere jaerlix daer uut als voor te vergelden altijt goet genoch wel ǁ dogende zall maken ende houden Getuijgen waeren hierover schepenen in Shertogenbosche Johan van ǁ Brogel ende Henrick van Zoerendonck, Gegeven den zesten dach augustij int jaer ons heeren dusent zess hondert ǁ ende zessentwintich.

Dankersse. Desen chijns staet te lossen met ij karolus gulden permissie gelts.

Dorsale aantekening:

Geerit Jan Peeters ǁ tot Tilborch