Tilburg

Willem natuerlijcke soon wilnere heeren Jans Soffaerts priester heeft geloeft als een principael schulder te ghelden te gheven ende wel ǁ te betalen Adrianen soon wilnere Peeter Stevenssoon, Eenen jaerlijcken ende erffelijcken chijns van vijff ende tnegentich stuijvers ǁ te betalen een ijegelijck jaer erffelijck op onser Liever Vrouwen dach Lichtmisse, ende voorden ijersten termijn ende dach van ǁ betalinge van onser Liever Vrouwen dach Lichtmisse nu naestcomende over een jaer, vuijt ende van huijs, hoff, schuer ǁ ende schop metten gronde ende erffenisse daeraen liggende ende daertoe behoorende in alde grooten alst gelegen is binnen ǁ der prochie van Goirle ter plaetsen geheijten int Dorp aen Dwilteijnde aldaer tusschen der erffenisse den erffgenaemen ǁ heeren Jans Soffaerts voirscreven toebehoorende deen zijde, ende tusschen der gebuer hovel dander zijde, ende deen eijnde, ǁ streckende metten anderen eijnde aen erffenisse der kijnderen Michiels Wouter Soffaerts, soo hij seijde, Ende heeft ǁ geloeft Willem voirscreven als principael schulder op hem ende op alle sijne goeden, hebbende ende vercrijgende desen voirscreven ǁ chijns te waren, gelijck men erffchijnsen schuldich is te waren, Ende tvoirscreven huijs, hoff, schuer, schop, metten gronde ǁ ende erffenisse daeraen liggende, ende daertoe behoorende altijt goet zeecker genoch ende waeldogende te maecken als ǁ voorden chijns voirscreven, daer jaerlijcx vuijt te vergelden, soo voorscreven staet, Ende alle commer ende calaengie ǁ daerinne wesende altemael aff te doen den selven,Oirconden hebben hier over geweest schepenen in Tilborch ǁ ende Ghoirle Cornelis Claessoon van Ghierl ende Jan Jan Lambrechtssoon van Buerden, die den zegel hens gemeijns ǁ schependoms desen brieff open aen hebben doen hanghen, int jaer ons heeren duijsent vijffhondert twee ende tsestich ǁ den negenentwintichsten januarij

J de Roij ǁ 1593

Secundaria overmits den lasten door tgraven ǁ oft bergen inde ac[te ve]rmelt is geweest als ǁ gebleken is XXVIJ [no]vembris 1593 in judicio

Dorsale aantekening:

Johan Sonmans als getrout hebbende Lusija dochtere wijlen Frans Janse Stamproij ǁ verweckt bij Elisebet dochtere meester Peeter Beris geweesne secretaris tot Moer ǁ gestel heeft bekent in dijer qualijteijt dat de vijffennegentich stuijvers inden witte ǁ van dese vermelt aen sijne handen sijn geloeft door Jan Janse Coubeek van Goel ǁ ende dat met de somme van seventich guldens volgens den los gebleeken bijde ǁ attestatie ende verclaringe vanden heer secretaris van Tilborgh Actum Sertoghenbos ǁ opten sevenste october 1654

J. Sonmans ǁ 1654