's-Hertogenbosch

Jan soen wilner Jans Pauwelss. heeft wittelijck ende erffelijck vercoft Cornelissen soene wilner Dionijs Mutsarts tot behoef vanden ǁ onmundigen kijnderen Joostens soene des voirss. wilner Dionijs Mutssarts vanden selven Joosten ende Jenneken sijnre huijsvrouwe ǁ dochtere wilner Aerts Anthoniss. tsamen verwect, Eenen jaerlijcken ende erffelijcken chijns van seven carolus gulden twintich stuvers ǁ off die werde daer voer in anderen goeden gelde voer elcken gulden te rekenen, te betalen alle jaer erffelijck inden ǁ hoogtijde van onser liever vrouwen lichtmisse, Ende voirden iersten termijn van betalinge inden hoogtijde van onser ǁ liever vrouwen lichtmisse nu naestcomende, Ende in Shertoigenbossche vrij van alle beden ons heeren des hertochs  exactien ǁ subventien ende andere commer ende lasten gewoenlick ende ongewoenlick ingestelt ende bij avontueren ingestelt te worden ǁ egene lasten vuijtgesceijden te leveren ende te vergelden, van ende vuijt eenen beempt hoijlants eenen halven buender lants oft ǁ daer omtrent begrijpende gelegen inde prochie van Tilborch ter plaetsen genoempt Maesdijck tusschen den dijck geheten ǁ den Maesdijck ter eenre sijden ende tussen erffenisse Marijckens weduwe wilner Jans Hoecx ende haeren kijnderen ter andere ǁ sijden streckende vande gemeijn Leije totten erffenisse der kijnderen wilner Nijclaessens soene Peters Aertss., Alnoch van ende ǁ vuijt eenen beempt hoijlants eenen halven buender lants off daeromtrent begrijpende gelegen aldaer tussen den erffenisse ǁ Marijckens weduwe Jans Hoex ende haere kijnderen voirs. ter eenre sijden ende tussen erffenisse Gerarts Janss. van Raeck ǁ ter andere sijden streckende vande voirs. Leije totter erffenisse der voirs. kijnderen Nijclaessens Peters Aertss. soo hij verclaerden, ǁ vanden selven onmundigen kijnderen metten erffrecht te hebben ende te besitten, Ende heeft die voirs. vercooper den voirs. chijns ǁ den voirn(oempt) Cornelissen tot behoeff vanden voirs. onmundigen kijnderen opgedragen, ende heeft helmelinge daer[o]p vertegen ǁ inne manieren inne dijen gewoenlijck sijnde, Gelovende die voirs. vercoop als sculdenaer principael onder verbant van ǁ sijnen persoon ende alle sijne goedens hebbende ende vercrijgende, dat hij den voirs. onmundigen vande chijns sculdige ende gerechte sal ǁ doen warantscappe, Ende dat hij allen anderen commer calangie ende aentael inde voirs. onderpanden wesende aft ǁ comende den voirs. onmundige aff sal doen geheelicken, vuijtgenomen den grontchijns den heere van Tilborch jaerlicx ǁ ierst vuijt de voirs. onderpanden van rechts wegen te vergelden soo hij seechde, Ende dat hij de voirs. onderpanden ǁ voirde betalingen des voirs. chijns den voirs. onmundigen jaerlicx daer vuijt soo voirs. staet te vergoeden altijt goet ǁ genoech ende welduegende sal maeken ende houden, met conditien hier inne toegedaen dat die voirs. vercooper den voirs. ǁ chijns altijt sal moegen lossen ende quijten tsamen ende teenenmael metter somme van hondert gelijcke carolus gulden ǁ Ende metten chijns des jaers der lossinge ende achterstellen die alsdan vande voirs. chijns ten achteren [***] ǁ behoudelijck dat die voirs. vercooper alsulcken loss een halff jaer te voirens wittelijck sal te kenne geven [ende] opseggen ǁ Getuijgen waeren hier over scepenen in Shertoigenbossche Henrick van Sijnhouts ende Walraven van [***] Gegeven ǁ den tweeden dach der maent van merte int jaer ons heeren duijsent vijffhondert vier ende seventich.

J.Donck ǁ littera liberorum ǁ Duplicetur   Solvunt ambo

Dorsale aantekening:

De onmundige kijnderen Joostens soene Dionijs Mutsartss. ǁ Cornelis Dionijs Mutssaerts ende Henrick Aert Thonniss. als momboir ende toesiender vande kijnderen van ǁ Joost Denijs Mutssaerts hebben bekent ende bekennen midts dese dat dese rente op d ander zijde  ǁ van dese begrepen is gecasseert door ende  [***] nijeuwer overmidts dat hij momboir ende ǁ toesiendere voirs. inde plaetsse van dese rente huijden des dages zijn geweest van een ǁ rente van zess karolus gulden tsiaers [***] onderpandt op zekere goeden binnen Tilborch aen dat Creijevenne ǁ liggende welcke op drachte zijlieden hebben [***] voor scepenen binnen Tilborch van Adriaen ǁ Dionijs Meijnaerts ende Jannen Jan Pauwelss. aldus gedaen inde [*** toeren] tot Tilborch ǁ ter presentie van Cornelis Claess. van Ghierll ende Adriaen Peter Andriess. scepenen binnen Tilborch ende Ghoirle ǁ opten Xe dach in november XVC ende acht entzeventich mij tegenwoordich.

Berijs ǁ 1598