Brussel (België)

Albert ende Isabel Clara Eugenia Infante van Spaignen  bij der gratien Godts ende ertshertogen van Oistenrijck ǁ hertogen van Bourgoignen, van Lothrijck, van Brabant, van Limborch, van Luxemborch, ende van Gelre etcetera den iersten vander deurweerderen oft  boden van onsen Raede geordineert in Brabant hierop versocht  saluijt, wij ontbieden u ende bevelen ende soo verre desnoot zij committeren ǁ bij desen, dat soo verre u  blijcke van sekeren vonnisse gegeven in onsen voirs. Raede den vijffden dach der maendt van meerte XVIc ende twelff tusschen die schouteth, schepenen, ende andere regeerders der vrijheijt van Hilvarenbeke suplianten  ter eenre, ende die schouteth ǁ schepenen ende regeerders van Thilborch rescribenten ter andere zijden, ghij alsdan ten versuecke der voirs. suplianten stelt tselve vonnisse ter behoirlijcker executien naer sijne forme ende  teneur bij alsoo verre executie daertoe staet, bedwingende daertoe reelijck ǁ ende metter daet, ende alle andere behoirlijcke wegen ende manieren van bedwange daertoe dienende den ghenen oft die ghene die daertoe sullen behoiren bedwongen te worden, met oijck u te betaelen de costen van desen ende executie der S[***]r, ende aengesien tvoirs. vonnisse is ǁ overjaert soo verre u dit doende gebeure eenige oppositie oft contradictie, ende u blijcke alsboven, namptisatie ierst ende voir al gedaen van tghene daeraff dat namptisatie sal behoiren gedaen te sijne, daecht den opponent oft opponenten doende de voirs. contradictie ǁ te sijn ende te compareren teenen sekeren gelegenen daege voir onse seer lieve ende getrouwe die canceler ende lieden van onsen voirs. Raede geordineert in Brabant, om aldaer die redenen van hunder oppositien op te doen ende te verclaeren, tandtwoirden ende inder saecke voirts te ǁ procederen soo behoiren sal, met inthimatie commende ten voirs. daege oft nijet, men altijts sal inder voirs. saecke voirts procederen ende besundere opde leveringe vander  voirs. nampte appreteren soo behoiren sal, heurder absentie oft nijet comparitie nijettegenstaende, overschrijvende ǁ ten voirs. daege onsen voirs. canceller ende raedtslieden tghene des ghij in desen sult hebben gedaen, den welcken wij ontbieden ende committeren dat sij  partijen gehoirt, goet cort recht doen ende expeditie van justicie, om dwelck te doene wij u volcomen macht ende authoriteijt ǁ gheven bij  desen, ontbieden voirts ende bevelen allen anderen onsen ende onser vassallen ende der Smaelreheeren Richteren, Justicieren, Officieren ende dienaeren ons voirs. landts van Brabant, dat zij u tselve doende alle behulp ende bijstandt doen soo verre ghijs behoeff ende zij ǁ des van u versocht worde, want ons alsoo gelieft gegeven binnen onser stadt van Bruessele drijentwintich daegen inde maendt van Februario int jaer duijsent sessehondert ende vijfthien

Bijde Eertshertoghen ǁ en hunnen Raede ǁ P Piermans

XVIII stuivers

Executorie op vonnisse vernijeuwt