's-Hertogenbosch

Kennelijck zij eenen ijegelijcken dat alsoo Wernaer Grevenraet gemechticht uut crachte van seekere procuratie brieven der ǁ scepenen van Andtwerpen, ende uuyt rechten der machten hem in deselve brieven van Ghysberden Jan Thomass. gegeven, ende verleent, de helft, ende allet recht, paert ǁ ende actie, ende gedeelt den voorscrevenen Ghysberden competerende in eenen jaerlycken, ende erffelycken chyns van sevenendartich Carolus gulden, ende thien stuvers twintich stuvers ǁ oft die werde daer voor in anderen gevalueerden gelde voor elcken gulden te rekenen, Te betaelen alle jaer erffelyck opten iersten dach der maent van junio ende binnen der ǁ stadt van Shartoigenbossche vry van allen beden, subventien exactien, allen anderen commeren, lasten, ende vergelde, ende oyck van thiensten, ende twintichsten penning vanden hove oft staten ǁ van Brabant oft vanden stadt vanden Bossche eertyts geseth, ende allen anderen lasten die by den Staeten oft stadt naemaels geset sullen worden, te leveren van ende uut ǁ een hoeve Reijneren van Bredero de heere tot Cloetingen, des lants van Voshoel van Reewyck Asten etc. toebehoorende gelegen inde prochie van Tilborch ter plaetssen ǁ genoempt aent Broeck aen Baxdijck, te wetene van ende uut de huysen, erven, hoven, landen, beemden, heyen, weijen, houtwasschen, ende anderen rechten ende toebehoirten der ǁ selver hoeve waer die gelegen syn ende bevonden sullen wordden, Noch van ende uut een wyntmoelen den voorscrevenen Reynderen toebehoorende staende inde prochie van Oisterwyck ter ǁ plaetssen genoempt Karckhoven, ende uuyt een watermoelen metten rechte, ende tgemaell, ende emolumenten der selver muelen hennen rechten, ende toebehoirten ende voorts ǁ van ende uuyt allen ende eenyegelycken anderen goederen des voorscrevenen Reyners, waer ter plaetssen die gelegen syn ende bevonden sullen wordden, hadden wittelyck, ende erffelyck opgedragen ǁ ende overgegeven Huijbrecht van Bruhezen tot behoeff Jans Goetsels sone wylen Goijarts Goetsels gelyck men seeghde in scepenen brieven deser stadt Shartoigenbossche ǁ daer op geen acte breeder te zyn begrepen in date den darthiensten dach july anno XVc seven ende tachtentich, Soo is gestaen voor ondergescrevenen meester ǁ Jan Laurentij procureur postulerende bynnen Shartoigenbosch in name ende van wegen des voorgenoempde Jan Goetsels soone wylen Goyarts Goetsels ǁ ende Janne dyen naeme de voorscrevenen meester Jan tot sgeens naevolgende is gemechticht in procuratie brieven die bourgemeesteren scepenen ende raede der ǁ stadt van Andtwerpen in date den drientwintichsten decembris des jaers vijffthienhondert sevenentnegentich ende uuyt crachten der machten den selven ǁ meester Jannen vanden voorscrevenen Jan Goetsels daer inne alst blycte gegeven ende verleent de voorscrevenen helfte der voorgenoempde rente van sevenendartich gulden thien ǁ stuvers, heeft hy wittelijck ende erffelyck opgedragen ende overgegeven Marijkenen wittige huysvrouwe Huybrechts van Bruheze tot behoeff desselffs Huybrechts ǁ hairs mans Tsamen metten voorscrevenen brieven ende met allen anderen brieven daervan mentionerende ende metten alinge recht hen, ende der voorscrevenen Jannen Goetsels inde voors. ǁ brieven ende d'innehout van dyen enichsins competerende ende met allen den afterstellen vanden voorscrevenen helfte des chyns voorn. ten achteren ende onbetaelt staende, ende ǁ heeft helmelinge daer op vertegen inne manieren inne dijen gewoonelyck synde, Geloovende de voorn. meester Jan uut crachte synder gegevender machte op wat van allen den ǁ goederen des voorscrevenen Jan Goetsels present ende toecomen ende dit opdragen, overgeven, ende vertyden altijt vast stedich ende van weerden te houden ende allen ǁ commer calaingien ende aentaell inde voorscrevenen helfte des chyns voorscrevenen, wesende oft commende den voorscrevenen Huijbrechten van Bruheze aff te doen geheelyck ǁ Getuijgen waeren hier over scepenen in Shartoigenbossche Goijart van Engelant ende Peter Pelgrom, Gegeven den lesten dach der maent van ǁ decembry int jaer ons Heeren duysent vyffhondert seven ende tnegentich.

J van Hees

Dorsale aantekening:

Tilborch ǁ de helfft van 37 gulden 10 [stuvers] ǁ Huybrecht Bruhese ǁ anno 97