[Brussel]

Gesien in den Raede vande Eertzhertogen Albert ende Izabel Clara Eugenia infante van Spaingnen ǁ onze genadichste heeren ende princen geordineert in hunnen lande ende hertochdomme van Brabant die requeste aldaer gepresenteert by joncker Huybrecht van Malsen heere van Tilborch, Goirle etcetera  Inhoudende ǁ hoe dat hem suppliant van weghen joncker Charles van Malsen zynen vader, onder andere goeden tot Tilborch is aenverstorven de quantiteyt van ontrent elff bunderen landts gelegen tot Tilborch ter plaetsen geheyten ǁ het Reytveld, ende daertoe alnoch ontrent een halff bunder gelegen voer den huyse des suppliants, welcke twee partyen van erven des suppliants vader in den jaere XVc zevenentzeventich ten hoochsten ende ǁ voer alle man gecocht ende vercregen heeft, teghen den schouteth, schepenen ende gesworene van Tilborch uuyt crachte van zekere octroye van zyne Co(nincklijcke Majesteyt van den jaere XVc zessentzeventich ǁ den vercooperen ende gemeyne ingesetene van Tilborch verleent, om te mogen vercoopen zekere quantiteyt van bunderen hender gemeynte, gelyck ten zelven tyde uuyt crachte der zelver octroy ǁ verscheyden andere partyen van gemeynte aen verscheyden gemeyne innegesetene van Tilborch zyn vercocht, T'is nu alzoe dat de suppliant ondersocht hebbende de gescriften ende munimenten van zyne ǁ patrimoniale goeden, nyet en bevindt d'opdracht oft guedenisse der voers. twee partyen van erven, zonder dat de suppliant op het protocol der schepenen van Tilborch ende Goirle oyck eenige ǁ opdracht can bevinden, Soe oyck nyet en wordt bevonden, dat dezelve partyen in handen des rentmeesters van haere hoocheyden in den quartiere van Shertogenbosche zyn overgebrocht, gelyck tzelve ǁ moet ende behoort te geschieden, om daer uuyt jaerlycx te vergelden de cheynsen ten laste van elck bunder staende, ende want het voers. opdraegen ende overgeven is versuympt uuyt oirzaecke ǁ van de absentie des suppliants vader, die doer deze oirlogen hem heeft moeten absenteren, ende dat alzoe de zaecke van zynen weghen nyet en is gaede geslaegen noch bewaert, ende dat alene ǁ wel de suppliant wettich bescheet behoort te hebben van zyns vaders vercryge ende toecompste, Soe en can nochtans de suppliant daertoe nyet geraecken, nyettegenstaende den schouteth, ǁ schepenen ende vele gemeyne innegesetene genoech is notoir, jae moeten bekennen, dat zy totter voers. partyen van goeden egheen recht en hebben, maer ter contrairen dat dezelve partyen ǁ by des suppliants vader wettelyck zyn vercregen, gelyck hy suppliant ende wylen zynen vader zedert den coope tot nochtoe daeraff altyt zyn geweest in rustelycke ende vredelycke ǁ possessie ende gebruyck, zonder oppositie van yemanden, Dezen aengemerckt ende daertoe geconsidereert dat de rentmeester van de domeynen van haere hoocheyden ter avontueren oyck swae ǁ richeyt zal willen maken, om de voers. partyen van erven opten cheynsboeck te stellen, Alles streckende tot grooten preïndicie ende achterdeele des suppliants, die daer doer in toecommende ǁ tyden, verstaen zoude mogen worden te besitten ende hem aen te draegen eenige goeden, daeraff hy egheene toecompste en zoude connen proberen, Daer ter contrarien ende in cas van ǁ oppositie de suppliant genoech zal verificeren tghene by hem geallegeert is, Soe heeft de suppliant oytmoedelyck gebeden dat den voers. Raede gelieven zoude den voers. schouteth, ǁ schepenen ende gesworene van Tilborch ende Goirle te ordonneren, den suppliant van de voers. partyen van erffenisse te doen wettige transport ende opdracht, oft andere suffisante ǁ verzekeringe, ende daertoe den rentmeestere Fierlandts te ordonneren het overbrengen van de voers. partyen ten chynsboecke te accepteren, ten mintsten onder betalinge van den verloope ǁ van de cheynsen, Gesien tot dyen die rescriptie by den schouteth, schepenen ende gesworene der voers. heerlicheyt van Tilborch ende Goirle daerop gedient, Een zamentlyck ǁ het advis van Merten Fierlans, rentmeestere van de domeynen van heure hoocheyden int quartier van Shertogenbossche ende andere stucken daerby gevueght, ende op al wel ende rypelyck ǁ geleth, T'hoff  ordineert den voers. schouteth, schepenen ende gesworene van Thilborch ende Goirle, aen den voers. suppliant te doen wettich transport ende opdrachte ǁ van de twee parcheelen van erffve in zyne voers. requeste ende hierboven breeder gementionneert, daer ende zoe dat behoort, Denzelven schouteth, schepenen ende gesworene ǁ daertoe midts dezen authorizerende, Ordinerende voirts oyck den voers. rentmeester het overbrengen van de voers. twee parcheelen ten chynsboecke van heure hoocheyden ǁ t'accepteren ende t'ontfangen, Midts by den voers. suppliant in zynen handen betalende die verloopen van den erffchyns van twee stuyvers opt bundere, van den tyt aff dat wylen ǁ zyn vader die possessie van de zelve twee parcheelen heeft aenveert gehadt, ende tot dyen dezelve doende behoorlyck affpalen in presentie des voers. rentmeesters ǁ om by behoorlycke distinctie met hunne paelgenoten gestelt te worden int voers. chynsboeck van heure hoocheyden, Gedaen Raede van Brabant den lesten ǁ dach der maent van februarius int jaer zesthienhondert zess ǁ [***] ǁ

Dorsale aantekening:

Numero 5 ǁ Mandement van den ǁ Raed van Brabant ten ǁ tijden van de aertshertogen ǁ  Albert en Isabella Clara ǁ Eugenia, over elf bunder ǁ lands genaemd t Rijtveld ǁ met nog een halve bunder ǁ gelegen voor t kasteel ǁ dato 6 februari 1606